Pa vynikach raskopak kala vioski Stary Škłoŭ u Škłoŭskim rajonie horad Škłoŭ moža «pastareć» na 400 hadoŭ, ličyć zahadčyk kafiedry archieałohii i śpiecyjalnych histaryčnych dyscyplin Mahiloŭskaha dziaržaŭnaha univiersiteta imia Arkadzia Kulašova doktar histaryčnych navuk Ihar Marzaluk.
Škłoŭ uźnik i peŭny čas isnavaŭ spačatku na miescy sučasnaj vioski Stary Škłoŭ, potym na terytoryi ciapierašniaj vioski Ryžkavičy. U piśmovych krynicach Škłoŭ upieršyniu ŭzhadvajecca dypłamatam Śviatarnaj Rymskaj impieryi Sihizmundam fon Hierbierštejnam pad 1526 hodam.
U ramkach letniaj kompleksnaj ekśpiedycyi 2008 hoda z udziełam studentaŭ VNU i navukovych supracoŭnikaŭ Instytuta historyi Nacyjanalnaj akademii navuk Biełarusi pravodziłasia archieałahičnaje daśledavańnie abarončych zbudavańniaŭ Staroha Škłova. «U vyniku možna zrabić vysnovu, što zamkavym umacavańniam u Starym Škłovie papiaredničała haradzišča (staražytnaje ŭmacavanaje pasialeńnie) V—VII stahodździaŭ našaj ery», — paviedamiŭ archieołah.
Pavodle jaho słoŭ, ad aharodžanaha zvyčajnym draŭlanym płotam pasialeńnia, dzie žyli pradstaŭniki kałočynskaj archieałahičnaj kultury plamionaŭ žaleznaha vieku, Stary Škłoŭ prajšoŭ šlach da zamka z mahutnymi draŭniana-ziemlanymi ŭmacavańniami ŭ druhoj pałovie X stahodździa, skazaŭ vučony.
Radyjevuhlarodny analiz popiełu z rytualnych vohniščaŭ kala asnavańnia abarončaha vała dapamoža ŭstanavić dakładnuju datu zasnavańnia Staroha Škłova, zaznačyŭ I. Marzaluk. Siarod najbolš cikavych archieałahičnych znachodak hetaha siezona jon nazvaŭ nakaniečniki streł IX—X stahodździaŭ, reštki ścien žyłych budynkaŭ XV — pieršaj pałovy XVI stahodździaŭ z frahmientami piečy z harščkovaj kaflaj, doncy jakich klajmionyja hierbam Połackaha kniastva i hierbam kanclera Vialikaha kniastva Litoŭskaha, uładalnika Staroha Škłova Albrechta Haštolda.
