Brytanskaje niezaležnaje ahienctva Information Commissioner's Office (ICO), na jakoje ŭskładzienyja abaviazki pa abaronie pryvatnaj infarmacyi, zajaviła, što technalohii Google Street View adpaviadajuć normam infarmacyjnaj biaśpieki.
Specyjalizavanym aŭtamabilam Google'a, abstalavanym panaramnymi kamerami, byŭ dadzieny dazvoł rabić zdymki vulic brytanskich haradoŭ, niahledziačy na zaniepakojenaść hramadzkaści. Niekatoryja pravaabrončyja arhanizacyi vykazali zaściarohi, što ŭ kadar mohuć trapić numarnyja znaki aŭtamabilaŭ i tvary ludziej, i što takija zdymki mohuć ujaŭlać pahrozu dla pryvatnych asob.
Z padobnym supraćdziejańniem Google sutyknuŭsia i ŭ inšych eŭrapiejskich krainach, naprykład, u Francyi, dzie kamery kampanii źniali maršrut prestyžnych rovarnych spabornictvaŭ Tur de Frans.
Zhodna z zajavaj ICO, usie detali zdymkaŭ, jakija ŭtrymlivajuć jakuju‑kolviek pryvatnuju infarmacyju, buduć padadzienyja ŭ nieraspaznavalnym vyhladzie na sajcie Google Maps. Pošukavy hihiant u svaju čarhu ćvierdzić, što servis Street View nie parušaje zakonu pra niedatykalnaść pryvatnaha žyćcia. Kampanija taksama prapanuje karystalnikam paviedamlać pra zdymki, jakija im padaducca niedarečnymi. Takija vyjavy buduć vydaleny z servera.
Google Street View pačaŭ dziejničać u traŭni 2007 hodu ŭ ZŠA. Choć specyjalizavanyja aŭtamabili Google byli nieadnarazova zaŭvažanyja ŭ Vialikabrytanii, kampanija pakul nie paviedamlała pra toje, kali vyjavy vulic źjaviacca na mapach krainy.
