Čym kiravaŭsia Saakašvili, rušyŭšy vojski na Cchinvali? Niaŭžo jon usurjoz ličyŭ, što Rasieja nie zreahuje? Na što byŭ raźlik?
Ci moh Saakašvili addać vojskam zahad pra ataku, nie pastaviŭšy ŭ viadomaść ZŠA? Heta małaimavierna, uličvajučy asablivyja adnosiny Tbilisi i ZŠA. Znakamity reparcior Vojciech Jahielski piša z Tbilisi, što plan udaru byŭ raspracavany prynamsi hod tamu. Navat kali z Vašynhtonam heta nie ŭzhadniałasia, ciažka sabie ŭjavić, kab amerykanskaja vyviedka taho nia viedała. U takim razie maŭklivaja padtrymka rejdu ŭ Asiecii kładziecca ŭ ahulnuju kanvu samanadziejnaje zamiežnaj palityki administracyi Buša. Vynik hetaj palityki — stabilna 100—150-dalaravyja ceny na naftu i 50 tysiač achviaraŭ u Iraku.
Ci była pravakacyja Rasiei? Jasna, što
150 tankaŭ prosta tak na miažy napahatovie nie stajać.Možna zaŭvažyć, što napiaredadni kanfliktu ŭ Cchinvali źjechalisia žurnalisty praktyčna ŭsich rasiejskich ŚMI i z Cchinvali vyvieźli dziaciej. Ale mastactva palityka ŭ tym i prajaŭlajecca, kab nie paddavacca na pravakacyi. Aŭstryjskaja žurnalistka Kryścina Kurčab-Redlich, jakaja doŭhi čas była karespandentkaj u Čačenii, z tonkim viedańniem kulisaŭ kaŭkaskaje palityki i jaje praciahaŭ inšymi srodkami, adznačaje, što tuju samuju taktyku Pucin užyvaŭ dla atak na čačencaŭ – padšturchnuć praciŭnika da pamyłak i skarystać ich jak padstavu.
Čaho chacieli dabicca hruziny? Jany chacieli spravakavać paniku svaim masiravanym udaram pa asiecinskich pazycyjach i z nalotu ŭziać usio. Toj fakt, što jany nie pierakryli Rokskaha tunelu navodzić na dumku, što jany sapraŭdy pravakavali masavyja ŭcioki asiacinskaha nasielnictva i pieradusim vajskoŭcaŭ, kab pačać handal postfaktum.
Ci sapraŭdy Cchinvali ściorty z tvaru ziamli i ŭ im zahinuła 2000 mirnych žycharoŭ? Rasijskija specsłužby sprabujuć zrabić zrajuić kalku z aśviatleńnia juhasłaŭskich vojnaŭ. Zdajecca, rasiejskaja prapahanda niamała manić, pierabolšvajučy adny i źmianšajučy inšyja ličby.
Čaho dabiłasia Hruzija ŭ vyniku svajoj avantury? Hruziny pakazali, što heta nia nacyja bajaźliŭcaŭ, što jany ŭmiejuć vajavać, kali majuć zbroju. Taksama jany pakazali,
jak chutka moža źmianić krainu pierabudova krainy na eŭrapiejski ład, bo jašče piać hadoŭ tamu Hruzija była niedadziaržavaj. Jany pakazali asiacinam, što tym nia žyć spakojna ŭ svaich ciaśninach biaź miru z Tbilisi. Ale hadoŭ na 20, na peryjad pamiaci pakaleńnia, Hruzija straciła mahčymaść pamirycca z asiacinami, viarnuć Asieciju.
Kali Tbilisi chacieŭ takim čynam sarvać šyrmu z pazycyi Rasiei i spravakavać Maskvu na ŭvod vojskaŭ, jon svajho dabiŭsia.Saakašvili moh kiravacca tym, što Asiecija sychodziła biez varyjantaŭ, i važna było b choć pakazać, što heta rasijskaja akupacyja, a nijaki tam nacyjanalny kanflikt. Tolki raniej jon mieŭ u Cchinvali 500 rasiejskich vajskoŭcaŭ, jakich Hruzija była zdolnaja zablakavać i izalavać na praciahu niekalkich hadzinaŭ, jak toje i zrabiła 8 žniŭnia, a zaraz budzie mieć cełuju 58-ju armiju.
