BATE nie davaŭ raźviarnucca ŭ atacy baŭharskim forvardam.
Čempijon Biełarusi nie stamlaje ździŭlać svaim sioletnim vystupam u Lizie čempijonaŭ. Spačatku pieramoha na klasie nad iślandzkim «Valuram», paśla supraćstajańnie belhijskim «Anderlechtam», dzie kamanda ni na imhnieńnie nie dała zasumniavacca ŭ svajoj pieravazie, a ciapier haściavy vyjhryš u baŭharskaha «Leŭskaha»!
Uvohule, u baŭharaŭ pierad matčam daminavaŭ šapkazakidalnicki nastroj. Nu kali nie bujnaja pieramoha, to 2:0, dyk dakładna pieramožam. Pra toje kazaŭ navat trener «Leŭskaha» Vielisłaŭ Vucaŭ. Sapraŭdy, BATE heta ž tolki «zavadzkaja kamanda z štučnaj stvoranaj dziaržavy», dadavaŭ prezydent klubu Todar Batkaŭ. Za takija adnosiny da BATE baŭhary i papłacilisia.
Užo ź pieršych chvilin było bačna, što «Leŭski» našmat macniej za toj ža «Anderlecht». Baŭhary, jakich zaklikali iści ŭ ataku šmatlikija fanaty, nia złazili z čužoj pałaviny pola. Udary z roznymi stupieniami ciažkaści sypalisia na Siarhieja Vieramka. Ale naš hałkiper ździŭlaŭ svaim spakojem. Zdajecca, što jahonaja ŭpeŭnienaść pieradałasia i astatnim hulcam.
Zrešty, na 30‑aj chvilinie toj samy Vieramko i Kazancaŭ nie dahladzieli za forvardam «Leŭskaha», i varatar byŭ vymušany parušyć praviły. Mała taho, što švedzki arbitar pryznačyŭ penalci, dyk jašče pakaraŭ našaha kipera papiaredžańniem. Ciapier Vieramko dakładna nie syhraŭ praz dva tydni ź «Leŭskim» u Miensku. Strata vielmi adčuvalnaja.
Padčas prabićcia penalci baŭharskija televizijniki navat nie dali jak śled pachvalavacca za našych. Momant udaru aperatar niedaravalna praziavaŭ. Ale, na naša ščaście, Viaromka vypraviŭ svaju ž pamyłku — taki adbiŭ udar Hieorhi Ivanova.
 |
A jašče praź imhnieńnie niejkich santymetraŭ nie chapiła BATE, kab miač dajšoŭ da Vitala Radzivonava, i toj vyjšaŭ adzin na adzin z bramnikam. Pa spraviadlivaści skažam, što poŭnaj pieravahaj u pieršym tajmie vałodali baŭhary, a ŭ biełarusaŭ miač nie trymaŭsia.
Druhi tajm startavaŭ bolš spakojna. «Leŭski» zvykła atakavaŭ, a Viaromka zvykła praciahvaŭ štampavać adbityja ŭdary. Nu a na 60‑aj chvilinie zdaryłasia niepapraŭnaje dla haspadaroŭ. Idealny navies z vuhłavoha Siarhieja Kryŭca, rasiejski lehijaner BATE Ŭładzimier Ržeŭski pieravisieŭ usich u pavietry i trapna ŭdaryŭ hałavoj. Miač adskočyŭ ad hazonu i varatar byŭ biaśsilny — 1:0!
Čamuści u apošniuju paŭhadziny hulni nie było sumnievaŭ, što BATE vytrymaŭ šturm «Leŭskaha», pakaraje kamandu za jaje pahardlivaje staŭleńnie da supiernikaŭ. Tak jano i atrymałasia.
Samy małady trener u historyi biełaruskaha futbołu Viktar Hančarenka praciahvaje svajo tryjumfalnaje eŭrapiejskaje šeście.
Napeŭna, nikoli ad časoŭ mienskaha «Dynama» druhoj pałovy 1980‑ych hadoŭ nie było takoha kajfu nazirać za našymi kamandami ŭ eŭrakubkach. Da hrupavoha turniru Lihi čempijonaŭ užo rukoj padać. Zastaŭsia apošni, ale samy składany matč. 27 žniŭnia. Mienski stadyjon «Dynama».Brava, BATE! I pośpiechaŭ!
 |
***
Derbi «usiaje SSSR», jak nazyvali matč miž maskoŭskim «Spartakom» i kijeŭskim «Dynama» rasiejskija žurnalisty, prajšoŭ u Maskvie. Kijaŭlanie razhramili vice‑čempijona Rasiei — 4:1. Dva hały na rachunku byłoha našaha suajčyńnika Arcioma Mileŭskaha.
