 |
U zakaznym liście na imia inicyjataraŭ stvareńnia PAHA «Ruch «Za svabodu» namieśnik načalnika ŭpraŭleńnia hramadskich abjadnańniaŭ Ministerstva justycyi Ja. Kiryčenka analizavaŭ vystupy i publičnyja zajavy Alaksandra Milinkieviča dy inšych aktyvistaŭ Ruchu i zrabiŭ vysnovu, što realnyja mety stvareńnia i dziejnaści hramadskaha abjadnańnia nie adpaviadajuć ukazanym va ŭstaŭnych dakumientach metam i zadačam. Jany, na dumku čynoŭnika Miniustu, śviedčać pra palityčny charaktar dziejnaści arhanizacyi.
Jak ličyć Miniust, jaki nie maje pretenzijaŭ da metaŭ, paznačanych u statucie, realnyja mety PAHA «Ruch «Za svabodu», nie adpaviadajuć patrabavańniam zakanadaŭstva Respubliki Biełaruś, što ŭ adpaviednaści z artykułam 15 Zakona RB «Pra hramadskija abjadnańni» źjaŭlajecca padstavaj dla admovy ŭ dziaržaŭnaj rehistracyi.
Inicyjatary stvareńnia Ruchu ličać, što Miniust faktyčna karaje arhanizacyju, jakaja jašče nie zarehistravana i nie pačała svaju dziejnaść u vyhladzie PAHA «Ruch «Za svabodu», za nieadpaviednaść jaje dziejnaści statutu.
— Miniust niejkim tolki jamu viadomym čynam, na padstavie svaich analityčnych raspracovak vyznačyŭ nibyta realnyja mety jašče niestvoranaj hramadskaj arhanizacyi, acaniŭ jaje dziejnaść u budučym i vynies svoj vierdykt pra nieadpaviednaść hetaj dziejnaści statutu. Napeŭna Ministerstva justycyi źbirajecca zaniać nišu hadałak i ekstrasensaŭ, rekłama jakich niadaŭna zabaroniena pałataj pradstaŭnikoŭ, — kaža siabra Rady PAHA «Ruch «Za svabodu» Juraś Hubarevič.
— Adkaz ź Miniusta śviedčyć ab tym, što ŭłady pryncypova admaŭlajucca rehistravać hramadskija abjadnańni, jakija na ich dumku «niapravilnyja». Mierkavańni hramadskich dziejačaŭ ab palityčnaj, ekanamičnaj i praŭnaj situacyi ŭ krainie źjaŭlajucca dla čynoŭnikaŭ padstavaj dla nierehistracyi PAHA «Ruch «Za svabodu», što na maju dumku absalutna nie dapuščalna i havoryć pra toje, što ŭ nas zabaroniena navat svaboda dumki. Miniust faktyčna parušaje «prezumpcyju nievinavataści», kali arhanizacyja, jakaja jašče nie stvorana, užo karajecca, — ličyć siabra Rady PAHA «Ruch «Za svabodu» Alaksiej Kavalec.
Kab była choć niejkaja prystojnaja začepka, Miniust źviarnuŭ uvahu na toje, što ŭ harantyjnym liście ad pradpryjemstva, jakoje hatova dać jurydyčny adras stvarajemaj arhanizacyi ŭ naźvie «Pravaabaronča‑aśvietnickaje abjadnańnie «Ruch «Za Svabodu», jakomu pradastaŭlajecca jurydyčny adras, adsutničaje słova «hramadskaja». Miniust robić vysnovu, što hety dakumient harantuje najaŭnaść juradrasa dla niejkaj inšaj arhanizacyi. Kali Ministerstva justycyi viartała sabranyja dla rehistracyi dakumienty na dapracoŭku, siarod zaŭvah hetaha punktu nie było.
— My ličym admovu absurdnaj i abaviazkova budziem jaje abskardžvać u Viarchoŭnym sudzie, — dadaje Juraś Hubarevič.
