 Fota Julii Daraškievič |
23:00 Z Savieckaha RUUS da ludziej, jakija čakali svaich rodnych la hanku, vyjšaŭ milicyjant i paviedamiŭ, što na zatrymanych byli składzienyja pratakoły, i ŭsie zatrymanyja da sudu vypuščanyja nia buduć.
21:40 Jak pieradaŭ Siamion Piečanko z Maskoŭskaha RUUS, suprać usich zatrymanych, u tym liku jaho, składajuć pratakoły pavodle art. 23-34 «Parušeńnie paradku arhanizacyi i praviadzieńnia masavych mierapryjemstvaŭ». Taksama va ŭsich biaruć adbitki palcaŭ i zdymajuć na videa. Varta adznačyć, što na praspekcie zatrymlivali žurnalistaŭ i inšych ŚMI, naprykład, byli na zatrymanyja dva karespandenty ahienctva BiełaPAN. Adnak našych nie adpuścili, tady jak i inšych adpuścili. Zastajecca niajasnym, heta tamu, što karespandenty «NN» byli na piarednim krai, ci pavodle inšaj raznaradki. U RUUSach pabyvaŭ hałoŭny redaktar hazety i namieśnik staršyni Biełaruskaj asacyjacyi žurnalistaŭ. Biezvynikova. Z Centralnaha RUUS vypuścili tolki dvaich žurnalistaŭ litoŭskaha telekanału LTR, zatrymanych padčas akcyi. Papiarednie ŭ ich skanfiksavali kasetu ź videazapisam.
20:53 Pavodle źviestak PC “Viasna”, u Savieckim RUUSie znachodzicca 51 čałaviek, ź ich 12 niepaŭnaletnich, u Maskoŭskim —21, u Partyzanskim — ad 9 da 15.
 Fota Julii Daraškievič |
20:42 Kala RUUSu Savieckaha rajonu sabrałasia bolš za 30 čałaviek rodnych i siabroŭ zatrymanych. Idzie śnieh, mocny viecier, adnak supracoŭniki milicyi sahnali ludziej z hanku. Kali nabliziłasia kalona milicyjantaŭ z ščytami j nakiravałasia ŭ budynak, ludzi pačali plaskać u ładki i kryčać «Słava! Małajcy, chłopcy, dobra papracavali!».
Chutkaja dapamoha zabrała Jarasłavu Hryščeniu, u jaho vyvich plača i hiematoma pad vokam.
20:17 Zatrymany karespandent «Našaj Nivy» Siamion Piečanko zdoleŭ dasłać sms-paviedamleńnie: «Razam sa mnoj całkam vypadkova byli zatrymanyja dźvie žančyny z Harodni, išli ŭ teatar»
20:15 AMAP vyciaśniŭ hrupu z-pad Akademknihi u metro. Akcyja faktyčna zavieršanaja.
20:09 Kalonu spyniŭ i zaviarnuŭ AMAP metraŭ praz 150. Ciapier hrupa ŭ paru socień čałaviek znachodzicca znoŭ la Akademknihi na skryžavańni praspektu j vuł. Surhanava.
20:04 Ad Akademii navuk dźvie dastatkova vialikija hrupy ludziej pa abodvuch chodnikach rušyli ŭ bok płoščy Kalinina.
19:59 Častka ludziej, kala 400 čałaviek, stajać kala kniharni Akademkniha. Z-pad Savieckaha RAUSu paviedamlajuć pra 50 zatrymanych. Da ich vyklikali chutkuju dapamohu.
19:46 AMAP pačynaje adciskać častku ludziej u bok vulicy Surhanava. Na placoŭcy znachodzicca kala 400 čałaviek. Častka razychodzicca i spuskajecca ŭ metro. Milicyja papiaredžvaje pra kryminalnuju adkaznaść. Z palityčnych lideraŭ nichto słova nia braŭ.
 Fota Julii Daraškievič |
19:43 Častka ludziej znachodzicca la Akademii navuk. Častka źbirajecca iści da RUUSu Savieckaha rajonu, čakać vyzvaleńnia źniavolenych. Milicyja pa-raniejšamu papiaredžvaje ab adkaznaści.
