U stalicy pačalisia masavyja dopyty nasielnictva. Milicyja miarkuje apytać usich žycharoŭ horadu šlacham pakvaternaha abychodu.
U pracy biaruć udzieł supracoŭniki MUS roznych padraździaleńniaŭ, u tym liku kursanty navučalnych ustanoŭ MUS.
Ludzi ŭ milicejskaj formie, u zvańniach ad šarahoŭca da praparščyka, pa dva ažyćciaŭlajuć pakvaternaje apytańnie ŭsich žycharoŭ u suviazi z vybucham.
Supracoŭniki milicyi praviarajuć dakumenty žycharoŭ kvater i cikaviacca tym, dzie jany byli i čym zajmalisia ŭ noč na 4 lipienia, a mužčyn apytvajuć, ci prachodzili jany słužby va Ŭzbrojenych siłach, i kali tak, to dzie słužyli i da jakoha rodu vojsk adnosilisia.
Supracoŭnikaŭ MUS asabliva cikaviła, ci prymali apytanyja žychary ŭdzieł u bajavych dziejańniach i ci prysutničali ŭ zonach lakalnych kanfliktaŭ.
Tych asobaŭ, jakija śćviardžalna adkazvali chacia b na adno pytańnie, papiaredžvali, kab jany byli hatovyja da taho, što supracoŭniki śledčych orhanaŭ MUS ź imi jašče raz skantaktujucca.
Masavyja apytańni miarkujuć skončyć za tydzień.
Ciažka zrazumieć, što moža dać apytańnie amal dvuch miljonaŭ žycharoŭ stalicy dla kankretnaha śledztva ŭ spravie vybuchaŭ, akramia błytaniny i bieźličy pamyłkovych śladoŭ. Havorka ž nie pra apytańnie śviedkaŭ ci žycharoŭ prylehłych damoŭ. Usio heta vyhladaje jak tupaja maštabnaja akcyja zapałochvańnia. Možna čakać, što jana taksama padšturchnie ludziej da źviadzieńnia rachunkaŭ z susiedziami i inšych incydentaŭ. Taksama varta čakać pa jaje vynikach novych niematyvavanych zatrymańniaŭ ludziej, suprać jakich niama nijakich kankretnych dokazaŭ.
