15 sakavika ŭ Miensku adbyłasia čarhovaja pres‑kanferencyja hrupy žančynaŭ — svajačak asudžanych, a taksama niazhodnych z rašeńniami sudoŭ pa svaich hramadzianskich spravach. Hetym razam havorka pajšła pra pieršyja sustrečy z novapryznačanym na pasadu Hienprakurora Ryhoram Vasilevičam. Prysutničała kala 30 čałaviek ź Bieraściejskaj, Haradzienskaj, Mahiloŭskaj i Mienskaj abłaściej i ź Miensku.
Nahadajem, što papiaredniuju pres‑kanferencyju žančyny zładzili 7 lutaha 2008 h. Udzielniki pres‑kanferencyi hruntavalisia na asabistym dośviedzie dačynieńniaŭ z orhanami prakuratury i sudoŭ, i dali ŭłasnuju acenku dziejnaści sučasnaj sudovaj systemy Biełarusi.
Paśla pryznačeńnia Ryhora Vasileviča, byłoha staršyni Kanstytucyjnaha Sudu na pasadu hienprakurora, hrupa žančynaŭ źviarnułasia da jaho ź listom. U im jany ŭzhadali daŭniejšuju sustreču z Vasilevičam u jakaści staršyni KS. Tady, pavodle žančynaŭ, Ryhor Alaksiejevič paabiacaŭ im dapamahčy, ale spasłaŭsia na abmiežavanaść svaich paŭnamoctvaŭ datyčna dziejnaści prakuratury.
«Zaraz Vy źjaŭlajeciesia Hieneralnym Prakuroram i nadzielenyja paŭnamoctvami viaršyć spraviadlivy nahlad za vykanańniem zakonnaści. Ciapier u nas źjaviłasia nadzieja, što našy kryminalnyja i hramadzianskija spravy buduć razhledžanyja ŭ adpaviednaści z zakonami našaj krainy» — havaryłasia ŭ tym liście.
Žančyny prasili novapryznačanaha hienprakurora pra asabistuju sustreču. 13 sakavika R. Vasilevič pryniaŭ nievialikuju hrupu hramadzianaŭ. I, jak vynikaje z čarhovaha lista da jaho, sustreča taja pasialiła siarod jaho naviednic novuju nadzieju na spraviadlivaść. Ale list toj byŭ vyklikany inšaj pryčynaj: žančyny pačali atrymlivać šablonnyja adkazy z Prakuratury, jakija atrymlivali i raniej. Bolš za toje, niekatoryja ź ich atrymali adkazy, vielmi padobnyja da tych, što prychodzili da ich raniej za podpisam namieśnika tady jašče Piatra Mikłaševiča Alaksandra Ivanoŭskaha.
Zasumniavaŭšysia ŭ praŭdzivaści tych adkazaŭ, niekalki žančynaŭ padpilnavali sp. Vasileviča paśla narady prosta na prystupkach Hienprakuratury i pieradali jamu asabista svaje listy i kopii sumnieŭnych, na ich dumku, dakumentaŭ.
U apošni dzień krasavika niekalki padpisantak atrymali adkazy za podpisam hienprakurora, u jakich havaryłasia, što nahody dla pryniaćcia mieraŭ prakurorskaha reahavańnia nia majecca. Halina Jubko ź Miensku, što čaćvierty hod vyśviatlaje akaličnaści śmierci rodnaj siastry, na siońniašniaj pres‑kanferencyi zaŭvažyła na heta: «Atrymać aŭtohraf ad Vasileviča šmat praściej, čym ad Mikłaševiča — adzinaje adroźnieńnie pamiž byłym i ciapierašnim prakuroram».
8 traŭnia na pryjom da hienprakurora trapiŭ adzin čałaviek ź dzieviatnaccaci zapisanych, tamu straciŭšy nadzieju atrymać adkazy na svaje pytańni ŭ Prakuratury, žančyny napisali kalektyŭny list da Alaksandra Łukašenki. U im jany paskardzilisia na dziejańni čynoŭnikaŭ prakuratury, u pryvatnaści na praciah tradycyi farmalizavanaha listavańnia z hramadzianami.
Samusienka Ł. atrymała adkaz, što listavańnie ź joj spynienaje, choć zhodna Kanstytucyi nie isnuje abmiežavańnia na kolkaść asabistych pryjomaŭ u słužbovych asobaŭ.
«Takija adkazy śviedčać pra toje , što «šlach» Vasileviča R.A. ad Kanstytucyjnaha Sudu da Hienprakuratury apynuŭsia takim doŭhim, što jon paśpieŭ «zabyć» Kanstytucyju Biełarusi» — viadziecca ŭ kalektyŭnym liście da kiraŭnika dziaržavy. Pryznačeńnie Vasileviča na adkaznuju pasadu nazvanaje ŭ liście «farmalnaj rakiroŭkaj», a stanovišča ŭ orhanach prakuratury i sudoŭ paśla hetaj rakiroŭku, na pohlad hrupy žančynaŭ, tolki pahoršyłasia.
Prezydenta piśmova paprasili asabista razhledzieć spravy i dać narešcie adkaz na pytańni, sfarmulavanyja ŭ skarhach. A taksama stvaryć hramadzki kamitet, jaki b sačyŭ za raźvićciom sprečnych hramadzianskich i kryminalnych spravaŭ.
Vosieńniu my zładzim čarhovuju pres‑kanferencyju, na jakoj raspaviadziom pra reakcyju Łukašenki na naš zvarot, kaža praŭnik Tamara Siarhiej.
