 |
Napiaredadni Dnia biełaruskaj piśmiennaści, jaki budzie śviatkavacca ŭ Barysavie ŭ vieraśni, barysaŭski pasažyrski aŭtapark №3 zrabiŭ reverans dziaržaŭnaj movie.
Na asobnych maršrutach možna pačuć hołas, jaki abjaŭlaje prypynki pa‑biełarusku. Heta hołas Eduarda Dančanki, jaki adpracavaŭ dyktaram na Pieršaj prahramie biełaruskaha radyjo bolš za sorak hadoŭ. Mienčuki štodnia čujuć jahony hołas u staličnym naziemnym transparcie.
Aŭtainfarmatary ŭ Barysavie jość pakul tolki na novych aŭtobusach MAZ. Z pačatku hodu barysaŭcy atrymali ŭžo adzinaccać takich mašyn. Pa słovach kiraŭnika aŭtaparku Alaksandra Škredava, heta dazvoliła poŭnaściu admovicca ad starych aŭtobusaŭ Lvoŭskaha zavodu. Da kanca hodu z haradskich maršrutaŭ majuć źniknuć i «Ikarusy».
