 Fota russiansanfran.com |
Siaredniaja ekspartnaja cana rasiejskaha hazu dla eŭrapiejskich spažyŭcoŭ užo ŭ 2008 h. składzie $401‑402 za tys. kubametraŭ, pieradaje słovy namieśnika staršyni praŭleńnia «Hazpromu» Alaksandra Miadźviedzieva Gazeta.ru. Pieršapačatkova «Hazprom» prahnazavaŭ na hety hod inšuju canu ‑‑ $310. Adnak, pavodle novych prahnozaŭ manapolii, cana hazu paraŭnalna ź minułym hodam vyraście na 47%, a cana na naftu marki Brent vyrasła za paŭhoda ŭžo na 45%.
Eksperty nie vyklučajuć, što takuju ž canu «Hazprom» vystavić i Ukrainie. Cikava toje, što hetuju sytuacyju kamentujuć palitolahi, a nie ekanamisty. Ekspert Centra palityčnaj kańjunktury Dźmitry Abzałaŭ miarkuje, što Rasieja takim čynam atrymaje dadatkovyja vahary cisku na svaich susiedak:
«Ceny buduć pierahladacca štokvartalna, akramia taho, vyznačacca jany buduć nie pavodle asobnych damovaŭ, a zychodziačy z pakazčykaŭ suśvietnych biržaŭ. Na praktycy heta aznačaje, što ni Ŭkraina, nie Biełaruś nia zmohuć patrabavać dla siabie lhotnych umovaŭ nie dajučy ničoha ŭzamien. Tym bolš, što Eŭropa ich bolš nie padtrymaje».
Palitolah miarkuje, što novyja ŭmovy dazvolać Rasiei damahčysia ad krainaŭ Bałtyi vykanańnie pravoŭ rasiejskamoŭnych hramadzianaŭ, ad Biełarusi — prysutnaści rasiejskaha kapitału ŭ krainie, ad Ukrainy — rašeńnia Čarnamorskaha flotu.
Ekanamičnaja ahladalnica Taciana Manionak miarkuje, što ŭ takich zajavach niama ničoha dziŭnaha:
«Cana na haz vyznačajecca canoj na naftu, a jana, jak viadoma, uvieś čas raście. Dyj dla Rasiei rost cenaŭ na naftu i haz staŭsia niečakanym».
Pavodle jaje słovaŭ, Biełaruś i Rasieja ad 2006 hodu viaduć pieramovy na pierachod da siarednieeŭrapiejskaj cany na haz dla biełaruskich spažyŭcoŭ i dla ŭnutranaha rasiejskaha rynku. Apošniaje pradyktavana pryncypami cenaŭtvareńnia Suśvietnaj handlovaj arhanizacyi, kudy apošnija hady aktyŭna imkniecca Rasieja. Padaražańnie enerharesursaŭ stała niečakanym i dla «Hazpromu», što vyliłasia ŭ zajavu pra padaŭžeńnie terminu pierachodu na novyja ceny na ŭnutranym rynku da 2018 hodu (raniej mierkavałasia, što toje zdarycca ŭ 2011 h.). Heta daje ŭradu Biełarusi dadatkovyja mahčymaści dla handlu, kaža T. Manionak.
Jak i infarmacyja pra mahčymaje raźmiaščeńnie amerykanskaj supraćrakietnaj systemy ŭ Litvie. Chutkaja sustreča kiraŭnikoŭ Biełarusi i Rasiei abiacaje prahmatyčny handal i havorka chutčej za ŭsio pojdzie pra tanny haz uzamien za dziaržaŭnuju majomaść. Pa słovach eksperta, uradu Biełarusi, jaki ahučyŭ zaplanavanyja na nastupny hod asnoŭnyja ekanamičnyja pakazčyki, zasnavanyja i na prahnazavanych cenach na paliva ŭ tym liku, niama kudy adstupać.
«Biełaruś pakul karystajecca z spryjalnaj kańjunktury na rynku naftapraduktaŭ i kalijnych uhnajeńniaŭ, ale cana ŭ $200 za tysiaču kubametraŭ hazu — heta krytyčna dla biełaruskaj ekanomiki» — padkreśliła spn. Manionak.
Na jaje dumku, baki mohuć pahadzicca i na mienšaj ličbie, skažam $160, ale Biełarusi daviadziecca zapłacić za hetuju canu. Salidaryzavacca dziela vyrašeńnia prablemaŭ tranzytu paliva z Ukrainaj Biełaruś moža tolki ŭ skrajnim vypadku, dadała ekspert.
