 |
20:38 Vyniesieny prysud pradprymalniku Siarhieju Parsiukieviču. Jon pryznany vinavatym u źbićci milicyjaniera i asudžany da dvuch z pałovaj hadoŭ kalonii ahulnaha režymu.
Ź jaho vyrašana spahnać 1 młn 100 tys. rubloŭ u jakaści maralnaj kampensacyi Siarhieju Dułupu.
Pakazańni Akopava, Vinahradava, Taŭstyki pryznanyja niesapraŭdnymi.
Prytym sudździa Aŭdziejenka zaznačyŭ, što źmiakčajučymi abstavinami było toje, što ŭ Siarhieja Parsiukieviča -- niepaŭnaletni syn.
Prysud byŭ sustrety krykami "Hańba". Parsiukievič paśla abviaščeńnia vyraku vykryknuŭ: "Nie pakidajcie mianie tut!"
Prysud moža być abskardžany ciaham dziesiaci dzion u Mienskim haradzkim sudzie.
* * *
17:06 U svaim apošnim słovie Siarhiej Parsiukievič skazaŭ:
"Išoŭ vośmy dzień haładoŭki ŭ źniavoleńni, i treba być poŭnym idyjotam, kab z pačućcia pomsty źbivać supracoŭnika milicyi. Ja sam były aficer milicyi, tamu cudoŭna viedaju, što za takoje byvaje turma. Takim čynam mianie tut abvinavačvajuć u idyjatyźmie?
Śviedčańni z boku paciarpiełaha ŭvieś čas błytalisia. Jany padhanialisia pad adzin kapył prama ŭ zali sudu. Jany -- niepraŭdzivyja. Ja nieadnarazova prapanoŭvaŭ Dułupu prajści detektar chłuśni. Jon admaŭlaŭsia, bo viedaje, što havoryć niapraŭdu.
Ja nie ździajśniaŭ złačynstva, a, jak aficer spačatku abaraniaŭ svoj honar, a paśla -- žyćcio».
Paśla Siarhiej Parsiukievič dastaŭ ikonku, pakazaŭ prysutnym i skazaŭ: "Voś Boh", a paśla, pakazaŭšy na rodnych:
"A voś maja siamja. Ja klanusia žyćciom i zdaroŭjem žonki Natalli i syna Dzianisa, a taksama svajoj maci, što nikoha nie źbivaŭ". Paśla, źviartajučysia da Dułupa, skazaŭ: "Boh jaho pakaraje za chłuśniu".
Prysud budzie abvieščany pamiž 19:30 i 20:30.
* * *
16:51 Advakat Viera Stramkoŭskaja kaža, što ŭ Parsiukieviča nie było nijakaha matyvu dla źbićcia Dułupa, advakat prosić apraŭdać jaho.
"Hetaja sprava stavić pad sumnieŭ davier da milicyi i da ŭłady. (..) Da materyjałaŭ spravy nie byli dałučanyja fufajka Parsiukieviča ź plamami kryvi, a taksama jahony parvany švedar. Medycynskaje abśledavańnie 28 studzienia kanstatavała, što ŭ Parsiukieviča byŭ źbity tvar, a taksama ssadziny na šyi, kali jaho dušyli. Hetaje źbićcio było bolš ciažkim, čym toje, jakoje nibyta było ŭ Dułupa".
Viera Stramkoŭskaja nie razumieje, čamu nie było miedycynskaha abśledavańnia Parsiukieviča ŭ toj samy dzień, jak źbili nibyta Dułupa. Jon (jaje padabaronny) moh tolki zrabić paśla vychadu z turmy.
Miž inšym, 22 studzienia Viera Stramkoŭskaja naviedvała svaich padabaronnych na Akreścina, prynamsi, jana bačyłasia z Alesiem Taŭstykam. Paśla jana spytała ŭ milicyi: "Jak spravy ŭ Siarhieja Parsiukieviča". Jany adkazali, što ŭsio narmalna, padstavaŭ dla chvalavańnia niama, niahledziačy na toje, što dniom raniej adbyŭsia hety incydent. Čamu pra heta nie było paviedamlena?
Viera Stramkoŭskaja nie bačyć nijakaha matyvu dla źbićcia Dułupa. Jana pytajecca:
"Dziela čaho było začyniacca ŭ asobnym pakoi sam-nasam, kali ŭ im (pakoi) nie było praviłaŭ unutranaha rasparadku, jakija Dułup nibyta źbiraŭsia pakazać Parsiukieviču".
Na dumku Stramkoŭskaj, praces źviazany z tym, što Parsiukievič staŭ sapraŭdnym lideram pradprymalnickaha ruchu, zarekamendavaŭ siabie jak hodny čałaviek, da jaho ludzi nieadnarazova źviartalisia z roznymi prośbami.
