 |
Trom udzielnikam manifestacyi pradprymalnikaŭ, što adbyłasia 10 studzienia, vystaŭlenaje kryminalnaje abvinavačvańnie. U blizkaj spravie ŭ aŭtorak byŭ aryštavany taksama Siarhiej Parsiukievič, pradprymalnik ź Viciebsku.
Siońnia ranicaj moładzievym aktyvistam AHP Michaiłu Paškieviču i Michaiłu Kryvavu, a taksama maładafrontaŭcu Ŭładzimieru Siarhiejevu byli pradjaŭlenyja aficyjnyja abvinavačvańni ŭ kryminalnaj spravie za mitynh pradprymalnikaŭ 10 studzienia. Hetyja maładziony siońnia naviedali Śledčaje ŭpraŭleńnie papiarednich raśśledavańniaŭ HUUS Mienharvykankamu (Sapioraŭ, 7).
Śledčy pałkoŭnik Pavał Michalkievič paviedamiŭ chłopcam, što sa statusu padazronych jany pieravodziacca ŭ abvinavačanyja. Jany prachodzić pa artykule 342 častka 1 KK «Arhanizacyja i padrychtoŭka dziejańniaŭ, što hruba parušajuć hramadzki paradak, abo aktyŭny ŭdzieł u ich». Pavodle hetaha artykułu praduhledžvajecca pakarańnie ad štrafu da troch hadoŭ pazbaŭleńnia voli.
Jak paviedamiŭ «Našaj Nivie» Ŭładzimier Siarhiejeŭ, siońnia ŭ jaho sprabavali ŭziać pakazańni, ale chłopiec admoviŭsia. Z usich traich uziataja padpiska ab niavyjeździe. Taksama sa słovaŭ Siarhiejeva stała viadoma, što ŭ dadzienaj kryminalnaj spravy ŭžo nie 12, a 14 fihurantaŭ. U śpis padazronych dadali A.D ubskaha i A. Kojpiša. Andrej Kim, jaki znachodzicca ŭ SIZA za nibyta źbićcio milicyjantaŭ, taksama fihuruje ŭ hetaj kryminalnaj spravie.
Da 11 sakavika skančvajecca papiaredniaje śledztva pa spravie. Paśla čaho «kryminałku» mohuć padoŭžyć, ci ŭžo pieradać u sud.
Krychu paźniej stała viadoma, što aryštavany viciebski pradprymalnik Siarhiej Parsiukievič. 4 sakavika ab 11 hadzinie Parsiukievič źjaviŭsia ŭ Maskoŭski RUUS na dopyt pa svajoj kryminalnaj spravie. Praź dźvie z pałovaj hadzinaŭ dopytu śledčy Dźmitry Razanka pastanaviŭ aryštavać pradprymalnika na troje sutak.
Pavodle słovaŭ Viačasłava Siŭčyka, jaki prychodziŭ da RUUSu padtrymać Parsiukieviča, užo ad samaha pačatku było vidać, što rychtujecca aryšt: «U kabinet da śledčaha pačali zachodzić niejkija studenty — jak potym vyśvietliłasia, heta byli paniatyja. Na dopycie ŭvieś čas prysutničała advakatka Siarhieja Viera Stramkoŭskaja».
31 studzienia ŭ dačynieńni da Siarhieja Parsiukieviča była zaviedzienaja kryminalnaja sprava pa artykule 364 KK («hvałt, albo pahroza hvałtu ŭ adnosinach da rabotnika milicyi») pradprymalniku pahražaje da šaści hadoŭ źniavoleńnia. Abvinavačvańnie zvodzicca da taho, što padčas adbyćcia 15‑sutačnaha aryštu na Akreścina, Parsiukievič źbiŭ namieśnika dziažurnaha Alaksandra Dłupa.
Pavodle słovaŭ pravaabaroncaŭ, šancaŭ, što Siarhieja vypuściać pa skančeńni hetych troch sutak vielmi mała. Padčas aryštu pradprymalnik budzie znachodzicca ŭ SIZA, jakoje raźmiaščajecca ŭ novym korpusie izalatara na Akreścina.
Varta adznačyć, što ranicaj Siarhiej Parsiukievič naviedaŭ francuskaje pasolstva, dzie sustreŭsia z daradcam ambasadara Filipam Seńjorenam. Pradprymalnik paviedamiŭ padrabiaznaści svajoj kryminalnaj spravy.
