U apahiej supraćstajańnia pamiž Rasijaj i Zachadam Miensk pastaŭleny pierad žorstkim vybaram – z kim jon. Zvyčajnaja palityka łaviravańnia pamiž dvuma hieapalityčnymi monstrami ŭžo nie adekvatnaja najaŭnaj situacyi. Mudrym dla demakratyčnych sił było b usialak spryjać pieraaryjentacyi Biełarusi, navat kali dla hetaha tre budzie pajści na chaŭrus z Łukašenkam. Lehitymizacyja režymu nie na karyść apazicyi, ale na karyść Biełarusi ŭ dadzienych umovach. Piša Dzianis Mieljancoŭ.
Vajna ŭ Hruzii stałasia niečakanaściu i navat šokam dla palitykaŭ, dypłamataŭ i naziralnikaŭ uva ŭsim śviecie. I
sprava navat nie stolki ŭ stracie čałaviečych žyćciaŭ i trahiedyi dla kaŭkazskich narodaŭ, a ŭ tym, što taki, zdavałasia b, nievialiki łakalny kanflikt moža zvarušyć usiu sistemu mižnarodnych adnosinaŭ i pryvieści da značnych hieapalityčnych pieramien. Sproba Hruzii reintehravać Paŭdniovuju Asieciju i ahresija Rasii suprać Hruzii pryviali pierš za ŭsio da rezkaha źmianieńnia statusa Rasii jak vialikaj dziaržavy.Mižnarodnaja supolnaść pryznała Rasiju ahresaram, ZŠA zaklikali vyklučyć jaje ź Vialikaj vaśmiorki, Rasija faktyčna razarvała svaje adnosiny z Arhanizacyjaj Paŭnočnaatłantyčnaj damovy (APAD, jašče viadomaja jak NATO). Palityki i ekśpierty znoŭ zahavaryli pra mahčymaść «chałodnaj vajny», a susiednija z Rasijskaj Fiederacyjaj krainy pierahladajuć svaje abarončyja daktryny. Upieršyniu paśla raspadu SSSR Rasija apynułasia ŭ takoj izalacyi. Što heta moža aznačać dla mižnarodnaj sistemy i jaje bližejšaha atačeńnia?
Rasija jak pahroza
Blizu dvuch dziesiacihodździaŭ śviet advučaŭsia ŭsprymać Rasiju jak pahrozu.
Paśla skančeńnia «chałodnaj vajny» i raspadu sacyjalistyčnaha łahieru Rasija pieratvaryłasia ŭ słabuju rehijanalnuju dziaržavu, jaje vojska zdehradavała, a kolkaść nasielnictva stała chutka skaračacca.U takich varunkach pra impierskija ambicyi, a tym bolš pra impierskuju zamiežnuju palityku, pryjšłosia zabyć. Navat z rostam cenaŭ na vuhlevadarody, pastupovaj ekanamičnaj stabilizacyjaj i sprobami vykarystoŭvać svajo vyhodnaje stanovišča eksparciora enerhanośbitaŭ Rasija ŭsio roŭna nie ŭsprymałasia jak surjoznaja pahroza mižnarodnaj stabilnaści i praciahvała zastavacca častkaj mižnarodnaj palityki i mižnarodnych struktur.
Rasijskaja zamiežnaja palityka paśla raspadu SSSR – heta šerah pravałaŭ i stratehičnych promachaŭ. Pačynajučy ad pieršaj Čačenskaj vajny, i skančajučy kalarovymi revalucyjami ŭ postsavieckich krainach. Sami rasijskija hramadzianie ŭžo daŭno pryzvyčailisia da takoha stanu rečaŭ i nie čakali ad rasijskaha kiraŭnictva rašučych dziejańniaŭ u adkaz na ŭvod hruzinskich vojskaŭ u Cchinvali.
Situacyja ŭ Paŭdniovaj Asiecii pastaviła Kreml pierad vielmi žorstkim vybaram: kali Rasija nie ŭmiašajecca ŭ kanflikt i nie padtrymaje asiacinaŭ, to jana stracić usialaki prestyž u vačach kaŭkazskich narodaŭ i ŭłasnych hramadzian, a taksama ŭmacuje Hruziju; kali ŭmiašajecca – to heta paciahnie za saboj takija mižnarodnyja nastupstvy, jakija navat ciažka sprahnazavać. Rasieja abrała apošiaje. I heta nie jość niečakanaściu, kali praanalizavać evalucyju ŭnutrypalityčnaj situacyi ŭ Rasii i dynamiku jaje adnosinaŭ z Zachadam. Rasija prosta čakała spryjalnaha momantu.
