Viedaju, što ŭ śviežych tablicach NISEPD mnohija najpierš šukajuć rejtynh aficyjnaha kiraŭnika. Nu i što vy dumajecie? Za ciopłuju zimu hety pakazčyk navat trochi padros. A taksama — zaŭvažna dadałosia tych, chto ličyć, što pa vialikim rachunku ŭ našaj biełaruskaj chatačcy "paradak idzieć".
Šmat chto z apanentaŭ režymu mierkavaŭ: skasavańnie lhotaŭ, skačok inflacyi, presinh suprać drobnych pradprymalnikaŭ padahrejuć pratestavyja nastroi dy, adpaviedna, padsiakuć davier da viarchoŭ. Ale ŭ sakaviku elektaralny rejtynh Łukašenki skłaŭ 42,5% —na 2,6 punktu bolej, čym u śniežni letaś.
Paboleła — ad 41,2% da 50,2% — suajčyńnikaŭ, pierakananych, što "stan rečaŭ u našaj krainie raźvivajecca ŭ pravilnym kirunku" (darujcie, heta tradycyjnaja dubovaja farmuloŭka ankiety). Uvohule z nadychodam viasny, jak adznačajuć sacyjolahi, dadałosia sacyjalnaha aptymizmu. "Prajšła zima, nastała leta, dyk dziakuj partyi za heta" :)
Karaciej, biełarusy znoŭ prahłynuli niahody, pryciarpielisia i navat paviesialeli, kali pryhreła soniejka. Jak u tym starym anekdocie pra ćvik u kreśle: a mo' tak i treba? Nu prosta idealnaja nacyja dla roznaha kštałtu sacyjalnych eksperymentaŭ!
I voś što cikava. Z adnaho boku, paspality lud u značnaj stupieni padzialaje pohlady palityčnaj apazycyi ŭ tych ci inšych asobna ŭziatych pytańniach. Inšym razam hetaja stupień navat niečakana značnaja. Chto b moh padumać: niahledziačy na šmathadovaje zambavańnie, 46,4% miarkujuć, što 90-ja ŭhodki BNR jość "vialikaj padziejaj, jakuju varta adznačyć", i tolki 28,6% ličać jaje niaznačnaj. Dadamo: apytańnie ładziłasia 3—13 sakavika, jašče da taho, jak temu BNR dastatkova ŭzvažana padali niekatoryja dziaržaŭnyja medyi.
A voś vam, naadvarot, čakanaja ličba: 75,9% nie uchvalajuć skaračeńnie lhotaŭ. Dalej: praciŭnikaŭ pabudovy AES bolej, čym prychilnikaŭ. Lvinaja dola respandentaŭ (80,3%) pierakananyja, što medyi musiać vykazvać intaresy hramadztva, a nie dziaržavy. Značnaj vyhladaje dola prychilnikaŭ toha ci inšaha varyjantu biełarusizacyi. 51,2% upeŭnienyja, što na vybarach majuć miesca falsyfikacyi. Balšynia padtrymlivaje mierkavańnie, što ŭłučeńnie ŭ skład vybarkamaŭ pradstaŭnikoŭ palityčnych partyj dy kandydataŭ, dazvoł naziralnikam pieraličvać biuleteni, skarystańnie prazrystych skryniaŭ i h.d. — karaciej, kali kazać naŭprost, realizacyja prapanoŭ ADS dy Zachadu zrobić vybary bolej spraviadlivymi.
Zdavałasia b, takaja ŭdziačnaja hleba dziela ščyravańnia palityčnaj apazycyi! Ale… Ideju vuličnaha šeścia 25 sakavika ŭchvalaje tolki tracina respandentaŭ. Rejtynhi ŭsich apazycyjnych palitykaŭ nižejšyja za 10% (Milinkievič — 8,8%, Kazulin — 5,2%, astatnija — u miežach statystyčnaj pamyłki). Elektarat bolej achvotna prahałasuje na vybarach u parlament za kiraŭnika dziaržaŭnaha pradpryjemstva ci navat ciapierašniaha deputata, čym za lidera apazycyjnaj partyi (taki abstraktny lider nabiraje ŭ apytańni tolki 11,1%). Da vuličnaha pratestu suprać falsyfikacyi vybaraŭ hatovyja 6,5% (heta na słovach, na praktycy nie nabiarecca j adnaho adsotku). U toj ža čas 38,4% ničoha nia stali b rabić, a 35,6% vybrali varyjant "abaviazkova raspavioŭ by svaim znajomym pra falsyfikacyju".
Karaciej, stary fenomen kuchonnaj apazycyi, ci duli ŭ kišeni. Pryčym dulu šmat chto pakazvaje jak uładzie, tak i jaje tytulnym apanentam. Z sacyjalahičnych tablicaŭ vynikaje: nia toje što našy suajčyńniki idealizujuć kiroŭnuju viarchoŭku (naprykład, acenki jaje ekanamičnaha ščyravańnia vielmi strymanyja), ale ž nadta vysoka staviać słavutuju stabilnaść. Hary jany haram, lubyja perturbacyi! Biełarusy pa-raniejšamu addajuć pieravahu sinicy ŭ ruce pierad žoravam u niebie.
ZY. Zychodziačy z dośviedu abmierkavańniaŭ sacyjalahičnaje temy, adrazu rablu remarku, što nie liču apytańni dy kamentary NISEPD niejkaj apryjornaj iścinaj. Adnak heta adzinaja niezaležnaja sacyjalahičnaja instytucyja, jakaja štokvartalna daje vyniki nacyjanalnych apytańniaŭ u adkrytym dostupie.
