Ministerstva abarony Armienii zajaŭlaje, što vojski susiedniaj dziaržavy parušyli režym spynieńnia ahniu.
«Siońnia, a 5‑j ranicy, na miažy niepryznanaj Nahorna‑Karabachskaj Respubliki i Azerbajdžanu ŭzbrojenyja siły Azerbajdžanu adkryli ahoń pa pazycyjach NKR, u vyniku čaho byŭ paranieny aficer Armii abarony NKR,» ‑‑ paviedamiŭ pres‑sakratar ministra abarony Armienii, pałkoŭnik Sejran Šachsuvaran.
Ministar zamiežnych spraŭ Armenii Vardan Askanian zajaviŭ, što Azerbajdžan zrabiŭ sprobu zachapić častku armianskaje terytoryi ŭ rajonie Mardakiertu.
«Hetyja dziejańni adroźnivajucca ad zvyčajnych vypadkaŭ parušeńnia režymu spynieńnia ahniu. Dziejańni Azerbajdžanu taksama jakasna adroźnivajucca ŭ planie vykarystańnia vajennaje techniki i zbroi»,‑ zajaviŭ ministar.
U svaju čarhu, kiraŭnik pres‑słužby MZS Azerbajdžanu Chazar Ibrahim abvinavaciŭ Armieniju ŭ pravakacyi:
«Armianski bok sprabuje advieści ŭvahu, jak svajho narodu, tak i mižnarodnaj supolnaści, ad vielmi napružanaj unutranaj sytuacyi. Tamu armianie šukajuć źniešni faktar i zajmajucca pravakacyjami, abstrelvajučy azerbajdžanskija pazycyi».
Miž tym, prezydent Azerbajdžanu Ilcham Alijeŭ nie vyklučaje vykarystańnie niedyplamatyčnych šlachoŭ dla vyrašeńnia karabachskaha kanfliktu.
«My vystupajem za mirnaje rašeńnie prablemy ŭ ramkach terytaryjalnaj cełasnaści Azerbajdžanu z vykanańniem normaŭ i pryncypaŭ mižnarodnaha prava. Ale my taksama pavinny być hatovyja k rašeńniu prablemy vajennym šlacham, i my hatovyja. Vajenny biudžet Azerbajdžanu ŭ hetym hodzie — 1,3 młrd. dalaraŭ, i jon budzie pavialičvacca. Na hetyja srodki Azerbajdžan budzie zakupać vajennuju techniku dy ŭzbrajeńnie. Metaj ŭsiaho hetaha jość vyzvaleńnie akupavanych ziemlaŭ», — zajaviŭ siońnia Alijeŭ padčas uručeńnia kvateraŭ vieteranam karabachskaje vajny.
