Jana pajšła da ambasadara adnoj z samych mahutnych dziaržavaŭ śvietu. Nie stała kazać pra dyktaturu i demakratyju, a vydychnuła: «Kali jon pamre, ja pamru taksama, bo nie zmahu bieź jaho žyć». Uładzimier Niaklajeŭ — pra Irynu Kazulinu (Sabaleŭskuju).
Jaje muž, palitviazień, abjaviŭ haładoŭku, patrabujučy, kab pytańnie pra jahonuju krainu, dzie najpieršymi kaštoŭnaściami nazvanyja čarka dy skvarka, było razhledžana ŭ Radzie biaśpieki AAN. Kali hetaha nie staniecca, jon dahaładajecca da śmierci.
Muž haładaŭ tydzień, druhi, treci, čaćviorty, pahroza śmierci stała realnaj. Chtości ŭhavorvaŭ jaho spynić haładoŭku, niechta čakaŭ, kali jon pamre.
Viedajučy jahony charaktar, jana razumieła, što jon skanaje, ale ad svajho nie adstupicca. Treba było jaho ratavać.
Jana pajšła da ambasadara adnoj z samych mahutnych dziaržavaŭ śvietu. Nie stała kazać pra dyktaturu i demakratyju, a vydychnuła: «Kali jon pamre, ja pamru taksama, bo nie zmahu bieź jaho žyć».
Ambasadar adnoj z samych mahutnych dziaržavaŭ śvietu, musibyć, viedaŭ, što takoje nasamreč jość čałaviečyja kaštoŭnaści. Jon nakiravaŭ svajmu ŭradu dakumient, u jakim abhruntavaŭ terminovuju nieabchodnaść razhladu ŭ Radzie biaśpieki AAN taho pytańnia, na jakim nastojvaŭ palitviazień, što i było zroblena.
Palitviazień spyniŭ haładoŭku.
Žančynu, jakaja ŭratavała ad śmierci svajho kachanaha, 27 lutaha 2008 hoda pachavali na mohiłkach u vioscy Tarasava pad Mienskam. Z hetaha dnia ŭ nas źjaviłasia miesca, da jakoha ŭsie i kožny, chto kachaŭ i kachaje, moža prynieści kvietki.
Heta jość toje, što moža stać lehiendaj. A imia žančyny z hetaj lehiendy –Iryna Kazulina, da šlubu – Sabaleŭskaja.
Uładzimier Niaklajeŭ,
Hotland, 8 sakavika
