Upieršyniu ŭ honar śviata ź inicyjatyvy palitolaha Ŭładzimiera Padhoła budzie zładžanaja ahulnanacyjanalnaja dyktoŭka.
Prapanujem Vašaj uvazie anonsy niekatorych śviatočnych imprezaŭ.
Šeście ŭ Miensku
Sioleta praviadzieńnie akcyi na Dzień Voli planujecca pa novym maršrucie. Zbor a 18:00 na płoščy Jakuba Kołasa, šeście pa praspekcie Niezaležnaści, vulicach Vaładarskaha i Haradzki Vał. Kančatkovym punktam musić stać pomnik Maksimu Bahdanoviču, što la opery. Ciaham akcyi arhanizatary planujuć uskłaści kvietki da pomnikaŭ Jakuba Kołasa, Janki Kupały, Adama Mickieviča i Maksima Bahdanoviča. Zajaŭnikami vuličnaj akcyi vystupili Alaksandar Milinkievič, Lavon Barščeŭski, Anatol Labiedźka i Mikoła Statkievič. Stanoŭčaha adkazu na svaju zajaŭku z harvykankamu jany nie atrymali, ale Ł. Barščeŭski skazaŭ na prezentacyi knihi I. Surviłły: «Miesca sustrečy źmianić nielha».
Vystava tvoraŭ Jaŭhiena Kulika
19 sakavika, u Pałacy mastactvaŭ (Kazłova, 3) adkryłasia vystava vydatnaha mastaka, aŭtara etałonu hierba «Pahonia» Jaŭhiena Kulika. Kulik (1937—2002) — byŭ vydatnym hrafikam. A jašče hety čałaviek byŭ adnym z arhanizataraŭ ruchu za niezaležnaść Biełarusi, spačatku padpolnaha, jaki z časam vyras u stvareńnie Narodnaha Frontu i abviaščeńnie suverenitetu krainy.
Vystava nazyvajecca «Histaryčnaja hrafika», i na joj budzie pradstaŭlena 80 pracaŭ mastaka. Heta vyjavy staraśvieckich zamkaŭ i siadzib, uvasoblenyja ŭ hraficy postaci kniazioŭ i uładaroŭ Biełarusi, knižnyja ilustracyi.
Arhanizatar vystavy — supołka «Pahonia» Sajuzu mastakoŭ. Aleś Maračkin padkreślivaje, što vystava Kulika pryśviečana 90‑hodździu BNR.
Siabar Ja.Kulika i suaŭtar etałonu «Pahoni» Ŭładzimier Krukoŭski adznačaje, što na vystavie niama słabych i siarednich tvoraŭ. Asablivuju ŭvahu sp.Krukoŭski raić źviarnuć na małaviadomyja šyrokaj publicy ilustracyi da «Słova pra pachod Iharaŭ», a taksama na słynnyja ilustracyi da «Pieśni ab zubru» Mikoły Husoŭskaha. Mienavita na forzacy hetaj knihi ŭ 1980 hodzie ŭpieršyniu ŭ pavajennaj historyi Biełarusi całkam lehalna vialikim nakładam źjaviłasia vyjava «Pahoni».
Futbolny turnir u Bieraści…
U Bieraści 90‑hodździe abviaščeńnia niezaležnaści BNR adznačać turniram pa mini‑futbole. U adboračnym tury ŭziali ŭdzieł siem kamandaŭ — družyny rehijanalnych partyjnych strukturaŭ, niezaležnych prafsajuzaŭ i hramadzkich arhanizacyj. Ahułam — bolš za 60 udzielnikaŭ.
Pa vynikach pieršaha etapu čatyry kamandy 22 sakavika pazmahajucca ŭ finale «Kubka Niezaležnaści», zasnavanaha abłasnym arhkamitetam pa śviatkavańni jubileju.
…i Mahilovie
Adbudziecca turnir pa mini‑futbole siarod amatarskich kamandaŭ horadu. Siarod mieścičaŭ zładziać raspaŭsiud litaratury pra Biełaruskuju Narodnuju Respubliku. Viečaram 25 sakavikabudzie arhanizavana viečaryna z bardaŭskim kancertam dla moładzi.
Mitynh, šeście i kancert u Žodzina
Pradstaŭniki demakratyčnych siłaŭ Žodzina planujuć zładzić śviatočnyja mierapryjemstvy 23 sakavika. Planujecca, što śviatočny mitynh pačniecca a 15‑j hadzinie kala haradzkoha parku adpačynku. Paśla mitynhu adbudziecca śviatočnaje šeście z uskładańniem kvietak da abelisku palehłym hierojam Biełarusi. Uviečary zaplanavany ŭračysty kancert z udziełam biełaruskich muzyčnych hurtoŭ. Na śviata zaprošanyja pradstaŭniki haradzkich uładaŭ.
