Atrymała praciah historyja ź listom palitykaŭ Źmitra Daškieviča («Małady front»), Ihara Rynkieviča (BSDP) i Alesia Michaleviča (Partyja BNF) da ministra zamiežnych spravaŭ Polščy Radasłava Sikorskaha.
Nahadajem, što ŭ pasłańni rezka krytykavałasia praca «Eŭraradyjo», Racyjo Racyja i telekanału «Biełsat», što viaščajuć na Biełaruś z‑za Buha.
Tym časam namieśnik staršyni Partyi BNF Aleś Michalevič vyrašyŭ za lepšaje vybačycca pierad supracoŭnikami radyjostancyj i telekanału «Biełsat».
«Na maju dumku, «Eŭrapiejskaje radyjo dla Biełarusi», «Radyjo Racyja» i telekanał «Biełsat» robiać šmat dla daniasieńnia infarmacyi da biełaruskich hramadzianaŭ. Biezumoŭna, kožny prajekt maje svaju niezaležnuju redakcyjnuju palityku. I pamyłkaj z našaha — i majho, u pryvatnaści — boku było abahulniać roznyja prajekty pad adnoj šyldaj i sprabavać iści da palitykaŭ Polščy, nie źviarnuŭšysia da kiraŭnictva hetych prajektaŭ naŭprost. My vydzielili takija niedachopy, jak adsutnaść mocnaha FM‑pakryćcia, pierakos niekatorych temaŭ u bok nieadpaviednaści biełaruskim realijam. Na moj pohlad, heta pytańni, jakija patrebna razhladzieć u ahulnym śviatle kancepcyi viaščańnia niezaležnych medyjaŭ z terytoryi zamiežnych krainaŭ. Spadziajusia, što niahledziačy na składanuju atmasferu paśla publikacyi našaha zvarotu, my zmožam pryjści da ahulnaha bačańnia», — zaznačyŭ u svaim liście A.Michalevič.
Pavodle našaj infarmacyi, častka žurnalistaŭ Radyjo «Racyja», što pracujuć u Biełastoku, padtrymali list palitykaŭ. A 15 traŭnia ŭ biełastockaj redakcyi adbyŭsia schod supracoŭnikaŭ, jakija źjaŭlajucca hramadzianami Biełarusi.
Niekatoryja žurnalisty pryznali, što tekst lista na imia R. Sikorskaha adpaviadaje sapraŭdnamu stanu rečaŭ, a sytuacyja na Radyjo «Racyja» patrabuje terminovych źmienaŭ.
«Bolš čym za dva hady isnavańnia radyjostancyi jaje kiraŭnictva tak i nia zdoleła pradstavić kalektyvu kancepcyi viaščańnia. Pravavy status biełaruskich hramadzian — supracoŭnikaŭ «Racyi» —ŭ Polščy zastajecca niapeŭny», — adznačajuć jany.
Žurnalisty padtrymali prapanovu abrać na pasady prahramnaha dyrektara, kiraŭnika słužby infarmacyi, hałoŭnaha redaktara i redaktara viaščańnia ŭ Biełastoku biełaruskich hramadzian dyj zaprapanavali svoj śpis medyja‑prafesijanałaŭ, adznačaje pres‑słužba «Maładoha frontu».
U niadzielu niekalki słoŭ pra pracu radyjostancyj i list palitykaŭ Sikorskamu było skazana i ŭ vynikovaj pieradačy «Panarama tydnia» na BT. Kamentar byŭ u zvykłaj dla telekanału ździeklivaj i iraničnaj formie. Kštałtu, «apazycyjanery skardziacca na inšaplanetnikaŭ». Miełasia na ŭvazie fraza Źmitra Daškieviča, što radyjostancyi viaščajuć u kosmas.
Varta adznačyć, što mnohija žurnalisty, siarod jakich aŭtary samych rejtynhavych prahramaŭ, list nie padpisali.
