Ułady, jak pradčuvali, što chłopca pryjdzie padtrymać bahata narodu i vydzielili samuju vialikuju zalu sudu: na 70 čałaviek. Niahledziačy na heta, usie achvotnyja nie źmiaścilisia. Rešta sočyć za padziejami na vulicy. U zali -- Alaksandar Milinkievič, Vincuk Viačorka, Lavon Barščeŭski, Mikoła Statkievič.
Spravu razhladaje sudździa Alena Iljina.
Praŭda, zabaranili fota i videazdymku ŭ sudzie, ale pišučym žurnalistam pieraškodam nia čyniać. Achovu niasuć kala dziesiaci amapaŭcaŭ. Andrej siadzić u sudovaj kletcy, pastryžany, nie vyhladaje poŭnaściu zdarovym čałaviekam. Na im apranuta majka Maładoha Frontu: «Dzie duch Haspodni tam svaboda». Na pytańni adkazvaje pa-rasiejsku.
Źjaviŭsia paciarpieły -- Ihar Syčoŭ.
14:35 Adkakat Andreja Kima sp-nia Sidarenka zajaviła chadajnictva ab źmianieńni miery strymańnia padabaronnaha: z utrymańnia pad vartaj pad vyzvaleńnie pad załoh. Paručalnikami vystupajuć maci Andreja -- Taciana Kim i pradprymalnik Ihar Lednik.
Ihar Syčoŭ skazaŭ, što nia suprać.
Dziaržaŭny abvinavaŭca Łukjanaŭ zajaviŭ chadajnictva ab złučeńni dvuch kryminalnych spraŭ, zaviedzienych u dačynieńni da Andreja Kima, u tym liku i spravy pa vynikach mitynhu pradprymalnikaŭ 21 studzienia. Advakatka suprać hetaha, Ihar Syčoŭ nia suprać.
14:42 Sudździa vyjšła z zali sudu dla vyniasieńnia rašeńnia nakont abjadnańnia spraŭ u adnu.
Miž inšym, troje z zajaŭlenych śviedkaŭ nie źjavilisia: Karziuk (načalnik mienskaha DAI?) i Bliščoŭ, pryjšoŭ śviedka Syrec.
14:44 Tym časam ludzi, što stajać pad voknami sudu (usiaho kala 20 čałaviek), raściahnuli raściažku "Svabodu Andreju Kimu" i taksama ŭ hołas patrabujuć adpuścić chłopca. Da pratestujučych na vulicy spuścilisia amapaŭcy.
14:50 Specnazaŭcy pasprabavali adabrać raściažku, ale ničoha nie atrymałasia. Tady jany zapatrabavali zharnuć jaje, inakš usich pavinciać. Moładź adyšłasia nie niekalki mietraŭ ad budynku sudu ŭ bok stadyjona "Dynama" i staić, trymajučy nad hałavoj partrety A. Kima, kab heta było bačna z zali sudu. Moładź skanduje: "Svabodu Andreju Kimu", "Žyvie Biełaruś!", "Moładzi svabodu"
Specnazaŭcy ŭ spravu nie ŭmiešvajucca.
Z tych, chto staić unizie: Anatol Labiedźka, Źmicier Chviedaruk, Ihar Rynkievič.
14:53 Ludziej vyciaśniajuć z boku prystupak sudu ŭ rajon vulicy Lenina. Sutyčka adbyłasia paśla taho, jak sivy čałaviek u cyvilnym addaŭ zahad.
Tym časam u zali sudu čuvać usio, što adbyvajecca na vulicy.
15:05 Dźvie kryminalnyja spravy ŭ dačynieńni da Andreja Kima abjadnali, ale mieru strymańnia nie źmianili.
U suviazi z hetym razhlad sudovaj spravy prypyniajecca. Jak patłumačyła sudździa, nieabchodna vypisać paviestki ŭ sud, abvinavačanym pa spravie 10 studzienia. Tamu praciah sudovaj spravy ŭ dačynieńni da Andreja Kima adbudziecca nie raniej, čym praź piać dzion.
***
Andreja Kima zatrymali 21 studzienia padčas mitynhu pradprymalnikaŭ. Spačatku jaho aryštavali na 10 sutak za ŭdzieł u niesankcyjanavanaj akcyi, a paśla źmiaścili ŭ śledčy izalatar na Vaładarskaha.
Andreja abvinavacili ŭ parušeńni art. 364 KK RB («hvałt, albo pahroza hvałtu ŭ adnosinach da rabotnika milicyi»). Pavodle hetaha artykułu chłopcu pahražaje da šaści hadoŭ turmy.
Za kratami Kimu spoŭniłasia 22 hady. Varta nahadać, što suprać Andreja padčas jahonaha znachodžańnia ŭ turmie zaviedzienaja druhaja kryminalnaja sprava za vuličnuju akcyju padčas mitynhu pradprymalnikaŭ 10 studzienia.