Naprykancy Viera Stramkoŭskaja skazała, što ŭvieś śviet sočyć za hetym pracesam, i jaho vyniki buduć śviedčyć pra sapraŭdny stan demakratyi ŭ Biełarusi.
16:07 Prakuror Siarhiej Kunaš zapatrabavaŭ dla Siarhieja Parsiukieviča 3 hady kalonii ahulnaha režymu. Źmiakčajučymi abstavinami jon nazvaŭ niepaŭnaletniaha syna i stan zdaroŭja abvinavačanaha.
15:56 Usich znoŭ zapuścili nazad u zalu suda.
15:49 Pradprymalnik Aleś Taŭstyka źviarnuŭsia da staršyni sudu Anatola Saviča z prośbaj, kab hledačoŭ znoŭku puścili ŭ zalu pasiedžańniaŭ. Abvieščany piacichvilinny pierapynak.
Vystup prakurora Kunaša byŭ pierarvany litaralna na paŭsłovie. Jon tolki paśpieŭ skazać, što vina Parsiukieviča poŭnaściu dakazanaja.
15:26 Sudździa pastanaviła usich vydalić z zali i vieści spravu tolki z udzielnkami pracesu. Heta zdaryłasia paśla taho, jak ludzi pačali aburacca sa słoŭ Dułuba, jaki patrabavaŭ kampensacyi maralnaha ŭronu. Nie dazvolili zastacca navat žoncy Parsiukieviča i jaho dzicionku. Takim čynam u zali pasiedžańniaŭ zastajucca sudździa, prakuror (małady chłopiec viekam 25-26 hadoŭ, advakat, abvinavačany i paciarpieły.
15:16 Paciarpieły Dułub patrabuje ad Parsiukieviča 2 młn rubloŭ kampensacyi maralnaj škody, pakolki 26 studzienia jon nia zmoh pajści ŭviečary dziaŭčyny, bo zalečvaŭ rany. Jon skazaŭ, što niajomka było jeździć u transparcie ź siniakami na tvary. "Ludzi dumali, što ja niejki chulihan, a jak patłumačyć, što heta nia tak?"
Darečy abśjedavańnie Parsiukievič zmoh zrabić tolki paśla taho. jak vyjšaŭ z Akreścina.
14:55 Dapytali ŭsich śviedkaŭ, apošnim -- Karena Akopava, jaki siadzieŭ u susiedniaj kamžry. Ciapier pierajšli da razhladu piśmovych materyjałaŭ spravy. Akopaŭ taksama skazaŭ, što čuŭ jak Parsiukievči kryčaŭ "Ratujcie, zabivajuć".
14:29 Dapytali śviedku Paŭła Vinahradava, ciapier dapytvajuć Alaksandra Važakova. Pavodle Važakova, Dułub byŭ vielmi raźjušanym, kali ŭvarvaŭsia ŭ kamery. Pavodle Vinahradava, užo praz 5 chvilin pačulisia kryki Parsiukieviča: "Ratujcie, zabivajuć". Pryčym, śviedki śćviardžajuć, što Parsiukievič kryčaŭ pa-rasiejsku, a Dułub śćviardžaje, što kryčaŭ pa-biełarusku.
13:00 Dapytali śviedku Harbačeŭskaha, jaki siadzieŭ razam z Parsiukievičam u kamery na Akreścina. Advakatka Viera Stramkoŭskaja adznačyła, što pratakoł ab dopycie Harbačeŭskaha i milicyjanta Jakimčuka, dapytanaha ŭčora, supadajuć słova ŭ słova.
Byŭ dapytany jašče adzin kvatarant toj samaj kamery Aleś Taŭstyka. Toj źviarnuŭ uvahu na tuju akaličnaść, što Dułub śćviardžaje, nibyta Parsiukievič kryčaŭ na biełaruskaj movie «Ludzi, ratujcie, zabivajuć», choć Parsiukievič nie karystajecca biełaruskaj movaj, i tady na Akreścina taksama kryčaŭ ratunku rasiejskaj movaj.
Z boku Parsiukieviča zastalisia try śvievdki: Važakoŭ, Vinahradaŭ, Akopaŭ, jakija taksama siadzieli ź im u adnoj kamery.
Prysutničać na pasiedžańnie siarod inšych pryjechali Alaksandar Milinkievič, Alaksandar Makajeŭ, Enira Branickaja, sakratar pasolstva ZŠA Łuis Kryšak.
12:30 A pałovie na pieršuju na ganku budynku sudubyŭ zatrymany Viačasłaŭ Siŭčyk, jaki nie paśpieŭ da pačatku pasiedžańnia. Jaho pavieźli na sud u Staryja Darohi.
11:50 Sud pačaŭsia raniej za pryznačany čas na 10 chvilin. Tamu bahata chto z achvotnych nia zmoh patrapić u zalu sudu.
Pasiedžańnie prachodzić u sudzie Maskoŭskaha rajonu stalicy.