Historyja supiarečnaściaŭ
Užo ź siaredziny 1990-ch u Rasii pačynajuć źjaŭlacca razychodžańni ŭ intaresach z Zachadam, jakija niekalki razoŭ pryvodzili da surjoznych kryzisaŭ u adnosinach. Adno ź pieršych takich nieparazumieńniaŭ było źviazana z «adnaŭleńniem kanstytucyjnaha ładu» ŭ Čačni (tak aficyjna nazyvałasia vajennaja kampanija suprać čačenskich sieparatystaŭ), pad čas jakoha na mižnarodnym uzroŭni była padniata prablema parušeńnia pravoŭ čałavieka ŭ Rasii. Potym byli dypłamatyčnyja vojny z APAD z nahody pryniataha Aljansam rašeńnia pašyracca na Ŭschod i vajskovaj apieracyi ŭ Kosavie ŭ 1999 hodzie. Stratehičnyja i taktyčnyja supiarečańni vylilisia ŭ sprobie Maskvy ŭtvaryć alternatyŭny vajskova-palityčny błok na padstavie zaklučanaj u 1992 hodzie Damovy ab kalektyŭnaj biaśpiecy, adnak na sioniašni dzień ADKB tak i nia stała dziejučaj supraćvahaj Aljansu.
Śfiera ŭpłyvu Rasii praciahvaje zvužacca.Padobna na toje, što zaraz hetaja śfiera dasiahnuła peŭnaj miažy pamianšeńnia, za jakoj Kreml užo hatovy supraćdziejničać hetamu pracesu vajskovymi mietadami, jak my toje nazirali ŭ Hruzii.
Kali pravodzić anałohiju z «chałodnaj vajnoj», to svaju Fułtanskuju pramovu Pucin ahučyŭ u Miunchienie ŭ lutym 2007 hoda, u jakoj źvinavaciŭ Zachad u padvojnych standartach i pabudovie adnapalarnaha śvietu, a taksama abhruntavaŭ prava Rasii pravodzić niezaležnuju źniešniuju palityku. Takim čynam, pra supiarečnaści pamiž Zachadam i Rasijaj było zajaŭlena adkryta. Uśled za hetym Rasija prypyniła svoj udzieł u Damovie pra zvyčajnyja ŭzbrajeńni ŭ Jeŭropie, što stała adnym z najvažniejšych krokaŭ u pracesie razbureńnia isnujučaj ad savieckich časoŭ sistemy biaśpieki ŭ Jeŭropie.
Vajna ŭ Hruzii stała mocnym šturškom dla dalejšaha paharšeńnia adnosinaŭ Rasii z Zachadam. Pajšoŭšy na vajskovy kanflikt z Hruzijaj, Rasija faktyčna apynułasia ŭ poŭnaj izalacyi. Jaje nie padtrymali navat sajuźniki pa SND i ADKB.Akazalisia razburanymi ŭsie suviazi ź jeŭraatłantyčnymi strukturami, jakija budavalisia na praciahu bolš čym dziesiaci hod. Byli admienienyja ŭsie sumiesnyja vučeńni Rasii z APAD, a taksama pastaŭlena pad pytańnie funkcyjanavańnie tranzitnaha kalidora ŭ Aŭhanistan, jaki Rasija pradastaŭlała dla Aljansa.
Na siońniašni dzień napružanaść praciahvaje narastać. Kreml aficyjna pryznaŭ niezaležnaść Abchazii i Paŭdniovaj Asiecii, a APAD praciahvaje naroščvać vajskovuju prysutnaść u Čornym mory. Takim čynam,
kanflikt jašče daloki ad svajho vyrašeńnia.
