Apazicyjnaha palityka z Babrujsku Alesia Čyhira zatrymali kala poŭnačy z čaćviarha na piatnicu supracoŭniki adździełu milicyi babrujskaha harvykankamu.
Žonka palityka Danuta Čyhir paviedamiła, što ŭčora ŭ Alesia Čyhira byŭ dzień narodzinaŭ. Jon, jahonaja žonka i dačka Alisa pozna ŭviečary viartalisia ad svajakoŭ dadomu taksoŭkaj.
«Kala domu ja raźličyłasia z taksistam. Aleś paprasiŭ u jaho ček. Taksist pačaŭ svarycca, ček Alesiu nia daŭ. My z dačkoj vyjšli z taksoŭki. Tady taksist rezka kranuŭsia ź miesca j niekudy źjechaŭ. Praź piać chvilinaŭ mnie telefanuje Aleś i kaža, što jaho taksist i milicyjanty źbivajuć u rajonie vakzała», - paviedamiła Danuta Čyhir. Paśla stała viadoma, što Čyhira zatrymali.
U adździele milicyi jana napisała skarhi na imia načalnika babrujskaj milicyi i ŭ prakuraturu.
Aleś Čyhir, nastaŭnik pavodle adukacyi, byŭ zvolnieny z pracy za ŭdzieł u vybarčym štabie Alaksandra Milinkieviča. Pratestujučy suprać zvalnieńnia, jon prykoŭvaŭ siabie da słupa nasuprać budynku babrujskaha harvykankamu.
Danuta Čyhir paviedamiła, što ciaham siońniašniaha dnia musić adbycca sud nad jejnym mužam.
