Havorka pra zachoplenyja na partyzanskaj bazie kamputary, u jakich zachavałasia pierapiska terarystaŭ z pradstaŭnikami Čavesa i, u pryvatnaści, infarmacyja pra mahčymyja pastaŭki im zbroi ź Biełarusi. Pavialičvajecca imaviernaść taho, što Venesuełu, a zaadno ź joj i Biełaruś źvinavaciać u padtrymcy mižnarodnaha teraryzmu.
Interpoł paćvierdziŭ aŭtentyčnaść infarmacyi, znojdzienaj u troch noŭtbukach, dvuch ćviordych dyskach i troch fłeškach, zachoplenych kalumbijskimi kamandas u časie rejdu na bazu partyzanaŭ z Revalucyjnych uzbrojenych siłaŭ Kalumbii (FARK), što raźmiaščałasia na terytoryi sajuznaha z Venesuełaj Ekvadoru.
Hieneralny sakratar Interpołu Ronald Nobł paviedamiŭ pra vyniki ekspertyzy, praviedzienaj arhanizacyjaj. Jana nia vyjaviła nijakich manipulacyj sa źmieścivam łeptopaŭ: eksperty nie znajšli nijakaj «madyfikacyi, źmieny, dabaŭleńnia abo vydaleńnia» fajłaŭ z dadzienymi na kamputarach i nośbitach infarmacyi. Adpaviedny rapart Interpołu na 102 staronkach možna pračytać tutaka.
Vynik ekspertyzy Interpołu — heta surjozny ŭdar pa reputacyi Čavesa, ale taksama i Biełarusi.
Ź pierapiski terarystaŭ z Čavesam vynikaje, što Venesueła finansavała hierylju. Suma finansavańnia mahła skłaści navat 300 miljonaŭ dalaraŭ.
Ekvador udzielničaŭ u hetych tajemnych aperacyjach — dziŭna ŭžo toje, što baza partyzanaŭ, jakija na siońnia ŭtrymlivajuć u zakładnikach 700 čałaviek, svabodna isnavała na jahonaj terytoryi.
Biełaruś ža fihuruje ŭ materyjałach łeptopaŭ jak krynica pastavak zbroi, pryčym u liście da Rejesa havaryłasia pra asabistuju sustreču biełaruskaha pradstaŭnika z pasłancam terarystaŭ.
Hišpanskaja hazeta «El Pais» pieršaj pracytavała e-mejł Ivana Markiesa, lidera Revalucyjnych uzbrojenych siłaŭ Kalumbii, datavany 8 lutaha: «Biełaruski siabar prapanavaŭ realizavać pakiet na čornym rynku, kab paźbiehčy prablemaŭ. 17-ha hetaha miesiaca u Karakas pryjedzie vysoki pradstaŭnik hetaha siabra, kab udakładnić śpis. Anioł paprasiŭ nas prysutničać, kab my asabista sustrelisia z delehatam. Heta vielmi važna».
«Anioła» hazeta rasšyfroŭvaje jak Čavesa. «Pradstaŭnikom siabra» ža ličyć Viktara Šejmana. «Šejman byŭ adnym z tych, chto prabivaŭ padpisanyja letaś kantrakty na pastaŭku zbroi ŭ Venesuełu na 720 młn eŭra», — piša hazeta.
Nahadajem, što 15—19 lutaha adbyŭsia aficyjny vizyt u Venesuełu biełaruskaj delehacyi na čale ź dziaržaŭnym sakratarom Rady biaśpieki Viktaram Šejmanam.
Paćvierdžańnie suviaziaŭ Čavesa z FARK moža zaškodzić jahonym pazycyjam jak unutry krainy, tak i za miežami. Pavodle apytańniaŭ, 90 % venesuelcaŭ asudžajuć dziejnaść FARK. Kalumbijskaja hierylja ŭniesienaja ŭ amerykanski i eŭrapiejski śpisy mižnarodnych terarystyčnych arhanizacyj.
FARK viadzie partyzanku ŭžo 40 hadoŭ. Napačatku za FARK stajała bajavoje kryło Kampartyi, ale z časam, kali stała vidavočna, što FARK skaciłasia da narkahandlu i bandytyzmu, kamunisty razarvali z kryvavaj hrupoŭkaj.
Prezydenty Venesueły i Ekvadoru, što pryjšli da ŭłady na chvali antyamerykanskaha papulizmu, zdaŭna nienavidziać prezydenta Kalumbii — viernaha sajuźnika ZŠA, jaki abapirajecca na dapamohu Vašynhtonu ŭ baraćbie suprać narkamafii i partyzanki.
Venesueła nastojvaje, što fajły, zdabytyja Kalumbijaj paśla taho, jak jana atakavała paŭstancki lahier u Ekvadory, falšyvyja.
Dziaržaŭny sakrataryjat biaśpieki Biełarusi nazvaŭ publikacyju ŭ «El Pais» «domysłami». Pradstaŭniki Rady biaśpieki spasłalisia na papiaredžańni Čavesa, jaki kazaŭ, što Złučanyja Štaty arhanizujuć ukidańnie ŭ ŚMI takoha kampramatu, kab dyskredytavać kiraŭnictva Venesueły.
Vyniki ekspertyzy Interpołu staviać pad sumnieŭ abviaržeńni Čavesa i biełaruskaha boku, i Biełaruś moža trapić u niaprostaje stanovišča na mižnarodnaj arenie, bo razam z Venesuełaj naša kraina moža trapić u śpis dziaržavaŭ-sponsaraŭ teraryzmu.
Prezydent Venesueły Uha Čaves užo nazvaŭ zajavu Interpołu «kłaŭnadaj». Jon tak prakamentavaŭ hetuju infarmacyju: «Dokazy? Dy kožny juryst-pieršakurśnik viedaje, što nijakija heta nia dokazy. Heta ničoha nie dakazvaje!»