Pryčyny izalacyi
Pryčyny narastańnia supiarečnaściaŭ pamiž Rasijaj i Zachadam daŭnija i składanyja. Ich možna šukać u pryrodzie samoj rasijskaj cyvilizacyi, što vydatna zrabiŭ u svoj čas Džordž Kienan u svajoj «Doŭhaj telehramie». Kali ž źviartacca da pryčyn bolš histaryčna nam blizkich, to tut nieabchodna pryhadać spryjalnuju dla Rasii ekanamičnuju kanjunkturu, jakaja dazvoliła stabilizavać ekanomiku pry dapamozie nafta- i hazadalaraŭ i viarnuć krainu ŭ lik vialikich dziaržaŭ z adpaviednymi hetamu statusu ambicyjami. Centrabiežnyja tendencyi 1990-ch hadoŭ i adsutnaść demakratyčnych tradycyjaŭ pryviali da pabudovy mocnaj viertykali ŭłady i ŭstalavańnia kantrolu nad srodkami masavaj infarmacyi, što było nieabchodna dla ździajśnieńnia reintehracyi terytoryi i kansalidacyi hramadstva. A jak pakazvaje historyja, dla kansalidacyi hramadstva niama ničoha lepšaha za dobra namalavany vobraz ujaŭnaha ci realnaha voraha, jaki dazvalaje kanalizavać zališniuju niezadavolenaść i ahresiju hramadzian, a taksama padvysić ich łajalnaść da dziaržavy. Inšaj pryčynaj rostu supiarečnaściaŭ stała taksama i kansalidacyja Zachadu, jakaja vyraziłasia ŭ pašyreńni Jeŭrapiejskaha sajuza i APAD da miežaŭ Rasii. Heta nie mahło nie vyklikać admoŭnaj reakcyi Kramla. Pakul hetaja reakcyja była tolki palityčnaja i dypłamatyčnaja – heta nikoha ŭsurjoz nie turbavała. Ale
Rasija, jakaja maje mahčymaść i žadańnie vieści bajavyja dziejańni pa-za ŭłasnymi miežami – heta ŭžo zusim inšaja Rasija. I jana ŭjaŭlaje saboj pahrozu.
Ci budzie novaja «chałodnaja vajna»?
Kab adkazać na hetaje pytańnie, treba pryhadać definicyju hetaj źjavy. Takim čynam, «chałodnaja vajna» – heta hłabalnaja hieapalityčnaja, ideałahičnaja i ekanamičnaja kanfrantacyja pamiž pamiž błokami dziaržaŭ, jakaja supravadžajecca honkaj uzbrajeńniaŭ. Dla bipalarnaha supraćstajańnia nieabchodna najaŭnaść ułasna samych palusoŭ, vajskova-stratehičny parytet, a taksama ideałahičny antahanizm, abo roznyja kaštoŭnasnyja ci palityčnyja sistemy.
Na sioniašni dzień my nazirajem narastańnie hieapalityčnyčnaj kanfrantacyi pamiž Rasijaj i Zachadam na padstavie razychodžańnia intaresaŭ i kaštoŭnaściaŭ. Akryjaŭšy ad ekanamičnaha zaniapadu, Rasija sprabuje zachavać svaju śfieru ŭpłyvu i pašyryć ryčahi ŭpłyvu na postsavieckaj prastory, vykarystoŭvajučy dla hetaj mety, u pryvatnaści, enerhietyčnyja resursy. Akramia taho Rasija supraćpastaŭlaje siabie śvietu demakratyi pa-amierykanski, pakidajučy za saboj prava na ŭłasny šlach raźvićcia, jaki nie supadaje z ahulnym trendam, što adstojvajuć ZŠA.
Razam z tym, Rasija zanadta słabaja ŭ ekanamičnym i vajskovym płanie dla taho, kab vytrymać supraćstajańnie Złučanym Štatam i APAD.
Pavodle dadzienych Suśvietnaha daviednika CRU, Rasija pa VUP na dušu nasielnictva ŭ 2007 hodzie znachodziłasia na 76 miescy ŭ śviecie, a pa absalutnych ličbach VUP – na dzieviatym (roźnica z VUP ZŠA składaje 7 razoŭ, ź ES – stolki ž) . Abaronnyja vydatki Rasii ŭ 2007 hodzie skłali 35,4 młrd dalaraŭ, u toj čas jak ZŠA patracili 547 młrd dalaraŭ, a Vialikaja Brytanija — 59,7 młrd.