Radyjo‑viktaryna
Ad 10 da 25 sakavika na sajcie radyjo «Racyja» adbyvajecca viktaryna. Naviedniki sajtu musiać adkazać na nieskładanaje pytańnie pa historyi Biełaruskaj Narodnaj Respubliki, dasłać pieršymi pravilny adkaz na adras redakcyi. Pieramožca vyznačajecca štodnia i atrymlivaje admysłovy pryz — muzyčnuju składanku «NiezaležnyJa» z aŭtohrafami ŭlubionych vykanaŭcaŭ.
Albom pryśviačajecca 90‑ym uhodkam abviaščeńnia BNR i budzie vydadzieny akurat da 25 Sakavika.
Onłajn‑kanferencyja z ajcom Alaksandram Nadsanam
25 Sakavika apostalski vizytatar dla biełarusaŭ‑katalikoŭ zamiežža adkaža on‑łajn na pytańni čytačoŭ sajtu nn.by. Pačatak a 12‑j hadzinie.
«Pahonia»
22 sakavika a 18‑j na siadzibie BNF — adkryćcio jubilejnaj vystavy tvorčaj supołki «Pahonia».
Paetyčny konkurs da 25 Sakavika
Vas jašče nia viedajuć jak vybitnaha tvorcu? Vašych vieršaŭ jašče nie śpiavali, nie drukavali i nie deklamavali pa radyjo? Čas vypraŭlać takuju sytuacyju! Dašlicie piać vieršaŭ na konkurs, pryśviečany 90‑j hadavinie BNR, «Zaklik na Volu» na [email protected] da 1 sakavika i atrymajcie pryz za 1‑ie, 2‑ie ci 3‑ie miesca!
Dasyłajcie vieršy na temu svabody i niezaležnaści (svaboda i jaje symbali, šlachi jaje zdabyćcia, niezaležnaść Biełarusi, baraćba za niezaležnaść u minułym stahodździ i ciapier, Biełaruskaja Narodnaja Respublika i jaje vybitnyja hramadzianie, idei BNR i h.d.). Pieramožcaŭ buduć vyznačać da 25 Sakavika — filozaf Valancin Akudovič, piśmieńnik Uładzimier Arłoŭ, kulturolah Maksim Žbankoŭ, paety Andrej Chadanovič, Džeci, Vika Trenas, Julija Šastak, psycholah Elza Vołat, a taksama pan Skirhajła Palanecki‑Mackievič.
Jubilejnyja paštoŭki
Z nahody 90‑ch uhodkaŭ abviaščeńnia Biełaruskaj Narodnaj Respubliki vyjšli niekalki seryjaŭ jubilejnych kalekcyjnych paštovak. U Horadni miascovyja entuzijasty vypuścili seryju z 13 paštovak pad nazvaj «Horadnia — druhaja stalica BNR». Dziela hetaha byli vykarystanyja znojdzienyja ŭ archivach staryja zdymki, samy stary ź jakich datavany 1909 hodam.
U Miensku vyjšła seryja z troch paštovačak. Na kožnaj vyjaŭlenaja nacyjanalnaja symbolika — hierb «Pahonia» i bieł‑čyrvona‑bieły ściah, himn «My vyjdziem ščylnymi radami». Na adnoj z paštovak — frahment litahrafii V.Staščaniuka z vyjavaj budynku pa vulicy Vaładarskaha, 9 — dzie była abvieščanaja BNR, Dźvie inšyja z vyjavami staroha Miensku i Vilni. Aŭtary dyzajnu j mastackaha azdableńnia — Alaksiej Maračkin, Ihar Maračkin i Mikoła Kupava. Paštoŭki možna znajści na siadzibie BNF.
U Bieraści ž vyjšła paštoŭka z vyjavaju Stanisłava Bułak‑Bałachoviča. Jak viadoma, žaŭniery‑bałachoŭcy spačyvajuć na Harnizonnych mohiłkach horadu nad Buham.
Kniha Pietraškieviča i kalandar ad «Baćkaŭščyny»
Napiaredadni 25 sakavika «Zhurtavańnie biełarusaŭ śvietu «Baćkaŭščyna» i Rada BNR zrabili padarunak amataram historyi, — dva drukavanyja vydańni, źviazanyja z historyjaj Biełaruskaj Narodnaj Respubliki.