19:40 Niekalki dziasiatkaŭ čałaviek było zatrymana na moście cieraź Śvisłač. U Savieckim RUUS znachodziacca bolš za 40 zatrymanych, niekalki dziasiatkaŭ adpraŭleny ŭ addaleny Maskoŭski RUUS. «Mocna źbity, u tym liku pa hałavie, Źmicier Daškievič, mnohija inšyja zatrymanyja źbityja i akryvaŭlenyja» — paviedamlaje charter97.org.
19:25 La Akademii navuk źbirajucca siły milicyi i AMONU. Ludzi pryciskajucca bližej da prajeznaj častki praspektu. Bieśpierapynna hučać papiaredžańni pra niesankcyjanavanaść mitynhu. Častka mitynhoŭcaŭ nakiravałasia da metro "Akademija navuk", častka zastajecca kala Akademii navuk. Moładź abkleiła hukaŭzmacnialnuju mašynu milicyi nalepkami da 90-hodździa BNR.
19:20 Da placoŭki la Akademii navuk, dzie prachodzić mitynh, padjechała mašyna z hukaŭzmacnialnaj aparaturaj, ź jakoj razdajecca papiaredžańnie pra toje, što mitynh u hetym miescy zabaronieny.
19:15 Andrej Lankievič znachodzicca ŭ Savieckim RUUS.
19:02 Praciahvajecca mitynh la Akademii navuk z udziełam kala 2 tysiačaŭ čałaviek. Častka ludziej zmahła dabracca z boku płoščy Pieramohi, siarod ich Lavon Barščeŭski. Vystupoŭcy asabliva źviartajuć uvahu na prablemu palitviaźniaŭ.
19.00 Zatrymany žurnalist «Našaj Nivy» Siamion Piečanko. Jaho viazuć u Maskoŭski RUUS. Miarkujučy pa zatrymańniach žurnalistaŭ, ahulnaja kolkaść zatrymanych moža vymiaracca dziasiatkami.
18:57 Da mostu cieraź Śvisłač padjechali aŭtobusy, ź jakich źjavilisia specnazaŭcy ŭ šlemach. Jany adciaśniajuć ludziej ad mostu, u bok płoščy Pieramohi.
 |
18:53 Uvachod na most cieraź Śvisłač zablakavany kardonam. La jaho hurtujucca ludzi.
18:44 Ludzi, što nia trapili ŭ ačapleńnie, rušyli da płoščy Pieramohi pa chodnikach. Pa pravym baku idzie paŭtary sotni ludziej. Ad praspektu ich supravadžaje šerah specnazaŭcaŭ. Pa levym baku taksama ruchajucca niekalki dziasiatkaŭ čałaviek ź ściahami Eŭraźviazu.
18:40 Zatrymali fotakarespandenta “NN” Andreja Lankieviča. Chartyja-97: «jaho paciahnuli ŭ aŭtazak z akryvaŭlenym tvaram».
 |
18:40 Hrupa ludziej na skryžavańni praspektu z Kazłova i Varvašeni pasprabavała vyjści na praspekt. Zaraz na rahu z boku vuł. Varvašeni staić kala sotni čałaviek ź ściahami. Mašyny, jakija jeduć praspektam syhnalać, vitajučy demanstrantaŭ.
18:38 La Akademii navuk tym časam pačaŭsia mitynh. Pračytaŭ malitvu Akałovič. Vystupiŭ Siŭčyk, nahadaŭ, što siońnia dva hady tamu byŭ aryštavany Kazulin, zhadaŭ inšych palitviaźniaŭ, jakija siońnia za kratami.
 Fota Julii Daraškievič |
18:35 Z boku Pałacu mastactvaŭ źjavilisia aŭtazaki, pačalisia zatrymańni.
18:33 Milicyjanty pieradyślakujucca pa paralelnych praspektu vulicach, novy kardon zablakavaŭ pierachod praz vuł. Kazłova u bok płoščy Pieramohi. Ludziej valać na ziamlu, adbirajuć ściahi.
 Fota Julii Daraškievič |
18:30 Hrupa z symbolikaj AHP sprabavała pierajści praspekt. Niekalkim heta ŭdałosia. Astatnich zaviarnuli milicyjanty. Ciapier kalona miž płoščami Jakuba Kołasa i Pieramohi pabitaja milicejskimi kardonami na try častki. Milicyja źbivaje ludziej, vychoplivaje z ruk nacyjanalnyja ściahi.
