 |
Zaraz jahony los vyrašaje kamisija partyjnaha kantrolu. Miž tym staršynia partyi Lavon Barščeŭski zajaviŭ «Salidarnaści», što na bližejšym źjeździe źbirajecca pastavić ultymatum: albo ŭ partyi zastajecca Michalevič, albo jon.
U niadzielu, 18 maja, Partyja BNF pravodziła pasiadžeńnie Sojmu. Adnym z pytańniaŭ było intervju Alesia Michaleviča, nadrukavanaje ŭ «Salidarnaści» 11 maja. U im namieśnik staršyni raskazaŭ pra mietady, jakija vykarystoŭvajuć suprać jaho ŭ partyi, ab pryčynach jahonaha kanfliktu ź Vincukom Viačorkam, a taksama raskrytykavaŭ styl kiravańnia Lavona Barščeŭskaha.
— U skazanym Michalevičam jość jaŭnyja parušeńni našych pastanoŭ, — zajaviŭ «Salidarnaści» staršynia Partyi BNF Lavon Barščeŭski. — Ja prainfarmavaŭ Sojm, što pieradaŭ hetaje intervju na kamisiju partyjnaha kantrolu. Ciapier heta sprava kamisii, i niachaj jana vyrašaje los Michaleviča.
Pa słovach Lavona Barščeŭskaha, Michalevič jašče bolš usuhubiŭ situacyju.
— Napiaredadni pasiadžeńnia jon razasłaŭ partyjcam svoj artykuł za čužym proźviščam. Heta toj materyjał, jaki, nibyta, byŭ napisany Lolikam Uškinym. Adnak ja dakładna mahu dakazać, što heta nia styl Uškina. Dy i pry čym tut jon? Ale niachaj z hetym raźbirajecca kamisija. Ja ž sa svajho boku pastaŭlu na nastupnym źjeździe pytańnie: albo Michalevič albo ja. Inšaha vyjścia ja nie baču.
Na dumku samoha Alesia Michaleviča, taki šyroki rezanans jahonaje intervju atrymała tamu, što «niekatorym asobam vielmi nie chaciełasia, kab peŭnaja infarmacyja vychodziła za miežy partyi».
— Tamu i takaja reakcyja, — patłumačyŭ jon «Salidarnaści». — Jany aburylisia maimi vykazvańniami, bo dumali, što zmohuć i dalej rabić usio cicha, biez šyrokaha rezanansu. Adnak nie atrymałasia.
Što ž datyčyć uzhadanaha artykuła Lolika Uškina, to Aleś Michalevič całkam admaŭlaje svajo aŭtarstva.
— Nie viedaju, u čym dakładna ŭpeŭnieny Barščeŭski, ale Uškin upeŭnieny u tym, što heta jaho artykuł. Ja šmat razmaŭlaŭ ź Lolikam pra situacyju ŭ BNF i tamu, mahčyma, tam jość niekatoryja maje frazy. Adnak ja da jaho nie maju dačynieńnia. Rassyłaŭ jaho taksama nie ja. Dumajecca, chtości z tych, chto mianie padtrymlivaje.
Pra intervju, dadzienaje «Salidarnaści», Aleś Michalevič nikolki nie škaduje.
— Mahčyma, ja raskazaŭ trochu zašmat. Ale jość u hetym i stanoŭčy bok. Naprykład, na hetym Sojmie ŭsie ŭžo chvalili Jurasia Hubareviča. Inšymi słovami, uvieś ahoń ja ŭziaŭ na siabie. Što ž da kamisii, to, mnie padajecca, što ŭ ich niama miechanizmu mianie vyklučyć. Ja ž pakul źbirajusia pracavać dalej.
