Siońnia adbyŭsia Sojm Partyi BNF. Na paradku dnia stajała pytańnie ab vyklučeńni z partyi namieśnika staršyni Alesia Michaleviča. Pryčynaj stała interviju «Salidarnaści», jakoje palityk daŭ 11 traŭnia. Sam A. Michalevič jašče pierad pačatkam Sojmu ličyŭ, što hetaje pytańnie navat nia budzie ŭzdymacca. Adnak jaho razhlad inicyjavali staršynia kamisii ŭnutrypartyjnaha kantrolu Jury Chadyka i Piotra Sadoŭski. U časie hałasavańnia za vyklučeńnie A. Michaleviča z Partyi BNF prahałasavali 24 čałavieki, suprać — 19. Čatyry biuleteni pryznanyja niesapraŭdnymi.
Adzin ź siabroŭ Sojmu ŭ znak pratestu demanstratyŭna sapsavaŭ biuleteń i admoviŭsia hałasavać.
Aleś Michalevič admoviŭsia kamentavać rašeńnie Sojmu. «Ja ŭstupiŭ u partyju ŭ 1993 hodzie, kali mnie spoŭniłasia 18 hod, tamu mnie ciažka kamentavać», — zajaviŭ palityk, adkazvajučy na pytańnie BiełaPAN.
 Aleś Michalevič procistajaŭ starejšamu pakaleńniu lideraŭ Partyi BNF. |
* * *
Kamentar staršyni partyi Lavona Barščeŭskaha z sajtu partyi
U śniežni 2007 h. 211 z 232-ch delehataŭ apošniaha źjezdu Partyi BNF prahałasavała za mianie jak staršyniu partyi pry adnoj-adzinaj umovie: ja zrablu jasnaj sytuacyju ŭ partyi, i jana budzie pracavać pavodle svaich ułasnych, pryniatych praz demakratyčnyja pracedury rašeńniaŭ. Na žal, častka ludziej nie zrazumieła, što partyjnaja praca – heta nie hulnia, što partyja – nie kantora klijentaŭ, a arhanizacyja, jakaja realizuje supolna vyznačanyja palityčnyja mety.
Na siońniašnim pasiedžańni Sojmu Partyi BNF daviałosia pryniać niaprostaje, ale absalutna nieabchodnaje rašeńnie – vyklučyć z šerahaŭ partyi adnaho z namieśnikaŭ staršyni sp. Alaksieja Michaleviča.
Takoje rašeńnie naśpiavała daŭno. Sp. Michalevič admoviŭsia vykonvać užo pryniatyja rašeńni Sojmu partyi. Ale toje, što partyjaj pryniata, pavinna vykonvacca – inačaj nadychodzić paraluš, niemahčymaść ničoha rabić. Sp. Michalevič navat admoviŭsia aznajomicca z zahadam staršyni partyi ab funkcyjanalnych abaviazkach namieśnikaŭ staršyni. Jak u takoj sytuacyi supracoŭničać ź im – ciažka ŭjavić. Jon pierajšoŭ da publikacyi abraźlivych, skiravanych na asoby vykazvańniaŭ pad adrasam inšych kiraŭnikoŭ Partyi BNF. Ja sprabavaŭ pa-dobramu pierakanać jaho hetak nie rabić. Ale maje sproby zaklučyć miravoje pahadnieńnie vyniku nia mieli.
Dla palityčnaj arhanizacyi takija źjavy niedapuščalnyja. Tamu bolšaściu siabroŭ Sojmu na prapanovu maju i Kamisii partyjnaha kantrolu tajemnym hałasavańniem było vyrašana vyklučyć jaho z Partyi BNF. A. Michalevič zastaŭsia vykonvać abaviazki namieśnika staršyni hramadzkaha abjadnańnia BNF «Adradžeńnie» i maje prava apelavać da Źjezdu partyi nakont uznaŭleńnia jaho ŭ šerahach Partyi BNF.
