Skandał razhareŭsia paśla matču trynaccataha turu čempijanatu Biełarusi pa futbole miž «Viciebskam» i navapołackim «Naftanam». Jak vyśvietliŭ žurnalist hazety «Priessboł» Alaksandar Šyłovič, arbitar matču Siarhiej Šmolik byŭ pjanym.
Matč tranślavaŭsia ŭ žyvym etery na kanale «Ład». Mnostva telehledačoŭ pa ŭsioj krainie mahli zadacca pytańniem: što zdaryłasia z arbitram, jaki naprykancy matču tolki i rabiŭ, što trymaŭsia za śpinu, a stadyjon zmoh pakinuć tolki pry dapamozie persanału.
Jak potym stała viadoma, hledačy, jakija pryjšli padtrymać svaju kamandu, ad pačatku druhoha tajmu tolki i rabili, što śmiajalisia ź niazhrabnych ruchaŭ refery, jaki nie pakidaŭ centralny kruh. Mahło skłaścisia ŭražańnie, što źviało śpinu — z kožnym moža zdarycca. Adnak realnaść akazałasia našmat bolš prazaičnaja i brutalnaja — Šmolik vyjšaŭ na matč «pad muchaj».
Pa skančeńni hulni (jakuju Šmolik usio ž adpracavaŭ), sudździu adrazu advieźli na viciebski traŭmapunkt, dzie dziažurny lekar nasamreč kanstatavaŭ prablemy sa śpinoj.
Za hadzinu ž da adjezdu z horadu nad Dźvinoj Siarhiej Šmolik pahadziŭsia na vizyt u miascovy narkalahičny dyspanser. Vynik ekspertyzy — 2,6 pramile alkaholu ŭ kryvi. Norma dla kiroŭcy aŭtamabila ŭ Biełarusi składaje 0,5 pramile. Takim čynam, uzrovień alkaholu byŭ pieravyšany ŭ piać razoŭ. Jak kaža Šyłovič, Šmolik pasprabavaŭ apraŭdacca tym, što vypiŭ užo paśla hulni, ale nakačacca za nievialiki termin da takich ličbaŭ paprostu niemahčyma.
Šyłovič taksama adkazvaje na pytańnie, čamu ž Šmolik pahadziŭsia na narkalahičnuju ekspertyzu. Akazvajecca, arbitar FIFA spadziavaŭsia padmianić svaje analizy na ŭdychańni absalutna ćviarozaha čałavieka, ale nie paśpieŭ.
Bieraściejec Siarhiej Šmolik źjaŭlajecca adnym z najlepšych biełaruskich arbitraŭ: aproč matčaŭ biełaruskaha pieršynstva (tut jon adsudziŭ 247 hulniaŭ), sudździa absłuhoŭvaje sustrečy mižnarodnaha značeńnia — eŭrakubki, matčy zbornych. Tamu taki incydent kładziecca čornaj plamaj na rejtynh biełaruskaha futbołu i ŭ mižnarodnym kantekście.
Letaś Biełaruskaj federacyjaj futbołu Šmolik byŭ pryznany najlepšym ajčynnym sudździom hodu.
Jak paviedamlaje «Priessboł», u paniadziełak sudziejski kamitet BFF pryniaŭ rašeńnie nie pryznačać Siarhieja Šmolika na matčy nacyjanalnaha pieršynstva da vyśviatleńnia ŭsich abstavin. Takoha ŭ historyi biełaruskaha futbołu jašče nie było nikoli.
