Biełsat u efiry ŭžo bolš za 100 dzion. Čas zrabić pieršyja acenki, što atrymałasia, a što nie. Kanał tolki pačynaje pracavać, a ŭ presie ŭžo davoli šmat infarmacyi pra mahčymaje zakryćcio Biełsata. Nazyvajecca navat kankretny čas — vierasień. Ci sapraŭdy jość pahroza, što ŭvosień Biełsat pierastanie isnavać?
A. Ramašeŭskaja: Heta nieparazumieńnie. Ja zaŭvažyła, što infarmacyja, jakaja źjaŭlajecca ŭ polskich ŚMI, u čatyry razy macniejšym recham adbivajecca ŭ biełaruskich miedyjach. Dosyć časta hetaja infarmacyja skažajecca. Adkul uziaŭsia hety vierasień? Na dadzieny momant my pravodzim pieramovy z MZS nakont datacyj na biahučy hod. Naša arhumientacyja była nastupnaj: my chočam rabić dobry kanał, a kali rabić jaho za prapanavanyja nam hrošy, to da vieraśnia jany skončacca, ale nichto nie maje namieru ŭ vieraśni začyniać kanał, heta było hipatetyčnaje śćvierdžańnie.
Paśla incydentu z žurnalistami 27 sakavika źjaviłasia infarmacyja, što MZS kampiensuje straty kanału, paniesienyja ŭ vyniku kanfiskacyi aparatury. Havorka viałasia byccam by pra 70 tys. złotych, ale adnačasova MZS źbiraŭsia źmienšyć finansavańnie Biełsata na 3 młn. złotych.
A. Ramašeŭskaja: Niekalki dzion tamu ja razmaŭlała ź ministram Radasłavam Sikorskim, i ŭ mianie takoje ŭražańnie, što MZS naadvarot źbirajecca pavialičyć finansavańnie. Zdareńnie z žurnalistami dało zrazumieć polskamu MZS, nakolki važnaj źjaŭlajecca hetaja inicyjatyva. Ja skažu navat bolš: heta stanoŭča paŭpłyvaje na finansavańnie kanału. Hrošy za skanfiskavanuju aparaturu, heta całkam inšaja sprava. Hetyja srodki daduć nam fondy.
A što nakont 3 młn. jeŭraŭ, jakija MZS byccam by niedapłocić na hety hod?
A. Ramašeŭskaja: Jak ja ŭžo kazała, pieramovy jašče nie skončylisia, tamu i niama kankretnaj sumy, jakuju nam pradstaviać. My viedajem, kolki nam patrebna na vytvorčaść vartasnych pieradač, kali my nie atrymajem dastatkovuju sumu, dyk heta nie dazvolić rabić nam šmat ułasnych pieradač. Ale zakryćcio kanału nam nie pahražaje. A sama suma — heta pradmiet dyskusii, ci atrymajem my na 3 młn. bolš ci mienš. Nichto ŭ nas nie zabiraŭ 3 młn., bo pakul jany nie pryznanyja aficyjna.
A jak nakont finansavańnia na nastupnyja hady. Ci jość peŭnaść, što MZS nie začynić hety prajekt?
A. Ramašeŭskaja: Pakul my razmaŭlajem pra hety hod, ale ja pierakananaja, što MZS nie vykinie ŭ bałota tyja miljony, jakija ŭžo pajšli na Biełsat. Naš kanał — heta davoli stabilnaja inicyjatyva.
Ci dałučacca da finansavańnia kanału zamiežnyja struktury, ZŠA, Jeŭraźviaz?
