Venesueła na miažy vajny z Kalumbijaj

Ekvador ściahnuŭ vojski da svaich paŭnočnych miežaŭ, da miažy z Kalumbijaj i vysłaŭ z krainy kalumbijskaha pasła. Dla kansultacyj adklikany i pasoł Ekvadoru ŭ Kalumbii.

Pryčynaj dyplamatyčnaha kanfliktu stała aperacyja kalumbijskaj armii, padčas jakoj na ekvadorskaj terytoryi byli zabityja asoba numar dva ŭ paŭstanckich Revalucyjnych uzbrojenych siłach Kalumbii (FARK) Raul Rejes i ministar zamiežnych spravaŭ u padpolnym uradzie FARK.

Rejd na terytoryju Ekvadoru paćvierdziŭ toje, pra što daŭno havaryłasia: Ekvador, a mahčyma, taksama i Venesueła dazvalajuć kalumbijskim partyzanam vykarystoŭvać svaju terytoryju ŭ jakaści bazy. Heta stała asabliva važna paśla taho, jak kalumbijskija vojski na čale z enerhičnym prezydentam Alvara Urybe dasiahnuli značnych pośpiechaŭ u baraćbie z FARK. Kali 10 hadoŭ tamu hierylja kantralavała kala pałovy terytoryi krainy, to ciapier zona kanfliktu skaraciłasia da traciny krainy.

FARK viadzie partyzanku ŭžo 40 hadoŭ. Napačatku za FARK stajała bajavoje kryło Kampartyi, ale z časam, kali stała vidavočna, što FARK skaciłasia da narkahandlu i bandytyzmu, kamunisty pieramianili pazycyju.

Prezydenty Venesueły i Ekvadoru, złyja na Urybe za jahony ciesny chaŭrus z ZŠA, skarystali nahodu kalumbijskija rejdu dla ataki na «maryjanetku dziadzi Sema».

Prezydent Ekvadoru Rafael Karea ŭ vystupie pa nacyjanalnym telebačańni zajaviŭ:

«Heta skandał! My vykazvajem rašučy pratest! Bo havorka viadziecca pra samy sapraŭdny akt ahresii suprać našaj krainy. My pojdziem da kanca, my vyśvietlim, što aznačaje heta skandalnaja ahresija na terytoryi našaj radzimy, suprać našaj terytoryi».

Prezydent Venesueły pajšoŭ jašče dalej. U niadzielnaj teleprahramie «Alo, prezydent» Uha Čaves rascaniŭ kroki uzbrojenych sił Kalumbii pa źniščeńni bajevikoŭ FARK na ekvadorskaj terytoryi jak najhrubiejšaje parušeńnie terytaryjalnaj cełasnaści suverennaje krainy. U žyvym etery Čaves daŭ ukazańnie ministru zamiežnych spraŭ zamknuć pasolstva Venesueły ŭ Kalumbii. Zahad atrymaŭ i ministar abarony.

«— Spadaru ministar, adrazu nakirujcie da kalumbijskaj miažy 10 bataljonaŭ, tanki i aviyjacyjnyja padraździaleńni.

‑ Jość!

‑ Abviaščaju ŭ krainie najvyšejšuju stupień bajavoj hatoŭnaści! My padtrymlivajem Ekvador».

Taksama Čaves vielmi ciopła vykazaŭsia pra zabitaha lidera kalumbijskich paŭstancaŭ Raula Rejesa, nazvaŭšy jaho słaŭnym chłopcam, sapraŭdnym revalucyjaneram.

U svaju čarhu, urad Kalumbii abvinavaciŭ prezydenta Ekvadoru Rafaela Karea ŭ supracoŭnictvie ź levaradykalnymi paŭstancami FARK. U jakaści dokazu byli prademanstravanyja dakumenty, nibyta znojdzienyja na bazie bajevikoŭ FARK, u tym liku materyjały ab kantaktach lideraŭ FARK z ekvadorskaju specsłužbaj, kiraŭnik jakoj — blizki siabar prezydenta krainy.

Praŭda, na dyplamatyčnym uzroŭni ad imia svajho ŭradu ministar zamiežnych spraŭ Kalumbii vybačyŭsia pierad Ekvadoram za parušeńnie jaho miažy.

U paniadziełak Karea taksama pierasunuŭ vojski da miažy z Kalumbijaj. Heta pastaviła rehijon nia miažu vajny.

Kanflikty ŭ hetaj zonie zdaralisia niaredka. Hetak, Ekvador u 1981 i 1995 hadach dvojčy vajavaŭ ź inšym susiedam — Peru.

Na dumku mnohich naziralnikaŭ, u vajnie asabliva zacikaŭleny Čaves, papularnaść jakoha ŭpała.