«Nam vielmi niezrazumieła, čamu ŭłady Biełarusi zachoŭvajuć ścipłaje maŭčańnie pa situacyi ŭ Paŭdniovaj Asiecii», — takuju zajavu zrabiŭ pasoł Rasii ŭ Biełarusi Alaksandr Surykaŭ na pres-kanfierencyi ŭ Minsku 12 žniŭnia.
«Jość dahavor ab stvareńni sajuznaj dziaržavy. Hramadzianie Rasijskaj Fiederacyi, jakija trapili ŭ Paŭdniovaj Asiecii ŭ niepryjemnyja rečy, jany, farmalna kažučy, i hramadzianie Biełarusi», — skazaŭ A. Surykaŭ. U vypadku «źjaŭleńnia niepryjemnaściej u Biełarusi my vaša hora zaŭsiody raździalajem u mižnarodnych arhanizacyjach», — zaznačyŭ dypłamat. Jon, u pryvatnaści, nahadaŭ, što Rasija zaŭsiody vystupała suprać uviadzieńnia ekanamičnych sankcyj u adnosinach da Biełarusi, a taksama abaraniała pazicyju krainy pry abmierkavańni situacyi z pravami čałavieka.
A. Surykaŭ źviarnuŭ uvahu na toje, što Biełaruś nie prapanoŭvała humanitarnuju dapamohu dla paciarpiełych u hruzina-asiecinskim kanflikcie. «My viedajem, što Kanstytucyja Biełarusi zabaraniaje vykarystańnie biełaruskich vojskaŭ za miežami krainy, ale humanitarnaja składovaja mahła b prysutničać. Akramia taho, mahła b być padtrymka na słovach, što i my zaŭsiody robim dla Biełarusi», — zajaviŭ rasijski pasoł.
