Akazvajecca, na Alimpijskich hulniach seks i sport nia tolki sumiaščalnyja, ale j nierazłučnyja!
Na čas spabornictvaŭ alimpijskaja vioska pieratvarajecca ŭ seks‑fest, dzie załaty medal — kluč da sercaŭ i pakojaŭ tvaich ža supiernikaŭ. Na staronkach brytanskaj The Times kolišni čempijon Anhlii pa nastolnym tenisie j kamentatar Metju Rys raskryŭ tajamnicy intymnaha žyćcia alimpijcaŭ.
«Mianie časta pytajucca, — piša Rys, — ci sapraŭdy ŭ Alimpijskaje vioscy — žyllova‑zabaŭlalnym centry dla najlepšych atletaŭ z usiaho śvietu — panuje taki jur, jak platuć. Harantuju, tak i jość.
Upieršyniu ja ŭdzielničaŭ u spabornictvach u časie Alimpijady ŭ Barselonie ŭ 1992 hodzie, i za tyja dva z pałovaj tydni ŭ mianie było bolej połavych partnioraŭ, čym za ŭsio niealimpijskaje žyćcio.Dla mianie, tady 21‑hadovaha chłapčuka z kryvymi zubami, Alimpijada była bajavym chryščeńniem va ŭsich sensach hetaha słova».
Pavodle słoŭ spartoŭca, dla mnohich alimpijcaŭ Barselona stała takim ža symbalem seksu, jak i symbalem sportu: vabnyja šynkarki j asystentki ŭ karotkich čornych spadnicach, zachoplenyja pakłońnicy na trybunach i spartoŭki z tonkim stanam. Pryčym, nia tolki chłopcy zmahalisia z svajoj uvieśčasnaj jurlivaściu — žančyny prosta pramienilisia harmonami, kidajučy prahnyja pahlady na atletaŭ i doračy ŭśmieški, jak kanfeci.
Nivodny śniadanak ci pierapynak na kavu nie abychodziŭsia biaz pryjemnaj razmovy z kubinskaj skakuchaj ci švedzkaj tenisistkaj. A pa tym, jak spartoŭcy vybyvali z spabornictvaŭ, jany pačynali kidacca adno na adnoha z žarściu, blizkaj da aźviareńnia.
«Naš seks‑maraton nia skončyŭsia ŭ Barselonie, — praciahvaje Rys, — u 2000 hodzie ŭ Sydnei, na maich druhich Alimpijskich hulniach, dy j tut u Pekinie, dzie ja pracuju spartovym kamentataram, paŭtaryłasia toje samaje».
Kali mužčyna‑spartoviec vyjhraje załaty medal, to jon stanovicca abjektam usieahulnaha zachapleńnia j pažady, — navat taki dziŭny persanaž jak płyviec Majkł Fełps, tryjumfatar Pekina, čałaviek-amfibija.Adnak hetaje praviła pracuje tolki ŭ adnym kirunku. Załatyja medalistki absalutna nia ŭzrušvajuć svaich kaleh‑mužčyn. Apošnija ŭjucca kala pryhažuń, jakija zastalisia ŭ chvaście zabiehu jašče na etapie kvalifikacyi. Mužčynaŭ pryvablivajuć fizyčnyja jakaści, a nia pośpiech.
Čym možna patłumačyć takija volnaści? Niekalkimi pryčynami.
Pa-pieršaje, tysiačy pryhožych maładych ludziej akazvajucca razam. Pa-druhoje, u jakaści dopinhu mnohija spartoŭcy ŭ toj ci inšaj formie vykarystoŭvajuć testasteron, jaki pavyšaje reakcyju i vynoślivaść, ale hety samy harmon adkazvaje za połavuju aktyŭnaść. Pa-treciaje, sam fakt adryvu ad zvykłaje abstanoŭki i padarožža ŭzbudžaje. Navukoŭcy padličyli, što połavyja orhany mužčyny ŭ časie padarožžaŭ pavialičvajuć vypracoŭku spermatazoidaŭ udvaja.
Ułady Pekina pryniali da ŭvahi nadmiernuju seksualnuju aktyŭnaść spartoŭcaŭ dy prychilnikaŭ Alimpijskich hulniaŭ.
Pastajalcam 90 tysiač numaroŭ 424 haradzkich hatelaŭ katehoryi ad troch da piaci zorak razdali 400 tysiač biaspłatnych prezervatyvaŭ. Jašče 100 tysiač vysakajakasnych prezervatyvaŭ z bukletami pra VIČ‑infekcyju na anhielskaj, francuskaj i kitajskaj movach biaspłatna raspaŭsiudžvalisia ŭ klinicy Alimpijskaje vioski.