Pieršaje — novaja pjesa dramaturha, piśmieńnika, publicysta, zasłužanaha rabotnika kultury Biełarusi, kandydata histaryčnych navuk Alesia Pietraškieviča «Priłaskať i uničtožiť». U hetym tvory aŭtar zakranaje historyju stanaŭleńnia našaj dziaržaŭnaści i raspaviadaje pra toje, jak stvarałasia Biełaruskaja Narodnaja Respublika.
Taksama vyjšaŭ naścienny pierakidny kalandar da 90‑hodździa BNR: «1918—2008». Jon źmiaščaje dvanaccać fotazdymki staršyniaŭ Rady i Ŭradu BNR. Pradmovu da kalendara napisali pieršy namieśnik staršyni Rady BNR Siarhiej Navumčyk i radny BNR, historyk Janka Zaprudnik. Układalniki Aleh i Natalla Hardzijenki.
Kalandar jość va Ŭpravie BNF, siadzibie TBM, Akademknizie, Knihi-poštaj, knižnaj vystavie na Janki Kupały.
23 sakavika -- ahulnanacyjanalnaja dyktoŭka da Dnia Voli
Miensk
Tekst pieršaj biełaruskaj ahulnanacyjanalnaj dyktoŭki, jakaja budzie praciahvacca da 20 chvilin, budzie składacca z frahmentaŭ 2‑j i 3‑j Ustaŭnych Hramat, u jakich havorka idzie ab pravach i svabodach hramadzian Biełarusi, a taksama z adnaho artykułu Ŭsieahulnaj deklaracyi pravoŭ čałavieka.
Ahulnanacyjanalnaja dyktoŭka na siadzibie TBM budzie adbyvacca pavodle nastupnaha hrafiku:
11:00 — Saviecki i Pieršamajski rajony,
12:00 — Leninski, Centralny i Kastryčnicki rajony,
13:00 — Maskoŭski i Frunzienski rajony,
14:00 — Zavodzki i Partyzanski rajony,
15:00 — Mienski rajon i tyja, chto nie paśpieŭ napisać dyktoŭku razam z kalehami sa svaich rajonaŭ,
16:00— tyja, chto nie paśpieŭ napisać dyktoŭku razam z kalehami sa svaich rajonaŭ.
Siabry palityčnych partyj zaprašajucca pisać ahulnanacyjanalnuju dyktoŭku na ofisie BNF (praspekt Mašerava, 8). Dyktoŭka budzie pačynacca ab 11, 12, 13, 14, 15, 16‑j hadzinach.
Horadnia
Ahulnanacyjanalnuju dyktoŭku da 90‑ch uhodkaŭ BNR 22 sakavika projdzie u pamiaškańni Tavarystva biełaruskaj škoły 23 sakavika z 12 da 16 hadzinaŭ. U jakaści tekstu vyrašana ŭziać pradmovu da zbornika Franciška Bahuševiča «Dudka biełaruskaja». Pravodzić dyktoŭku buduć supolna haradzkija arhanizacyi TBŠ i TBM. Usie, chto zachoča pisać jaje, atrymajuć asadki z nadpisam: «Udzielniku ahulnabiełaruskaj dyktoŭki.
Stvorany pryzavy fond: samy małady i samy stary z udzielnikaŭ atrymajuć padarunki.
Viciebsk
17 sakavika na ofisie Partyi BNF u Viciebsku ŭ miežach ahulnanacyjanalnaj akcyi adbyłasia dyktoŭka pa biełaruskaj movie, prymierkavanaja da 90‑hodździa abviaščeńnia BNR. Pryniali ŭdzieł siabr siabry partyi.
Na 20 sakavika zaplanavanaja dyktoŭka siarod siabraŭ «Moładzi BNF».
Padadziena zajaŭka ŭ abłasnuju biblijateku na praviadzieńnie dyktoŭki ŭ biełaruskaj zali 23 sakavika z 14.00 pa 14.30 ad imia abłasnoj arhanizacyi PBNF za podpisam staršyni rady K. Smolikava.
Mahiloŭ
Dyktoŭka maje adbycca 23 sakavika. Daviedki praz teł. 388‑35‑61.
