 |
Navumaŭ adznačyŭ, što Dzień milicyi — heta śviata, jakoje adznačajecca ŭ kožnaj siamji i taksama dadaŭ, što ŭzrovień złačynnaści ŭ krainie ŭ paraŭnańni z 2006 hodam źniziŭsia amal na 100 vypadkaŭ na 100 tysiač čałaviek.
Ministar paviedamiŭ, što ŭ krainie rychtujecca čarhovaja amnistyja. U suviazi z hetym amal adrazu prahučała pytańnie, ci zmoža pad hetuju amnistyju trapić eks‑kandydat u prezydenty Alaksandar Kazulin.
«Prymianieńnie amnistyi praduhledžvaje, što asudžany poŭnaściu vykonvaje svaje abaviazki. Asudžany Kazulin na siońniašni momant maje čatyry papiaredžańni, tamu padstavaŭ na padaču amnistyi niama. Vy viedajecie, ja vykonvaju zakon, a nia ŭnošu niejkija prapanovy. To bok, u nas padstavaŭ dla amnistyi niama, kali ž buduć prapanovy i jany buduć niekim padtrymlivacca, to my ich vykanajem».
Sp. Navumaŭ raskazaŭ, što letaś biełaruskaja milicyja raskryła «adno z najbolš hučnych zabojstvaŭ minułych 10‑15 hadoŭ». Sprava pieradadzienaja dla śledztva ŭ Hieneralnuju prakuraturu. Navumaŭ nie zachacieŭ pakul nazyvać imionaŭ, kaža, što heta mohuć zrabić tolki pradstaŭniki prakuratury. Zapeŭniŭ ministar, što nia budzie nijakich prablem raśśledavańnia niadaŭniaj stralaniny ŭ bary haścinicy «Planeta». Pavodle jahonych słovaŭ, prablemaŭ z vyšukam Hančaryka, jaki stralaŭ, nia budzie, bo milicyja viedaje prykładnyja jahonyja kaardynaty.
Što da śpisu nievyjaznych, to ministar adznačyŭ, što hety śpis źmianiajecca litaralna štodnia.
«Lepš papiarednie pazvanić i pacikavicca, ci jość vy siarod nievyjaznych, čym być zaviernutym na miažy», — kaža čynoŭnik.
Praz toje, što hetaja systema novaja, to mahčymyja i pamyłki. Tak, užo byli zafiksavanyja dva pamyłkovyja vypadki, kali ludzi nie mahli vyjechać za miežy krainy.
«Ja nikoli nia byŭ suprać, kab departament vykanańnia pakarańnia pierajšoŭ u jurysdykcyju niejkaha inšaha viedamstva, bo ź mianie źnikła b niejkaja dadatkovaja nahruzka. U toj ža čas ja dobra sabie ŭjaŭlaju, i viedaju mierkavańni supracoŭnikaŭ hetaha departamentu, nakolki ciažka budzie stvaryć niejkuju novuju strukturu pa vykanańni pakarańniaŭ, i jakija materyjalnyja resursy nam daviadziecca stračvać. Z ulikam taho, što niekatoryja krainy, u tym liku Eŭraźviazu, viartajuć turmy i kalonii znoŭ Ministerstvu ŭnutranych spravaŭ, to, dumaju, u ahladnaj budučyni nam nia varta mianiać siońniašniuju sytuacyju», — tak prakamentavaŭ U.Navumaŭ mahčymaść pieravodu Departamentu vykanańnia pakarańniaŭ ad MUS da Ministerstva justycyi.
Ministar rašuča vykazaŭsia suprać uviadzieńnia ŭ Biełarusi instytuta dvajnoha hramadzianstva.
«Pakul hetaje pytańnie nie abmiarkoŭvajecca, ale navat kali i atrymaje hučańnie, to, miarkuju, što naša nasielnictva budzie suprać novaŭviadzieńnia. Vy sami razumiejecie, chto ŭ takim vypadku pryjedzie ŭ našu krainu. Skažu ščyra, mnie b nie chaciełasia ŭviadzieńnie dvajnoha hramadzianstva», — kaža kiraŭnik MUS.
Žurnalist radyjo «Svaboda» pacikaviŭsia ŭ sp.Navumava umovami ŭ rehijanalnych izalatar časova ŭtrymańnia. U pryvatnaści, byŭ pryviedzieny prykład IČU u Vuździe, dzie niadaŭna adbyvaŭ pakarańnie pradprymalnik Viktar Kryval.
«Možacie sami na miescy vyvučyć sytuacyju, — prapanavaŭ ministar. — Ja dam adpaviednuju pastanovu. Dumaju, što izalatary nia treba davodzić da takoha stanu, kab tudy chaciełasia».
Hałoŭnym dasiahnieńniem minułaha hodu Ŭ.Navumaŭ nazvaŭ toje, što mnohija supracoŭniki milicyi byli ŭznaharodžanyja dziaržaŭnymi medalami. Padzieja sa znakam minus — kryminalnaja sprava suprać DAIšnikaŭ u Haradockim i Šumilinskim rajonach, jakija inśpiravali darožna‑transpartnyja zdareńni. Darečy, sioleta ŭžo pačniecca patrulavańnie na viertalotach najbolš niebiaśpiečnych daroh, u pryvatnaści, Marjina Horka — Babrujsk i Słuckaj šašy.
Adkazvaŭ sp.Navumaŭ na pytańni nia tolki, jak ministar, ale i, jak staršynia federacyi chakieju. Jon pryznaŭsia, što najbolšaja jahonaja mara siońnia, kab «Manreal Kanadzijans» vyjhraŭ i pryvioz na tydzień u Miensk Kubak Stenli.
Naprykancy pres‑kanferencyi Ŭładzimier Navumaŭ zaprasiŭ usich žurnalistaŭ dałučycca da jaho padčas prabiehu vakoł Naračy, jakoje ministar zaplanavaŭ na 4 traŭnia. Za dzień čynoŭnik choča pieraadoleć pieššu kala sta kilametraŭ.
