Abviaščeńnie prysudu Alaksieju Janušeŭskamu adkłali na sieradu na 10.30, i chłopca vyzvalili
17:45 Sud vynies rašeńnie: 50 bazavych vieličyniaŭ štrafu (1 młn 750 tys. rubloŭ), Rašeńnie moža być abskaradžanaje ciaham dziesiaci dzion u Viciebskim abłasnym sudzie.
 Alaksiej Janušeŭski, fota mabilnym telefonam Paŭła Batujeva |
17:10 Tym časam sudzili Alaksieja Janušeŭskaha. Jaho abvinavacili pavodle art. 23.34 Kodeksu ab administracyjnych pravaparušeńniach (parušeńnie paradku arhanizacyi abo praviadzieńnia masavaha mierapryjemstva abo pikietavańnia). Prysud budzie taksama abvieščany a 17:30.
Nastroj u Alaksieja pahany, kaža, što, napeŭna, daduć sutki.
Nahadajem, što chłopiec byŭ zatrymany ranicaj padčas akcyi, praviedzienaj u znak salidarnaści z Kasiaj Sałaŭjovaj.
16:47. Stała viadoma, što zaŭtra, a 17-j, Kasia vyklikana na dopyt u milicyju (staršy daznavaciel -- Aficeraŭ).
Pavał Sieviaryniec u hutarcy z karespandentam nn.by vykazaŭ zdahadku, što ŭ dačynieńni da dziaŭčyny adnoŭlena kryminalnaja sprava pavodle art. 370 KK RB (źniavaha dziaržaŭnych symbalaŭ).
Nahadajem, što 30 kastryčnika 2007 h. nieviadomyja sarvali čyrvona-zialony ściah z dachu Połackaj prakuratury, padziorli jaho na častki i pryviazali da dźviarej. Była zaviedziena kryminalnaja sprava pavodle art. 370, Kasia prachodziła pa joj jak padazravanaja, ale potym spravu prypynili.
16:05 Pavodle papiaredniaj infarmacyi, pavieźli sudzić Alaksieja Janušeŭskaha, zatrymanaha siońnia la ścienaŭ haradzkoha suda.
13.15 U pracesie abjaŭleny prypynak da viečaru. Prysud budzie abvieščany ŭ 17:30.
Skazała apošniaje słova Kaciaryna Sałaŭjova. Vystupili prakuror i advakat.
U svaim apošnim słovie Kaciaryna Sałaŭjova siarod inšaha zajaviła:
«Što da taho, ci pryznaju ja svaju vinu, to kali žadańnie adradzić biełaruskuju movu, kulturu, stvaryć u krainie rynkavuju ekanomiku i kab prachodzili sumlennyja vybary, ličyć kryminalnym parušeńniem, to ja sapraŭdy vinavataja i pryznaju svaju vinu».
Spn. Kaciaryna taksama dadała, što arhanizacyja, jakaja vyznaje chryścijanskija kaštoŭnaści, nia moža nasić razburalny charakatar.
Prakuror Kołasava skazała, što dziejnaść padsudnaj u niezarehistravanaj arhanizacyi całkam dakazanaja, što padsudnaja svaju vinu pryznała, paćvierdziła, što ź listapada 2007 pa siońniašni dzień źjaŭlajecca siabram «Maładoha frontu», viedaje pra mety i zadačy arhanizacyi, a taksama pryznała, što raspaŭsiudžvała litaraturu, dzie byli paznačanyja jejnyja kantakty, i vykazvaje niazhodu tolki ź jurydyčnaj častkaj artykułu.
Źmiakčalnaj akaličnaściu prakuror nazvała pryznańnie padsudnaj svajoj viny, a taksama toje, što jana ŭpieršyniu pryciahvajecca da kryminalnaj adkaznaści.
U jakaści pakarańnia prakuror Kołasava zapatrabavała pryznačyć Sałaŭjovaj 200 bazavych vieličyń štrafu (7 młn rubloŭ).
U svaim vystupie adkavat Alaksandar Halijeŭ skazaŭ, što dziejańni, jakija padpadajuć pad artykuł, pa jakim sudziać Sałaŭjovu, nie niasuć hramadzkaj niebiaśpieki. Jon adciemiŭ, što «Małady front» nieadnarazova padavaŭ u Ministerstva justycyi dakumenty na rehistracyju, ale jamu było admoŭlena biez padstavaŭ.