A. Ramašeŭskaja: Ščyra pryznajusia — my spadziavalisia, što heta sprava pojdzie chutčej. Nieŭzabavie my padpišam damovu z ZŠA. Heta, praŭda, nievialikija hrošy, 200 tys. dalaraŭ, ale, naturalna, jany nam dapamohuć. Dapamahajuć nam Vialikabrytanija i Litva. Dva dni tamu ja razmaŭlała sa šviedskim pasłom, jaki sam zaprapanavaŭ dapamohu. Ja ŭpeŭnienaja, što sprava pojdzie paśpiachova, ale pakul praces dosyć pavolny. Heta vielizarny prajekt, jaki patrabuje surjoznych rašeńniaŭ ŭradaŭ jeŭrapiejskich dziaržavaŭ. My padpisvajem taksama damovu ź niamieckim kanałam Dojče Vele, jaki biaspłatna budzie pradstaŭlać nam niekatoryja svaje prahramy.
Samuju vialikuju chvalu abureńnia na Biełarusi vyklikaŭ toj fakt, što kanał da hetaha času nie pierajšoŭ na spadarožnik Sirius. U čym prablema i kali čakajecca źmiena spadarožnika?
A. Ramašeŭskaja: Pra hetuju spravu ja pračytała davoli šmat hłupstvaŭ, razam z vydumkami spadara Zimoŭskaha. Viaducca biznes-pieramovy. Polskaje hramadskaje telebačańnie TVP pavinna padpisać damoŭlenaść z pryvatnaj firmaj nakont šmathadovaha vykarystańnia spadarožnika. U suviazi z hetym nam nieabyjakava, jakoj budzie heta ŭmova. Da minułaha tydnia adbyvalisia pieramovy z pradstaŭnikami firmy-ŭładalnika Siriusa, i bolšaść pieraškod pieraadolenaja. Na dadzieny momant my zaviaršajem farmulavać damovu ŭ jaje kančatkovym vyhladzie. Spadziajusia, što vielmi chutka my jaje padpišam. Kali dakładna? Ciažka skazać, bo paźniej cytaty maich słovaŭ buduć raz-poraz uźnikać u vypadku spaźnieńnia. Šmathadovy kantrakt, jaki kaštuje bolš za 1 młn. jeŭraŭ, nielha padpisać za tydzień. Heta narmalny praces.
Ci sočycie vy za reakcyjaj hledačoŭ, za krytykaj kanału? Ci viadoma, jakaja aŭdytoryja Biełsata, i jak ludzi ŭsprymajuć pradukcyju kanału?
A. Ramašeŭskaja: Naturalna, ja prahladaju naš forum, forumy na inšych staronkach i partałach, a taksama čytaju biełaruskuju presu. Viedajecie, usich nielha zadavolić. Adzin kaža, što cikava, inšamu nie padabajecca. Heta pryncyp telebačańnia, i my nie vyklučeńnie. My majem płany pa madyfikacyi niekatorych pieradač, jak naprykład East Front. Nami źniatyja dobryja dakumientalnyja filmy, zdymajucca čarhovyja. My starajemsia rabić dobryja publicystyčnyja pieradačy, časam našy supracoŭniki robiać pamyłki, ale 100 dzion dla telebačańnia — niašmat. Viadomy polski kanał TVN24 vychodziŭ na pramuju darohu ceły hod, a ciapier heta samy papularny infarmacyjny polski telekanał. Uvosień, kali my ŭžo budziem viaščać na spadarožniku Sirius, płanujem pravieści daśledavańnie. Pakul takija daśledavańni nie majuć sensu, ciapier my možam pravieści tak zvany name recognition, kab pravieryć, kolki ludziej viedaje, što my ŭvohule isnujem.
Šmat krytyki jość nakont internet-staronki. Hledačy skardziacca na toje, što niama internet-viaščańnia i videaarchivu.
A. Ramašeŭskaja: Internet-viaščańnia my pakul nie płanujem, a voś videaarchiŭ samych papularnych pieradač źjavicca nieŭzabavie. Praz paŭtara miesiaca našu staronku čakajuć pieramieny, źjavicca šmat cikavych praduktaŭ.
Jakuju adznaku Vy b mahli pastavić Biełsatu za hetyja 100 dzion viaščańnia?
A. Ramašeŭskaja: 4+.
