 |
Sakrety sumoŭja raskryła abituryjentam namieśnica dekana fakultetu žurnalistyki BDU Volha Samusievič. Pa jaje słovach, hałoŭnaja meta testavańnia — daviedacca, ci patrebna abituryjentu žurnalisckaja adukacyja, ci mienavita toje jon vybraŭ dla siabie. A paśla dadała: biaź viedańnia asnoŭnych prablemaŭ biełaruskaha hramadztva, a taksama hieapalityčnaj sytuacyi test nia zdać.
Sustreča pradstaŭnikoŭ žurfaku z budučymi studentami prajšła ŭ Bieraściejskim harvykankamie. Heta byŭ dadatak da «kruhłaha stała», jaki ładzili abłasnyja i haradzkija ŭłady z pradstaŭnikami Mininfarmacyi, vykładčykami žurfaku j žurnalistami hazety «SB» na čale z redaktaram Paŭłam Jakubovičam.
Daviedacca, što ich čakaje na sumoŭi, pryjšło kala dvaccaci vypusknikoŭ škoł. Chtości navat z baćkami. Pamiž saboj moładź abmiarkoŭvała, što na sumoŭi treba bić siabie ŭ hrudzi j raspaviadać, što «ŭ beeresemie ja byŭ pieršym aktyvistam».
Ale pra hramadzkija arhanizacyi hutarki nie viałosia. Pa słovach Volhi Samusievič, kali abituryjent nia zmoža nazvać vydańnie, jakoje ŭznačalvaje Jakubovič, ci nie nazavie proźvišča hałoŭnaha redaktara «asnoŭnaj hazety krainy «Sovietskoj Biełoruśsii», to daviedku pra paśpiachovuju zdaču testavańnia nie atrymaje.
— Kožny budučy žurnalist akramia publikacyj musić viedać, jakija isnujuć dziciačyja ci litaraturna‑mastackija redakcyi, — napałochała prysutnych namieśnica dekana. — Taksama treba mieć dośvied nakont palityčnaj sytuacyi ŭ śviecie i viedać, ź jakimi prablemami zaraz sutykajecca biełaruskaje hramadztva i dziaržava.