Dyktoŭki na radyjo
Usie tyja, što žadajuć dałučycca da napisańnia ahulnabiełaruskaj dyktoŭki z nahody 90‑ch uhodkaŭ BNR, ale nie viedajuć dzie, mohuć zrabić heta nie vychodziačy z domu. U subotu, 22 sakavika i ŭ niadzielu, 23 sakavika z 12‑j da 13‑j i z 16‑j da 17‑j hadziny ŭ efiry Eŭraradyjo prahučyć dyktoŭka, jakuju buduć pisać biełarusy pa ŭsim śviecie. Słuchać Eŭraradyjo ŭ hety čas možna ŭ internecie na www.euroradio.fm, a taksama na spadarožnikach Hotbird 6 (13° East (11013MHc/N/27500)) i Sirius 4 (5°East (12379.62MHc/H/27500)).
Z 20 da 30 sakavika na sajcie Eŭraradyjo možna budzie spraŭdzić, jak ty napisaŭ dyktoŭku praz admysłovuju formu.
A radyjo «Racyja» daje dyktoŭku 22 sakavika ŭ 14.20 pa biełaruskim časie.
U paniadziełak, 24 sakavika, jany raźmieściać tekst dyktoŭki na sajcie — vy zmožacie pravieryć siabie i pastavić pry žadańni adznaku.
Dzień Voli ŭ zamiežžy
Vilnia: Dzień biełaruskaha adzinstva
90‑ia ŭhodki Biełaruskaj Narodnaj Respubliki sioleta ŭ Vilni buduć adznačacca nie ŭ asobnych supołkach i arhanizacyjach, jak raniej, a jak supolnaje śviata, jak Dzień biełaruskaha jadnańnia. Takim čynam budzie adnoŭlenaja davajennaja tradycyja, kali ŭ dzień 25 sakavika ŭ Vilni prachodzili supolnaja malitva za Biełaruś, uračysty schod, kancert i šeście. U taki dzień zabyvalisia palityčnyja padzieły i asabistyja ambicyi, a ŭsia biełaruskaja hramada pačuvałasia adnym cełym. Hetak miarkujecca zrabić i sioleta.
A 12‑j hadzinie adbudziecca ŭskładańnie vianka da pomnika stvaralnikam BNR bratam Ivanu i Antonu Łuckievičam na mohiłkach Rosa. A 15‑j hadzinie raspačniecca Ŭračysty schod i śviatočny kancert u vilenskim Domie nastaŭnika. Paśla kancertu publika rušyć šeściem da Bazyljanskich muroŭ, dzie a 17.30 u carkvie Śviatoj Trojcy adbudziecca supolnaja malitva za Biełaruś.
Arhanizujuć Dzień biełaruskaha jadnańnia viadomyja vilenskija dziejačy razam sa studentami haradzkich universytetaŭ i prosta nieabyjakavymi da niezaležnaści Biełarusi ludźmi — biznesoŭcami, pedahohami, žurnalistami. Deviz sioletniaha śviata: «Budźma razam u hety dzień!»
Kanferencyja ŭ Prazie
22 sakavika ŭ Prazie pad patranatam ministra zamiežnych spravaŭ Čechii adbudziecca sustreča ŭ honar 90‑hodździa BNR. Z dakładami na joj vystupiać Ivonka Surviłła, Zianon Paźniak i Siarhiej Šupa. Siarod inšych udzielnikaŭ buduć taksama Ŭładzimier Arłoŭ, Pavał Sieviaryniec i Jan Rumł — były dysydent, paśla ministar unutranych spravaŭ Čechii, a ciapier — kiraŭnik inicyjatyvy «Hramadzianskaja Biełaruś».
Achvotnyja paŭdzielničać u sustrečy mohuć kiravać listy na skrynku [email protected].
Biełaruskaja viasna ŭ Kijevie
Z 22 sakavika da 12 krasavika ŭ Kijevie budzie prachodzić festyval sučasnaj biełaruskaj kultury «Biełaruskaja viasna». Festyval adbudziecca u druhi raz, i sioleta budzie ŭklučać vuličny performans, kinapakazy (u tym liku premjernyja), viečar biełaruskaj fłeš‑animacyi, vystavu fatazdymkaŭ i ŚMI Biełarusi, kruhły stoł medyja‑menedžeraŭ, kancert etna‑hurtoŭ i ŭkrainska‑biełaruskuju litaraturnuju viečarynu.
Znakam festyvalu stała bieł‑čyrvona‑biełaja padvodnaja łodka.
Varšava: manifestacyja, festyval i kancert N.R.M.
25 sakavika ŭ polskaj stalicy adbudziecca manifestacyja salidarnaści ź Biełaruśsiu. Akcyja pačniecca ŭ Krakaŭskim pradmieści pobač z pomnikam Kapierniku a 18‑j.