 Fota Julii Daraškievič |
18:29 Na placoŭcy kala AN kolkaść ludziej dasiahnuła 2000 tysiač čałaviek. Vystupiŭ Mikoła Statkievič, zajaviŭ, što ni na jaki Banhałor nichto nia pojdzie, a mitynh budzie tut, la Akademii navuk.
18:26 Z arki la prypynku "vulica Kazłova" źjaviłasia ačapleńnie. Pavodle słovaŭ pamočnika Milinkieviča Alesia Łahvinca, Alaksandar Milinkievič zastaŭsia ŭ hrupie ludziej miž dvuma ačapleńniami. Tuju hrupu pačynajuć zahaniać u padziemny pierachod, što viadzie na druhi bok praspektu.
18:22 Kalona ŭ paŭtary tysiačy čałaviek padychodzić da Akademii navuk. Bolej sprobaŭ prarvacca na Jakuba Kołasa nie było.
 Fota Julii Daraškievič |
18:21 Kalonie, jakaja išła ad płoščy Jakuba Kołasa da płoščy Pieramohi, nie dali złučycca ź ludźmi, jakija prarvalisia da skryžavańnia praspektu z vuł.Kazłova. Ludzi spynilisia i čakajuć, skandujučy "Žyvie Biełaruś". Kala Akademii milicyi na praspekcie źjaviłasia vialikaja raściažka z nadpisam "Sa śviatam niezaležnaści!" i symbolikaj AHP. La jaje sabrałasia niekalki dziasiatkaŭ čałaviek.
18:17 Milicyja i AMAP adšturchoŭvajuć ludziej z paŭnočnaha boku płoščy nazad, u bok Akademii navuk. Manifestanty kidajucca śniažkami i kryčać «fašysty».
18.15 Z paŭdniovaha boku adbyłosia sutyknieńnie ź milicyjaj la kramy «Optyka». Niekalki čałaviek z pabitymi tvarami.
18:14 Kalona ad vulicy Čyrvonazornaj prarvałasia na praspekt i idzie ŭ bok płoščy Pieramohi. Na rahu vulicy Kazłova da jaje dałučyłasia jašče hrupa ludziej ź ściahami.
18:12 Sieviaryniec pavioŭ ludziej na pieršy kardon z pary dziasiatkaŭ milicyjantaŭ. Jon za 150 metraŭ ad płoščy Jakuba Kołasa na pr. Niezaležnaści. Jon byŭ projdzieny davoli lohka. Kolkaść udzielnikaŭ akcyi pavialičyłasia da 700-800 čałaviek.
18:09 Šturchanina z boku płoščy Jakuba Kołasa, milicyja sprabuje blakavać natoŭp, pačalisia lakalnyja sutyčki, častcy ludziej udałosia prarvacca na praspekt.
18:06 Milicyja sprabuje skiravać ludziej z praspektu, u arku na vulicu Čyrvanazornuju. Uvachody ŭ dvary pakul nie ačeplenyja.
18:02 Na praspekcie Niezaležnaści, kala paštovaha adździaleńnia, što ŭ domie № 46, farmujecca kalona, jość niekalki sotniaŭ čałaviek. Viadzie jaje Lavon Barščeŭski. Jon pavinšavaŭ usich i zaklikaŭ iści ŭ bok płoščy Pieramohi. Uzdoŭž darohi šychtujecca AMAP.
Pahladzieć repartaž
na mapie Google'a 
18:00 Kala kaviarni «Lido» 100-150 čałaviek. Milicyjanty nie puskajuć na płošču i vybačajucca za časovyja niazručnaści. Uźniaty pieršy ściah. Ludzi vyrašajuć iści ŭ bok Akademii navuk.
17:40 Płošča Jakuba Kołasa pierakryta. Hramadzki transpart nie spyniajecca.
Turnikiety vystaŭlenyja kala kramy Lanok, kala muzeju sučasnaha mastactva, pierad vulicaj Hikały, usie ŭvachody ŭ dvary, taksama vychady na vulicy Charužaj, Kołasa, Hikały, bulvar Mulavina.
Najbolš narodu na hety čas na rahu Čyrvonazornaj i Niezaležnaści, a taksama kala kaviarni «Lido».
