Maskva vusnami palitolaha Andreja Suzdalcava zrabiła suvoruju vymovu biełaruskamu kiraŭnictvu. Maŭlaŭ, u dramatyčny čas bitvy na Kaŭkazie partner pa sajuznaj dziaržavie nie padtrymaŭ, uchiliŭsia, faktyčna — zdradziŭ.
"Jak havorycca, uličym da studzienia", — piša aŭtar, majučy na ŭvazie canu na haz.
Kaniečnie, i ŭ Maskvie nia ŭsie hladziać na kryvavyja kaŭkaskija padziei ź imperskaje zvanicy. Tak, Julija Łatynina žorstka charaktaryzuje režym Paŭdzionnaj Asetyi jak "sumiesnaje pradpryjemstva" čekisckich hienerałaŭ dy miascovych kryminalnych elementaŭ pa asvajeńni hrošaj "na baraćbu z Hruzijaj". Abjadnany hramadzianski front zajaŭlaje pra "šmathadovuju biazdarnuju i dvurušnickuju palityku rasiejskaha kiraŭnictva na Kaŭkazie ŭvohule i datyčna Hruzii ŭ pryvatnaści". Ale heta — hałasy tych, chto adsunuty na marhines. Daminuje ž patas vialikadziaržaŭnaści.
Adrazu ahavarusia: nia varta traplać i ŭ pałon antyrasiejskaj paradyhmy. Inačaj atrymlivajecca, što Saakašvili va ŭsich svaich učynkach apryjory maje racyju, bo Hruzija maleńkaja, a Rasieja — vialikaja. Heta, kaniečnie, nia tak.
Razam z tym, adnoj z hałoŭnych pryčyn vajny ŭ Hruzii stała toje, što Rasieja nie vybiraje srodkaŭ, imknučysia trymać postsavieckija krainy na kručku.
Daktryna "kiravanaha chaosu" praz padtrymku separatysckich režymaŭ u Paŭdzionnaj Asetyi i Abchazii była raźličana, u pryvatnaści, na toje, kab pieraškodzić drejfu Tbilisi ŭ bok NATO: aljansu niedarečy siabry z terytaryjalnymi prablemami.
Ale kiravany chaos u luby momant moža stać niekiravanym. Ružžo na ścianie kaliści abaviazkova strelić.
A takich ružžaŭ na postsavieckim absiahu raźviešana bahata. Były ambasadar ZŠA u AAN Chołbruk zajaviŭ: nastupnaj paśla Hruzii budzie Ŭkraina!
Pierabolšańnie, epataž? Ale zhadajma, jak daŭno dy metanakiravana raspalvajuć maskoŭskija dziejačy prablemu Sevastopala dy Krymu. I znoŭ ža: Kramlu nie pad nos, što Kijeŭ hladzić u bok NATO. Zaraz Maskva, darečy, zakidaje Ŭkrainie "zaachvočvańnie Hruzii da interviencyi". Što ž, Kijeŭ tolki śćvierdzicca ŭ svaim prazachodnim vybary.
Miensk ža ŭ hetaj sytuacyi, jak i prahnazavałasia ŭ papiarednim postynhu, abačliva dystancyjavaŭsia ad kaŭkaskaj vajny.
"Toje, što Miensk dasiul abmiežavaŭsia tolki zajavaj pradstaŭnicy MZS z zaklikam da ŭsich bakoŭ spynić bajavyja dziejańni, vyhladaje całkam razumnym, — miarkuje mienski niezaležny ahladalnik Raman Jakaŭleŭski. — Hetak sama, jak i niedałučeńnie da rasiejskich sankcyjaŭ u dačynieńni da Tbilisi. U nas niama vizavaha režymu i praciahvajuć ažyćciaŭlacca naŭprostavyja avijarejsy ŭ hruzinskuju stalicu. I biełarusy pjuć baržom".
Razam z tym analityk padkresllivaje: na tle kaŭkaskich padziejaŭ asabliva vidavočna, što Biełarusi "składana być u vajskova-stratehičnaj zaprežcy z Rasiejaj". Jakaŭleŭski zaznačaje: "Naprykład, toje, što ŭ vosieńskich maneŭrach biełaruskaha vojska majuć namier udzielničać VPS Rasiei, z ulikam ciapierašnich pavodzin Maskvy na Kaŭkazie moža vyklikać napružanaść užo ŭ našym rehijonie".
Dadamo: jašče bolej niebiaśpiečnymi mohuć być hulni ŭ roznyja tam "asymetryčnyja adkazy" z vykarystańniem "iskanderaŭ" i h.d. Fantazii maskoŭskich jastrabaŭ siahajuć daloka.
Vuń hienerał Ivašoŭ dyk i ŭvohule miarkuje, što Miensku nia škodziła b padumać pra vychad ź Lisabonskaha pratakołu, kab možna było pastavić u nas jadziernuju zbroju.
Tym časam pratačyłasia kanfidencyjnaja infarmacyja pra razmovu Siarhieja Łaŭrova z Kandalizaj Rajs. Kali vieryć amerykanskamu boku, rasiejski ministar deklaravaŭ umovu: Saakašvili musić syści! Łaŭroŭ paśpiašaŭsia zajavić, što heta niekarektnaja traktoŭka. Tak ci inačaj, daktryna "svaich sučynych synoŭ" pa-raniejšamu zapatrabavanaja. My dobra pamiatajem, jak Maskva sprabavała nakinuć hruzinam źbiehłaha dziejača Hijarhadzie. Dyj na Ŭkrainie, pamiatajecie, Pucin asabista łabijavaŭ kandydaturu Janukoviča ŭ piku prazachodniamu Juščanku.
I ŭžo možacie nie sumniavacca: kali Maskva adčuje, što "stračvaje" Biełaruś, tut jašče mohuć razharnucca vielmi krutyja siužety.
Pracytujem jašče adnu vysnovu A.Suzdalcava: "…Sa źniknieńniem (sic! — Aŭt.) A.Łukašenki ź Miensku prablem u Maskvy z čarhovym biełaruskim kiraŭnictvam nie pamienieje".
Asobnym maskoŭskim dziejačam nie prychodzić u hałavu prostaje dapuščeńnie: a mo' biełarusy i sami raźbiarucca sa svaimi prablemami?
ZY. A voś vam i praciah ukrainskaj temy. Uradavaja "Rośsijskaja hazieta" piša: "U ciapierašni čas Rasiei varta razhladać dziejańni Ŭkrainy jak varožyja z usimi nastupstvami, što vynikajuć z hetaje vysnovy...". Što i patrabavałasia davieści.