Krynica ŭ Administracyi prezidenta Biełarusi paćvierdziła BiełaPAN infarmacyju ab tym, što 15 žniŭnia Alaksandr Łukašenka padpisaŭ ukaz ab pamiłavańni Alaksandra Kazulina.
Eks-kandydat u prezidenty Alaksandr Kazulin byŭ asudžany 13 lipienia 2006 hoda. Jaho pryznali vinavatym u naŭmysnych dziejańniach, jakija hruba parušajuć hramadski paradak i spałučany ź niepadparadkavańniem supracoŭnikam milicyi. Palityka pryhavaryli da pazbaŭleńnia voli na piać z pałovaj hadoŭ, adnak sam jon kateharyčna nie pryznaje svajoj viny i nieadnarazova zajaŭlaŭ, što nie maje namieru prasić ab pamiłavańni.
16 žniŭnia A.Kazulina vyzvalili z kałonii "Vićba-3". Pavodle słoŭ dočki palityka Volhi, padstavaj dla vyzvaleńnia stała śmierć cieścia Kazulina Ivana Sabaleŭskaha, jaki pamior siońnia ranicaj. Pachavańnie adbudziecca 17 žniŭnia ŭ Dziaržynsku. Tam ža ciapier znachodzicca A.Kazulin. Padrabiaznaści vyzvaleńnia svajaki i paplečniki palityka nie kamientujuć.
Jak zajaviŭ BiełaPAN juryst i były advakat A.Kazulina Ihar Rynkievič,
zhodna ź biełaruskim zakanadaŭstvam dla vyrašeńnia pytańnia ab pamiłavańni pryznańnie źniavolenym svajoj viny nie z\jaŭlajecca abaviazkovaj umovaj.
Pavodle słoŭ jurysta, artykuł 84 Kanstytucyi adnosić pytańnie ab pamiłavańni asudžanych da rasparadžeńnia prezidenta i z\jaŭlajecca normaj pramoha dziejańnia. "Užo adna takaja farmuloŭka jurydyčna dazvalaje Łukašenku dziejničać pa tym varyjancie, jaki jon paličyć patrebnym", — skazaŭ Rynkievič.
Akramia taho, zaznačyŭ jon, isnuje zaćvierdžanaje ŭkazam prezidenta pałažeńnie ab paradku ažyćciaŭleńnia pamiłavańnia. Jano praduhledžvaje najaŭnaść asabistaha chadajnictva asudžanaha, jakoje razhladajecca śpiecyjalnaj kamisijaj (jaje ŭznačalvaje namieśnik kiraŭnika Administracyi prezidenta Natalla Piatkievič). Adnak kamisija maje daradčy charaktar, jaje rola ŭ pryniaćci rašeńnia niaznačnaja.
"Takim čynam, rašeńnie ab pamiłavańni — heta palityčnaja vola Łukašenki. Patrabavańnie ad Kazulina pryznać vinu nie moža vynosicca jak abaviazkovaja ŭmova dla pamiłavańnia",— zajaviŭ juryst. Pry hetym jon padkreśliŭ, što pazicyja A.Kazulina zastajecca niaźmiennaj — palityk pa-raniejšamu ličyć siabie nievinavatym.
