 |
Bolšaść pytańniaŭ byli źviazanyja z vybarčaj kampanijaj u parlament, jakaja ŭžo pačałasia ŭ krainie. U pryvatnaści, Jarmošynu zapytalisia, ci jość šancy trapić u pałatu pradstaŭnikoŭ pradstaŭnikam palityčnych partyj, u tym liku i apazycyjnych.
«Pakolki ahulny pracent siabraŭ palityčnych partyj siarod nasielnictva mizerny, to heta, naturalna, zvodzić na nie šancy partyjcaŭ, u tym liku i apazycyjnych, być abranymi. Da nas časta źviartajucca hramadzianie z pretenzijami, čamu pa niejkaj vybarčaj akruzie nie prachodzić nivodny biespartyjny kandydat u deputaty. To bok siabroŭstva ŭ partyi źjaŭlajecca pieraškodaj, kab addać jamu pieravahu. U hramadztvie pakul kacirujucca kandydaty, jakija nia źviazanyja z palityčnymi partyjami. Całkam mahčyma, što heta vodhuki toj partyjnaj systemy, ź jakoj my pražyli vielmi doŭha. Tamu ŭ hramadzian isnuje peŭny niedavier da partyjnych kandydataŭ», — skazała Ł.Jarmošyna.
Nahadajem, što Abjadnanyja demakratyčnyja siły vyłučajuć svaich kandydataŭ va ŭsie 110 vybarčych akruhaŭ. Padaŭlalnaja bolšaść vyłučencaŭ ad apazycyi źjaŭlajucca siabrami palityčnych partyj.
Taksama Jarmošyna prakamentavała razmovy adnosna taho, što dźvie traciny parlamentu mohuć źmianicca paśla hetych vybaraŭ.
«Raniej my havaryli pra 30% deputataŭ, jaki, całkam mahčyma, zastanucca ŭ parlamencie. Zaraz my havorym pra bolšuju kolkaść patencyjnych kandydataŭ ź ciapierašniaha parlamentu. Zrešty, heta nia bolej, čym palityčnyja prahnozy», — ličyć spn.Jarmošyna.Raskazała staršynia CVK i pra toje, što chacieła b naviedać Francyju i Italiju, ale nia moža praz zabaronu na ŭjezd Eŭrasajuzu.
