 Chenk Van Hielderen |
Hałoŭnymi zadačami kampanii Heineken N.V. u Biełarusi jaje hieneralny menedžer i staršynia naziralnaj rady pivavarni «Siabar» Chenk Van Hielderen nazvaŭ zavajavańnie klučavoj pazycyi na biełaruskim piŭnym rynku, a taksama stvareńnie vysokaj kultury spažyvańnia piva ŭ našym rehijonie.
Paśla nabyćcia kampanijaj Heineken N.V. uśled za babrujskaj pivavarniaj druhoha biełaruskaha brovaru — «Rečycapiva», pazycyi jaje na biełaruskim rynku značna ŭzmocniacca. Nahadajem, što 22 traŭnia halandzkaja kampanija aficyjna abvieściła pra nabyćcio kantrolnaha pakietu akcyjaŭ AAT «Rečycapiva». Pavodle damovy halandzki bok investuje ŭ pavieličeńnie akcyjanernaha kapitału rečyckaha brovaru $9,9 młn. i atrymaje kantrolny pakiet akcyjaŭ — 51%. Pa vynikach minułaha hodu abjom prodažaŭ rečyckaha piva skłaŭ 285 tys. hkł (prajektnaja mahutnaść — 525 tys. hkł), dola kampanii ŭ ahulnym abjomie vytvorčaści piva ŭ Biełarusi — 8%. Prodažy babrujskaha piva ŭ minułym hodzie skłali 553 tys. hkł (rost u paraŭnańni z 2006 h. 49,7%), u nastupnym hodzie planujecca pavieličeńnie mahutnaściaŭ da 2 młn hkł (na siońnia jany składajuć 1,2 młn), dola na biełaruskim rynku — 17,1%.
Chenk Van Hielderen ahučyŭ plany kampanii pa zabieśpiačeńni pivavarniaŭ jakasnaj syravinaj. Dziela hetaha sioleta Heineken impartavaŭ 1470 t elitnaha nasieńnia pivavarnaha jačmieniu. Vyroščvacca jon budzie na Mahiloŭščynie pavodle damoŭlenaści ź miascovymi ŭładami i Minsielhascharčam. Kampanija raźličvaje na ŭradžaj u 20 tys. t., vyroščvacca jačmień budzie ŭ SVK i na fermerskich haspadarkach. Soład budzie atrymany na AAT «Biełsoład». Pry hetym sp. Van Hielderen abvierh čutki pra mahčymaje nabyćcio ŭ budučyni halandzkaj kampanijaj «Biełsoładu», a nakont nabyćcia inšych biełaruskich brovaraŭ vykazaŭsia abciakalna: «aša kampanija zaŭsiody zacikaŭlenaja ŭ novych mahčymaściach».
Siarod najbližejšych planaŭ kampanii — vypusk kvasu. U pryvatnaści, pivavarnia «Siabar» z 1 červienia pačynaje vypusk kvasu hatunkaŭ «Łahodny» i «Spraŭny» pad brendam «Chatni». Ź vieraśnia aktyvizujecca vypusk rasiejskich piŭnych brendaŭ kancernu. Heta, adnak, nie aznačaje, što Heineken N.V. nia budzie zajmacca miascovymi brendami, adznačyŭ hieneralny menedžer. Papularnyja brendy rečyckaha i babrujskaha brovaraŭ zachavajuć i buduć raźvivać novyja. «Ja nia viedaju takoj krainy, dzie čverć piŭnoha rynku składaje impartny pradukt» — padkreśliŭ Van Hielderen. Pavodle jaho słovaŭ, jość niekalki sposabaŭ supraćstajańnia impartu — palapšać miascovyja hatunki, a taksama naładzić vypusk papularnych brendaŭ u Biełarusi.
