 |
Farmalnaj pryčynaj dla takoha materyjału stali niadaŭnija zatrymańni la dyplamatyčnaha pradstaŭnictva staršyni bieraściejskaj filii Partyi BNF Źmitra Šymanskaha i redaktara turaŭskaj niedziaržaŭnaj hazety «Volnyja naviny» Michaiła Kozieła. Nahadajem, što 28 traŭnia hetyja aktyvisty byli zatrymanyja niedaloka ad amerykanskaha pasolstva. Ich dastavili ŭ Departament finansavych daśledavańniaŭ, dzie kanfiskavali ŭ kožnaha prykładna pa 1700 dalaraŭ, nibyta jany falšyvyja.
Byli pakazanyja abrysy niejkaha byłoha bieraściejskaha apazycyjanera, jaki zhadziŭsia raskazać «usiu praŭdu pra Šymanskaha». Hołas kazaŭ, što «Šymanski zvyčajny apazycyjaner, jaki lubić dobra apranucca, zvazić dziaŭčat na pryrodu, źjeździć za miažu». Raskazvajučy, jak pracuje «kanvejer finansavańnia apazycyi», byli pakazanyja kadry, jak pry vychadzie z pasolstva ZŠA Šymanskaha ŭnutr budynku adrazu ŭvajšoŭ Kozieł.
Pavodle žurnalista BT, utrymańnie apazycyi adbyvajecca praz systemu małych hrantaŭ, jakija stabilna vydaje pasolstva. Byli nazvanyja proźviščy tych ludziej, jakija kankretna hetym zajmajucca, jak ź biełarusaŭ, tak i z amerykancaŭ. Čarhovy raz pasolstva ZŠA atrymała za toje, što spyniłasia vydača vizaŭ.
Byli pakazanyja taksama słovy «kasira amerykanskaha pasolstva» i byłoha supracoŭnika dyppradstaŭnictva. Apošni (tvar jahony nie pakazvaŭsia, a proźvišča nie nazyvałasia) pryznaŭsia, što mały hrant moža atrymać tolki apazycyjaner, jaki napiša, što hrošy nieabchodnyja dla zmahańnia z dyktaturaj. «Prosty śmiarotny taki hrant atrymać nia moža», – skazaŭ jon.
Potym byŭ nazvany kankretny śpis apazycyjaneraŭ, jakija doŭhi čas znachodziacca na amerykanskim utrymańni. Siarod ich byli nazvanyja proźviščy dački palitviaźnia Julii Kazulinaj, staršyni niezarehistravanaha pravaabarončaha ruchu «Viasna» Alesia Bialackaha, byłoj namieśnicy staršyni AHP Ludmiły Hraznovaj, hałoŭnaha redaktara «Narodnaj voli» Iosifa Siaredziča, advakatki Viery Stramkoŭskaj, Jurasia Hubareviča, jakoha papiknuli tym, što umudrajecca zajmać adrazu dva namieśnickich kresły, jak u Partyi BNF, tak i ŭ Milinkieviča.
Juraś Hubarevič na heta kaža tak: «Dla mianie honar akazacca ŭ takoj pačesnaj kampanii. A kali surjozna, to dobryja stasunki z amerykanskim pasolstvam byli ŭstalavanyja jašče za čas majho deputactva ŭ biełaaziorskim harsaviecie. Dziakujučy dapamozie byłoha pasła Kozaka ŭ Biełaaziorsk było dastaŭlena vialikaja partyja medykamentaŭ. I ciapier miž nami zastajucca peŭnyja rabočyja kantakty. Kali BT źviarnuła na mianie ŭvahu, to značyć dziejničaju ŭ słušnym nakirunku».
Niejkaje imhnieńnie byŭ pakazany inšy śpis palitykaŭ, žurnalistaŭ, jakich nibyta taksama finansuje amerykanski ŭrad.
Nieadnarazova ŭ kadry milhali lidery apazycyjnych partyj – Anatol Labiedźka, Aleś Michalevič, Anatol Laŭkovič, Ihar Rynkievič, Pavał Sieviaryniec i Alaksiej Šein, – jakija stajali la dźviarej pasolstva ZŠA. Pavodle kamentaru, pryjšli jany, naturalna, za hrašyma.
Byli prademanstravanyja zapisanyja na kameru śviedčańni Šymanskaha i Kozieła. Apošni doŭhi čas admaŭlaŭsia niešta havaryć. Kali zapytalisia, čamu jon maŭčyć, aktyvist ruchu «Za svabodu» adkazaŭ, što baicca: «Kali nie pasadzicie, dyk zabjacie»
