Siońnia z turmy na vulicy Akreśćina ŭ Miensku vypuścili aktyvistaŭ Abjadnanaj hramadzianskaj partyi Michaiła Paškieviča i Vitala Stažarava.
Aktyvistaŭ “Maładych demakrataŭ” Michaiła Paškieviča, Vitala Stažarava i Kiryłu Paŭłoŭskaha zatrymali 11 lipienia. Sud ich aryštavaŭ: Kiryłu na 10 sutak, a Michaiła i Vitala na 15. Milicyjanty źvinavacili chłopcaŭ u łajancy matam.
Michaił Paškievič apavioŭ: “Nas zatrymali litaralna praz 20 chvilin jak my vyjšli z budynku KDB, dzie my chacieli daviedacca pra los našaha paplečnika Alaksandra Sierhijenki, jaki byŭ zatrymany ŭviečary na svajoj kvatery. U KDB nam ničoha nie patłumačyli. Jak my vyjšli, pabačyli, što vakoł snujuć amapaŭcy. Na padychodzie da Niamihi nas ź Vitalom Stažaravym zatrymali. I ŭ Centralnym RAŬSie my pabačyli, što zatrymali jašče i Kiryłu Paŭłoŭskaha. Spačatku dumali, što zatrymali nas taksama pa abvinavačańni ŭ vybuchu. Potym, vidać, jany vyrašyli, što dosyć hetych užo “uzryŭnikoŭ” i treba, kab niechta ŭžo siadzieŭ za łajanku matam. Nie samy lepšy varyjant – amal miesiac pravioŭ na Akreścina. Vypuścili na 5 dzion i znoŭ zabrali na dva tydni”.
Michaił, Vital i Kirył siadzieli ŭ adnoj kamery, a paśla vyzvaleńnia Kiryła, chłopcaŭ raskidali pa roznych kamerach.
“Nikomu nia raju letam bavić svoj čas na Akreścina. Akreścina – heta “sanatoryj” dla apazycyjaneraŭ. Faktyčna zabrali ni za što. Im značna lepš sadžać čałavieka na sutki. Jon, zdajecca, i nie palitviazień, a ź inšaha boku, jon nie na voli. I jašče pytańnie, što bolš adbivajecca na zdaroŭi”.
Vital Stažaraŭ apavioŭ: “Maładyja demakraty” buduć asnoŭnym jadrom u hetaj vybarčaj kampanii i tamu nia dziŭna, što pačaŭsia taki presinh. Ciažka, ale ciapier było lahčej, čym u studzieni, kali atrymaŭ 20 sutak. Letam ciaplej, a zimoj było vielmi choładna. Ciažka, kaniečnie, faktyčna, 15 sutak pravioŭ u hramadzkaj prybiralni. Kamery – try na piać. 15 sutkami mianie nie zapałochaješ i budu praciahvać hnuć svaju liniju”.
Zakratavanaje vakno kamery Michaiła Paškieviča vychodziła na vulicu, i jon moh bačyć, jak vyzvalali inšych apazycyjaneraŭ, jakich jamu ŭdałosia navat pryvitać.
“Ja mieŭ asałodu bačyć, jak vyzvalajuć majho siabra Illu Bohdana, paplečnika Antona Kojpiša. Pavinšavać z vyzvaleńniem – heta narmalova. Ja prosta zrazumieŭ, što bolš sutak mnie nie dadaduć u lubym vypadku. Ja pabačyŭ, što jon heta pačuŭ, i ŭ jaho nastroj padniaŭsia”.
Staršynia AHP Anatol Labiedźka zajaviŭ, što źviazvaje aryšty aktyvistaŭ apazycyi mienavita z vybarčaj kampanijaj. “Michaś uznačalvaje zdvojeny štab pa Leninskim rajonie, Vital Stažaraŭ, naohuł, usioj moładździu kiruje. A heta vielmi mocnaja siła pad čas vybarčaj kampanii. Tamu my jakraz źviazvajem heta z praviadzieńniem vybarčaj kampanii. 10-15 dzion ludzi, jakija arhanizoŭvali pracu, vybyli. Kaniečnie, heta nie spyniła pracu, ale adbiłasia na niekatorych nakirunkach davoli istotna”.
 Michaś Paškievič (źleva) i Vital Stažaraŭ. |
