 Ilustracyja economist.com |
Tolki adzin deputat prahałasavaŭ suprać. Za — 93 čałavieki. Pradstaŭnikoŭ BAŽ nie dapuścili dla ŭdziełu ŭ dyskusii pa zakonaprajektu.
Nahadajem, što Zakon prymaŭsia ŭ dziŭnym ekspres‑režymie. Jašče ŭ pačatku červienia nichto nia viedaŭ, što zakonaprajekt ŭklučać ŭ pracu letniaj sesii pałaty. 12 červienia kiraŭnictva BAŽ razasłała ŭsim 110 deputatam parlamentu listy z prośbaj nie śpiašacca z pryniaćciom zakonu. Jak bačym, takija zachady akazalisia marnymi.
Pavodle namieśnika staršyni BAŽu Andreja Bastunca, prajekt maje jak stanoŭčyja, tak i admoŭnyja momanty.
Da stanoŭčaha možna adnieści admovu ad uzhadnieńnia na rehistracyju ŚMI miascovymi uładami. Vielmi časta ŭžo na hetaj pieršapačatkovaj stadyi vydańni sutykalisia z admovami, jakija paśla nielha było abskardzić u vyšejšych instancyjach. Nu i jašče adzin paŭ-stanoŭčy momant: drukavanyja ŚMI mohuć nie rehistravać svaje internet‑analahi.
Ciapier piarojdziem da kiepskaha. Rehistracyja internet‑partałaŭ budzie abaviazkovaj. Što praŭda, deputaty tak i nie zmahli pryjści da adzinaha mierkavańnia, jak kantralavać internet, tamu pierakinuli hetyja abaviazki na ŭrad. Mienavita saviet ministraŭ pavinien raspracavać dakument, jaki i budzie rehulavać dziejnaść biełaruskich sajtaŭ. Pakul hetaha dakumentu niama.
Ciaham hodu paśla pryniaćcia Zakonu ŭsie ŚMI buduć vymušanyja prajści pierarehistracyju. Uvohule, pierarehistracyju daviadziecca prachodzić pry lubych statutnych źmienach, navat pry pierajeździe redakcyi na inšy adras. Darečy, ciapier, kab hazetu ci časopis nie pazbavili rehistracyi treba vychodzić minimum raz na šeść miesiacaŭ. Raniej dazvalałasia nie vychodzić ciaham hodu.
Indyvidualnyja pradprymalniki taksama nia zmohuć być uładalnikami redakcyjaŭ, tolki jurydyčnyja asoby. Budzie sproba ŭrehulavać zamiežnuju dapamohu vydańniaŭ. U biełaruskim ŚMI ŭ statucie moža być tolki 30 % zamiežnaha kapitału. Dapamoha ad zamiežnikaŭ, što nie prapisanyja ŭ statucie, admaŭlajecca faktyčna całkam.
Piśmovaje papiaredžańnie vydańniu moža być vyniesienaje navat za niapravilna ŭkazany nakład. Jašče adna cikavostka — papiaredžańni ŚMI ciapier zmoža vynosić nia tolki Ministerstva infarmacyi, ale i luby rajonny prakuror!
U Zakonie jasna prapisana, što žurnalistu zamiežnaha ŚMI zabaraniajecca pracavać na terytoryi Biełarusi biez akredytacyi MZS. Ale pakarańnie ŭ vypadku parušeńnia pakul nie prapisanaje.
