 |
Tysiačy žycharoŭ damoŭ № 4, 6, 10, 30, 36 pa vulicy Maksima Tanka ŭ Miensku kateharyčna nia zhodnyja ź planami budaŭnictva pobač šmatfunkcyjanalnaha biznes‑centru, — paviedamlaje siońnia «Źviazda». Žurnalist vydańnia Leanid Łachmanienka stavić siabie na miesca žycharoŭ unikalnaha žyłoha kompleksu j maluje karcinu pieražyvańniaŭ ludziej, mierkavańnia jakich nichto nie spytaŭ i nie skazaŭ navat praŭdy:
Naprykancy minułaha hodu pa «Kitajskaj ścianie» papaŭźli čutki, što sprytniuhi‑działki pad vyhladam upryhožvańnia horadu «prabili» ŭ Mienharvykankamie dazvoł pabudavać na miescy byłoha skveru niešta takoje ahromnistaje, vysokaje, šyrokaje i samaje hałoŭnaje — mała patrebnaje. A kali ich zaduma ździejśnicca, to žyćcia nia budzie ŭ cieniu j šumie hetych chmaračosaŭ, a ekalahičnaja abstanoŭka rezka pahoršycca. A potym, jak časta byvaje, uvohule stali raspaŭsiudžvacca samyja nievierahodnyja «kamentaryi» i plotki. Pierspektyva blizkaha susiedztva ź vielizarnymi hmachami, adsutnać praŭdzivaj infarmacyi pałochała ludziej. Im było ciažka ŭjavić, što na miescy byłoha skveryku chutka pačnuć uzvodzić hihanckija viežy da nieba. Navošta, kamu heta patrebna, ź jakoj nahody, hublałasia ŭ zdahadkach nasielnictva «Kitajskaj ściany». Miž inšym, heta amal piać tysiač čałaviek.
A kali ŭ studzieni ŭ skvery źjavilisia buldozery, a na vialikim plakacie vyjava biznes‑centru, to abureńniam ludziej nie było kanca: jak, čamu za ich śpinaj?
Vynikam zvarotaŭ žycharoŭ staŭ schod, sklikany ŭžo paśla taho, jak u abharodžany skver pryjechali buldozery. Dyj abjava pra hety schod była vyviešanaja tolki ŭ dzień jaho praviadzieńnia. Aŭtar artykułu dałučajecca da aburanaha hołasu mienčukoŭ:
Na schodzie načalnik adździełu [ŭzhadnieńniaŭ prajektaŭ] [Fiodar] Žuraŭloŭ skardziŭsia prysutnym na toje, što ŭ Miensku štohod prachodziać praceduru ŭzhadnieńnia kala 500 prajektaŭ novych zbudavańniaŭ i amal pa kožnym žychary susiednich damoŭ pišuć skarhi. Fakt cikavy ŭ roznych adnosinach. Niaŭžo ŭ Miensku takoje ćmianaje, nieśviadomaje, ehaistyčnaje i nadzvyčaj varožaje prahresu nasielnictva, jakoje dalej svajho nosa ničoha nie choča bačyć? Niaŭžo skandały paśla niaŭdałaj sproby vysielić žycharoŭ domu adnoj z centralnych vulic horadu — imia K. Marksa, kanflikty vakoł budaŭnictva aŭtazapravak kala žyłych damoŭ ci sa znosam vialikaj aŭtastajanki pad budaŭnictva žyłych damoŭ niepadalok ad praspekta hazety «Pravda» ŭźnikajuć vyklučna pa vinie mienčukoŭ?
Pry kancy artykułu aŭtar vykazvaje sumnieŭ, ci ŭ krainie znojducca specyjalisty adpaviednaj kvalifikacyi dla pabudovy chmaračosa na bałocistaj hlebie i raić pačakać śpiarša, «jak budzie realizoŭvacca biesprecedentny dla Biełarusi i ŭžo razreklamavany «Iteraj» prajekt pa ŭźviadzieńni na miescy aeraportu Miensk-1 dziełavoha centru stalicy».