Advakat źviarnuŭ uvahu na toje, što ŭ statucie arhanizacyi niama destruktyŭnych pałažeńniaŭ, a tolki intaresy nacyjanalnaha adradžeńnia.
Kamentujučy kanfiskavanyja tekstavyja materyjały, Halijeŭ zaznačyŭ:
«Nam nie pastavili ŭ vinu tolki paeziju Bykava».
Pry kancy, jon padkreśliŭ, što cikavaść da hetaj spravy prajaŭlaje mnostva ludziej, i vyniasieńnie prysudu budzie śviedčyć pra demakratyčnuju, nacyjanalnuju i maralnuju śpiełaść hramadztva.
Što da zhadanaha hrafici, jaki Sałaŭjova nanosiła na budynak harvykankamu, to advakat źviarnuŭ uvahu, što padsudnaja ŭžo była pakaranaja za hetaje parušeńnie administracyjnaj adkaznaściu, a karać za adno i toje ž parušeńnie dvojčy niamožna.
Halijeŭ prasiŭ sud, kali toj vyrašć vynieści abvinavaŭčy prysud, nie karać dziaŭčynu nijakim čynam.
U časie praviadzieńnia sudovaha pasiedžańnia pad voknami sudu prachodziła akcyja z udziełam pary dziasiatkaŭ čałaviek.
Sabranyja razharnuli raściažku z nadpisam «Małady front». Milicyjaj byŭ zatrymany adzin z udzielnikaŭ akcyi — Alaksiej Janušeŭski.
12.30 Paśla karotkaha pierapynku, abvieščanaha ŭ pasiedžańni, pačnucca sudovyja sprečki.
Da hetaha času apytali śviedak: dźviuch studentak, jakija razam ź joj žyli ŭ pakoi, i dziažurnuju internatu.
Abvinavačvańni hruntujucca na pieratrusie ŭ internacie, kanfiskavanych tam ulotkach, hazetach, rukapisnym dziońniku.
U pryvatnym dziońniku spn. Sałaŭjovaj miascovyja syščyki znajšli, miž inšaha, zapis: «Ja zrablu ŭsio mahčymaje, kab źniščyć hety režym».
11:30 Pačaŭsia dopyt śviedkaŭ
11:05 U vyhladzie vyklučeńnia ŭ zalu puścili Łuisa Kryšaka, pieršaha sakratara amerykanskaha pasolstva, a taksama baćkoŭ Sałaŭjovaj.
U zali taksama znachodziacca Alaksandar Milinkievič, Ina Kulej, pravaabaroncy Aleś Bialacki i Valancin Stefanovič. Usiaho — 12 čałaviek.
10:40 Pierad pačatkam pasiedžańnia milicyjant abvieściŭ sabranym, što sudździa Kaleśnik šukaje bolšuju zalu.
Adnak a 10:30 praces biez dadakovaha abjaŭleńnia pačaŭsia ŭ małoj zali, raźličanaj na 15 čałaviek. U vyniku na jaho nia zmoh patrapić nia toje što nivodny žurnalist, ale navat maci padsudnaj Alena Sałaŭjova.
Kaciarynu Sałaŭjovu abvinavačvajuć u parušeńni art. 193‑1 Kryminalnaha kodeksu RB «Udzieł u niezarehistravanaj arhanizacyi» («Małady front»).
Pavodle hetaha artykułu ŭžo sudzili dziesiać «maładafrontaŭcaŭ», ale tolki Źmicier Daškievič trapiŭ za kraty, astatnija abmiažoŭvalisia štrafami i papiaredžańniami. Maksymalnaja sankcyja pa artykule 193 — dva hady turmy.
Pieršapačatkova sud nad Sałaŭjovaj musiŭ adbycca 27 sakavika, ale byŭ pieraniesieny amal na dva tydni. Sprava ŭ tym, što 25 Sakavika padčas śviatkavańnia ŭ Miensku Dnia Voli Kasia była zatrymanaja i asudžanaja na 5 sutak aryštu. Sud byŭ pieraniesieny z prostaj pryčyny — adsutnaść abvinavačanaj.
Uradženku vuhorskaha Vespremu Kasiu Sałaŭjovu 23 studzienia 2008 h. vyklučyli z Połackaha dziaržaŭnaha ŭniversytetu, dzie jana navučałasia na 2‑m kursie historyka‑filalahičnaha fakultetu. Advakatam na pracesie budzie vystupać Alaksandar Halijeŭ.
Miž inšym, 9 sakavika Kasi Sałaŭjovaj spoŭniłasia 20 hadoŭ.
