 |
Braty Siarhiej i Alaksandar Skrabcy siońnia abviaścili biesterminovuju haładoŭku pratestu. Takim čynam Skrabcy źbirajucca damahacca vyzvaleńnia z turmaŭ palitviaźniaŭ Alaksandra Kazulina, Siarhieja Parsiukieviča i Andreja Kima.
«My doŭha abmiarkoŭvali z bratam, ci varta pačynać haładoŭku. Vyrašyli, što ŭsio ž treba. Asabliva ciapier, kali i ZŠA i Eŭrasajuz adzinahałosna patrabujuć vyzvaleńnia biełaruskich palitviaźniaŭ. Naša kraina ciapier znachodzicca ŭ ciažkim palityčnym i ekanamičnym stanoviščy», – kaža były deputat pałaty pradstaŭnikoŭ Siarhiej Skrabiec.
Pakul haładać buduć tolki jany udvuch, ale były palitviazień upeŭnieny, što ichniuju akcyju pratestu padtrymajuć i inšyja hramadzkija dziejačy. Siarhiej Skrabiec kaža, što sam asabista prasiŭ Kazulina, kab spyniŭ haładoŭki, dziela jahonaha zdaroŭja.
Dla Siarhieja Skrabca heta ŭžo siomaja ci vośmaja haładoŭka, jon sam užo nia moža ŭzhadać dakładnuju ličbu. Apošni raz takim čynam jon pratestavaŭ jašče ŭ viciebskaj turmie. Pierad samym vyzvaleńniem Skrabiec u znak salidarnaści z Kazulinym admaŭlaŭsia ad ježy ciaham amal 25 dzion. Pa słovach Siarhieja, jahony brat taksama maje dośvied haładańnia, ale ŭžo dosyć daŭni.
«My nia budziem rabić z haładoŭki niejkaje šoŭ. Lažać u pakoi, kab da nas prychodzili žurnalisty i dyplamaty. Budziem haładać aktyŭna, praciahvać udzielničać u palityčnym žyćci krainy. Abaviazkova prymiem udzieł u śviatkavańni Dnia Voli», – kaža Siarhiej Skrabiec.
Spampavać fajł videa na kamputar u dobraj jakaści (11 Mb) možna pa hetaj spasyłcy
«Siońnia Złučanyja Štaty Ameryki i Eŭraźviaz zapatrabavali, kab našyja ŭłady adpuścili palitviaźniaŭ. Alaksandar, Kazulin, Andrej Kim i Siarhiej Parsiukievič zaraz znachodziacca za kratami. My padtrymlivajem hetaje patrabavańnie, bo ŭ našaj krainie na siońniašni čas pa‑raniejšamu niama hramadzianskich svabodaŭ, usio hramadstva zapužanaje, praciahvajucca represii. My ličym, što nia tolki Eŭraźviaz i Złučanyja Štaty pavinny barocca za našu svabodu, ale i my sami biełarusy taksama pavinny heta rabić. Tamu my abvieścili siońnia haładoŭku.
Tut vielmi ciažka havaryć, dabjemsia my pieramohi ci nie. Ale, vy viedajecie, kali my haładali ŭ parlameńcie, patrabavali, kab pytańnie pa vybarach, našyja papraŭki byli ŭniesienyja, to hetaje pytańnie ŭsio‑taki było razhledžanaje. Kali my haładali z Kazulinym, kab pytańnie padniali ŭ Saviecie Biaśpieki AAN — taksama heta było zroblena. Ja taksama pravodziŭ haładoŭku za kratami, dabivaŭsia, kab razhledzieli pytanie pa prymianieńni da mianie amnistyi, i heta taksama było zroblena. Nia ŭsie haładoŭki, ja liču, byli niepaśpiachovyja. Ułada vymušana prysłuchoŭvacca da ludziej, da hramadstva. Kali my znojdziem padtrymku ŭ prostych ludziej, to palitviaźni pavinny apynucca na svabodzie ŭ bližejšy čas.
Pieršy čas nieskładana, ale kali dalej sił budzie nie chapać, to budziem siadzieć doma. Vy viedajecie, heta budzie zaležać ad ahulnaha stanovišča. My planujem pryniać udzieł u akcyi na Dzień Voli, u inšych akcyjach apazicyi. Pakul buduć siły, my budziem zmahacca, bo sami pa sabie demakratyčnyja pieramieny nia pryjduć u našuju krainu. Dla ich treba niečym achviaravać».
