 |
Na hety momant tolki nacyjanalny apieratar elektrasuviazi "Biełtelekam" pradastaŭlaje pasłuhi biespravadnoha dostupu ŭ interniet pa technałohii Wi-Fi — biaspłatna ŭ režymie doślednaj ekspłuatacyi. Ź leta 2007 hoda pa krainie arhanizavana bolš jak sto chotspotaŭ (punktaŭ dostupu) z vykarystańniem abstalavańnia dadzienaha standarta.
Jak patłumačyli BiełaPAN u RUP "Biełtelekam", z 7 lipienia atrymać dostup u interniet pa technałohii Wi-Fi možna budzie z dapamohaj kartak dostupu. Pakul jany vypuščany ŭ dvuch naminałach: 60 chvilin i 180 chvilin. Kartki Wi-Fi abodvuch naminałaŭ možna nabyć u servisnych punktach, punktach kalektyŭnaha karystańnia i servisnych centrach "Biełtelekama". Košt kartki naminałam 60 chvilin składaje 1.600 rubloŭ, naminałam 180 chvilin — 4.000 rubloŭ. Dla dostupu ŭ interniet nieabchodna ścierci achoŭny słoj, pad jakim ukazany łohin i parol dla aŭtaryzacyi.
Dostup u interniet z dapamohaj kartak ažyćciaŭlajecca ŭ zonie dziejańnia punktaŭ Wi-Fi "Biełtelekama". Chutkaść pieradačy źviestak zaležyć ad kolkaści karystalnikaŭ, što znachodziacca ŭ zonie dziejańnia adnaho chotspota. Heta abumoŭlena asablivaściami technałohii, jakaja raźmiarkoŭvaje chutkaść padklučeńnia Wi-Fi-punkta kratnaje kolkaści karystalnikaŭ, aŭtaryzavanych u zonie jaje pakryćcia.
Wireless Fidelity (Wi-Fi) — sučasnaja biespravadnaja technałohija padklučeńnia kampjuteraŭ da internieta, zasnavanaja na vykarystańni radyjochvalaŭ. Wi-Fi-dostupam mohuć karystacca ŭładalniki noŭtbuka i kišennaha piersanalnaha kampjutera, vieb-kamiery i biespravadnoha IP-telefona, asnaščanych adpaviednym modulem. Technałohija Wi-Fi šyroka vykarystoŭvajecca dla arhanizacyi biespravadnoha dostupu da internieta ŭ hramadskich miescach: u kafe, na vakzałach, u aeraportach, na vulicach.
