Akramia apalnaha rasiejskaha aliharcha, klijentami Tymaty Beła byli eks-premjer Tajlandu Taksyn Čynaŭat, adchileny ad ułady pa abvinavačvańniach u karupcyi, a taksama manarchija Saudaŭskaj Arabii.
Alaksandar Łukašenka prapanavaŭ huru brytanskaj PR-industryi Tymaty Bełu papracavać nad palapšeńniem svajho imidžu na Zachadzie.
Na sustrečy ź pijarnikam A. Łukašenka zajaviŭ, što nivodnaja sučasnaja dziaržava nia moža abyścisia biez prafesijnych PR-pasłuh. «Vam budzie pryjemna pracavać u našaj krainie, ź ludźmi, toj uładaj, jakaja isnuje ŭ Biełarusi, — skazaŭ kiraŭnik dziaržavy. — Pierš čym vy budziecie ŭpeŭnienym prychilnikam našaj krainy, vy pierakanajeciesia, što Biełaruś — eŭrapiejskaja dziaržava i naš narod u historyi zrabiŭ vielmi mnoha dla Eŭropy», — skazaŭ A. Łukašenka (cytata BIEŁTA).
T. Beł zasłužyŭ sabie viadomaść jak daradca pa pytańniach PR byłoje premjer-ministarki Vialikaj Brytanii Marharet Tetčer. Hruntujučysia na hetym dośviedzie, jon staŭ pracavać ź «ciažkimi klijentami» — dziejačami i režymami, što majuć reputacyju karumpavanych. Siarod ich byli apalny rasiejski aliharch Barys Bierazoŭski, eks-premjer Tajlandu Taksyn Čynaŭat, adchileny ad ułady pa abvinavačvańniach u karupcyi, a taksama manarchija Saudaŭskaj Arabii.
«Čajm Kamiunikejšn» pracuje i z zvyčajnym biznesam: hetaja kampanija, da prykładu, zajmajecca markietynham Alimpijskich hulniaŭ u Londanie.
Pasłuhi pijar-ahienctva Beła mohuć kaštavać da miljonaŭ i dziasiatkaŭ miljonaŭ dalaraŭ. Pra dziejnaść ahienctva i jahonyja finansavyja vyniki možna pračytać na jaho sajcie.
Dachod «Čajm Kamiunikejšn» u 2006 hodzie skłaŭ 78,8 młn brytanskich funtaŭ (kala $165 młn), prybytak — 12,3 młn funtaŭ.
«My raźličvajem, što vy budziecie pasłom dobraj voli ad samoj Vialikabrytanii, ź jakoj u nas vielmi aktyŭna raźvivajucca adnosiny, niahledziačy na niełady ŭ palityčnaj sfery», — skazaŭ T. Bełu A. Łukašenka na sustrečy, pieradaje ahienctva BIEŁTA.
«Siońnia śviet raźvivajecca takim čynam, što biez taho, čym vy zajmajeciesia, niemahčyma ŭjavić tuju abo inšuju krainu», — adznačyŭ jon. Mienavita hetyja abciakalnyja słovy pra sustreču byli raspaŭjudžanyja pa kanałach dziaržaŭnych ŚMI.
U svaju čarhu łord Beł, sa słovaŭ BIEŁTA, adznačyŭ, što na infarmacyjnych Internet‑resursach vielmi mnoha niaščyrych i kryvadušnych kamentaroŭ adnosna Biełarusi. «Napieradzie surjoznaja rabota, kab heta vypravić», — skazaŭ jon.
Navinu pra sustreču Łukašenki z Bełam źmiaścili mižnarodnyja infarmacyjnyja ahienctvy i papularnyja rasiejskija ŚMI.