Ci viedała Rasieja pra rejd zahadzia? Vyhladaje, što tak, ale vyčekvała. Ministar zamiežnych spravaŭ Švecyi paraŭnaŭ dziejańni Rasiei z taktykaj Hitlera, jaki taksama ŭmieła vykarystoŭvaŭ abaronu «suajčyńnikaŭ» jak padstavu dla ŭmiašańnia va ŭnutranyja spravy susiedziaŭ, a paśla i dla poŭnaha padparadkavańnia ich, i ŭsio heta pry poŭnym niežadańni zachodnich demakratyj umiešvacca ŭ niajasnyja ŭschodnija spravy.
Bambaviki nad Marneuli vyklikali złaviesnyja ŭspaminy ŭ Chelsynki i Ryzie i dryžyki ŭ Kijevie.
Pačvary vyleźli z skrynki Pandory, i taja skrynka nazyvałasia Kosava, i adkryŭ jaje Džordž Buš. Kali Amerycy možna adarvać Kosava ad suverennaj dziaržavy, to čamu Rasiei niamožna zrabić toje samaje z Asiecijaj? Tak, u Kosavie albancaŭ było 90%, a ŭ Asiecii asiacinaŭ dźvie traciny. Tak, Kosava było specyjalnym vypadkam, ale Kosava moža akazacca i precedentam.
Jakoje mahło b być vyjście z sytuacyi? Vielmi prostym: Tbilisi nastupaje na horła ŭłasnaj pieśni,
pryznaje niezaležnaść Asiecii i Abchazii, abtrasaje hetyja łancuhi, jakija zaminajuć Hruzii dałučycca da NATO i Eŭrasajuzu. Pad parasonam NATO i ES Hruzija nabyła b harantyi suverenitetu. Ničoha fatalnaha ŭ takoj stracie dla Hruzii nie było b. Zatoje Rasieja straciła b padstavy dla ŭmiašańnia.
Ci realny taki varyjant? Nie, nie realny paśla taho što što adbyłosia, kali ŭ Hruzii nahniecienyja iredentysckija nastroi. Ź inšaha boku, tak, realny — a čamu b nie pryznać rečaisnaść rečaisnaściu? — tolki nie pry hetym pakaleńni palitykaŭ. Patrebnaja inšaja palityčnaja vola i intelektualnaja pryzma.
Jakaja navuka dla Biełarusi? Pieršaje — biełaruskaja dyplamatyja dakazała svaju zdolnaść da aperatyŭnaha reahavańnia, ad pačatku zaniaŭšy nejtralnuju pazycyju. Druhoje — mahčymaść atrymańnia padvojnaha hramadzianstva implikuje stratehičnyja ryzyki dla susiedziaŭ Rasiei. Treciaje — Rasieja pierajšła na novuju stadyju imperyjalizmu, na jakoj hatovaja da bolš aktyŭnaha ŭžyćcia vajennaj siły dla prasoŭvańnia svaich ekanamičnych intaresaŭ. Kali siońnia ŭ Hory i Cchinvali, to čamu zaŭtra nia ŭ Krymie, a pazaŭtra nia ŭzdoŭž «Jamału-Eŭropy»? Čaćviortaje, kryvavaja sutyčka na mikraskapičnym łapiku nahadała, što čałaviectva moža lohka skacicca da novaha suśvietnaha kanfliktu, i z rostam ekanamičnaj mahutnaści Rasii jaje palityčnyja pretenzii i psychalahičnyja traŭmy stvarajuć dla taho padstavy. Asiacinskaja vajna pakazała
nieabchodnaść dalejšaje raspracoŭki daktryny nejtralitetu Biełarusi.