A hurt N.R.M. zajhraje žyvy kancert u etery muzyčnaj studyi Polskaha Radyjo 3 (słuchać možna ŭ internecie pa adrasie http://www.polskieradio.pl/sluchaj/play.aspx?p=r3). Zamovy kvitkoŭ pa varšaŭskim teł. 22‑333‑333. Pačatak a 21:05 pa biełaruskim časie.
30 sakavika ŭ Varšavie adbudziecca kancert «Salidarnyja ź Biełaruśsiu». U kancercie prymuć udzieł jak biełaruskija, tak i polskija zorki roku i pop‑muzyki, jakija vykanajuć viadomyja ŭ svaich krainach hity ŭ novych, dźviuchmoŭnych aranžyroŭkach.
Hałoŭnaja tema sioletniaha kancertu — padtrymka biełaruskaje movy, na jakoj zaśpiavajuć muzyki. Padčas kancertu taksama buduć źbiracca hrošy na padtrymku začynienaha ŭładami Biełarusi Liceju im. Jakuba Kołasa ŭ Miensku.
Kancert budzie tranślavacca telekanałam «Biełsat».
Palityčnaja manifestacyja ŭ Ńju‑Jorku
U subotu, 22 sakavika, pierad budynkam štab‑kvatery Abjadnanych Nacyjaŭ na Manhetanie ŭ Ńju‑Jorku projdzie mitynh, pryśviečany 90‑m uhodkam abviaščeńnia Niezaležnaści Biełaruskaj Narodnaj Respubliki (Aktu 25 Sakavika 1918 hodu).
Mitynh ładzicca Ńju‑Jorskim adździełam BAZA. Pačatak mitynhu — a 11‑j ranicy, na Pieršaj Aveniu pry 43‑j vulicy.
Paśla mitynh planujecca pradoŭžyć pierad Misijaj RB pry AAN.
Śviatočnyja bankiet i kancert u Hyatt Regency u Ńju-Branśviku
Biełaruska‑amerykanskaje zadzinočańnie zaprašaje na Ŭračystuju akademiju, bankiet i kancert, pryśviečanyja 90‑m uhodkam abvieščańnia niezaležnaści Biełaruskaj Narodnaj Respubliki. Impreza adbudziecca ŭ niadzielu, 30 sakavika 2008 h. a 12.30 papaŭdni ŭ Regency Ballroom hatelu Hyatt Regency pa adrasie: 2 Albany Street, New Brunswick, New Jersey 08901.
Pierad imprezaj a 10 ranicy adbudziecca Śviatoje Nabaženstva ŭ Carkvie Śv. Maci Božaje Žyrovickaje, Biełaruskaj Aŭtakiefalnaj Pravasłaŭnaj Carkvy, pa adrasie: 9 River Road, Highland Park, New Jersey.
Kvitki pa zamovie: $50 Darosłym, $40 Studentam.
Kvitki pry dźviarach: $60 darosłym, $50 Studentam.
Prosim zamović kvitki zahadzia, da 25 Sakavika 2008, dasłaŭšy apłatu na adras:
Ms. Luda Bakunovich
37 Sand Hill Road
Kendall Park, NJ 08824
Čeki vypisvać na: Belarusan American Association
Infarmacyja:
Sp. Jurka Azarka 732‑560‑8610
Sp. Vital Zajka 718‑296‑1458.
Taronta i Atava zaprašajuć
Biełarusy Kanady zaprašajuć na śviatočnyja mierapryjemstvy, pryśviečanyja 90‑hodździu BNR u kanadzkich haradach — Taronta i Atava. Tarontaŭcy zaprašajuć adśviatkavać uhodki BNR a 19 hadzinie 22 sakavika ŭ zali Biełaruskaha hramadzka‑relihijnaha centru (524 St. Clarens Avenue). U prahramie viečaryny planujecca Ŭračysty malebien, dakład i śviatočny kancert. Biełarusy Atavy planujuć pravieści ŭračystaść 5 krasavika a 14 hadzinie ŭ City Hall, 110 Laurier Avenue West. U prahramie — śviatočnyja vinšavańni, kancert i viačera.
Londan
Uračysty bankiet z nahody Dnia Voli adbudziecca 28 sakavika, u piatnicu ad 18.00 da 20.00, u adnym z hatelaŭ u centry Londanu. Daviedki pra miesca i ŭmovy praz teł. +020 76 09 13 19 (Siarhiej Piatkievič abo Lola Michaluk).