U adroźnieńnie ad ZŠA, u Rasii faktyčna niama sajuźnikaŭ, na jakich jana mahła b abapiercisia ŭ takim supraćstajańni. Vajna ŭ Hruzii vydatna prademanstravała nieprydatnaść ADKB jak u vajskovym, hetak i ŭ palityčnym płanie. Navat Biełaruś nie paśpiašałasia ŭchvalić dziejańni svajho partniora pa sajuznaj dziaržavie.
Niahledziačy na adroznaje bačańnie palityčnaha ładu, pamiž Zachadam i Rasijaj siońnia niama toj prorvy, jakaja była pamiž SSSR i Zachadam padčas «chałodnaj vajny». I ŭ Ńju-Jorku, i ŭ Maskvie toj samy kapitalizm i tyja samyja «Makdonaldsy», adnolkavyja standarty spažyvańnia i padobny ład žyćcia. Akramia taho, Rasija mocna zaležyć ad Zachadu, i heta nie dazvolić joj pajści na adkrytuju kanfrantacyju. Asnoŭnym nakirunkam ekspartu rasijskich vuhlevadarodaŭ źjaŭlajecca abjadnanaja Jeŭropa. Heta aznačaje nie tolki zaležnaść Jeŭropy ad Rasii, ale taksama i Rasii ad Jeŭropy, bo truba, jak viadoma, maje dva kancy, a rasijskaja ekanomika vielmi mocna zaležyć ad prodažu syraviny. Tak zvany rasijski stabilizacyjny fond, jaki farmujecca sa zvyšprybytkaŭ z prodažu hazu, zachoŭvajecca na valutnych rachunkach zamiežnych bankaŭ, jakija ŭ vypadku vajny ci surjoznaj kanfrantacyi mohuć być paprostu zamarožanyja.
Adčuŭšy svaju moc, Rasija ahryzajecca i starajecca ŭtrymać status vialikaj dziaržavy praz ahresiŭnyja dziejańni ŭ svajoj byłoj śfiery ŭpłyvu. Jana moža vieści łakalnyja vojny, ale jana nie hatovaja da hłabalnaha supraćstajańnia z takoj hipierdziaržavaj jak ZŠA. Maskva razburaje mižnarodna-pravavyja režymy i robić hučnyja zajavy, ale jana pavodle svaich mahčymaściaŭ źjaŭlajecca zvyčajnaj rehijanalnaj dziaržavaj, nie majučaj patencyjału stać novym hieapalityčnym polusam.
Novaj «chałodnaj vajny» nie budzie. U horšym vypadku Rasija prosta pieratvorycca ŭ jašče adnu dziaržavu-izhoja.
Što rabić susiedziam?
Izalacyja Rasii nie pryniasie ničoha dobraha. Tym bolš, što my ŭžo majem taki histaryčny prykład, jaki mieŭ miesca ŭ pačatku minułaha stahodździa. Izalacyja pryviadzie da jašče bolšych abieracyjaŭ usprymańnia rasijskim kiraŭnictvam mižnarodnaj palityki, što nieminuča pryviadzie da nieadekvatnych źniešniepalityčnych dziejańniaŭ, rostu militaryzmu i aŭtarytaryzacyi unutrypalityčnaha ładu. Jak užo było adznačana, Rasija nie hatovaja da «chałodnaj vajny» z Zachadam, ale jana całkam zdatnaja vieści rehijanalnyja vojny za terytoryju i palityčny ŭpłyŭ, što było prademanstravana ŭ Hruzii. I pierš za ŭsio aktyŭnaść Rasii budzie skiravana na byłyja savieckija terytoryi, što stali niezaležnymi dziaržavami. Niekatoryja zachodnija palitołahi ŭžo navat nazyvajuć nastupnyja abjekty rasijskaj ahresii.
Adnak padčas vajny ŭ Hruzii zaniepakojenaść u susiedziaŭ Rasii vyklikali nie tolki pavodziny Kramla, ale i biaździejnaść zachodnich sajuźnikaŭ Saakašvili, jakija nie akazali nijakaj realnaj padtrymki hruzinam u toj čas, kali rasijskaja avijacyja bambiła Hori i Poci. Nahoda zadumacca źjaviłasia nie tolki dla Ŭkrainy, ale taksama i dla Bałtyjskich krain, jakija źjaŭlajucca siabrami APAD. Sapraŭdy, ci hatovy ZŠA i zachodniejeŭrapiejskija krainy raspačynać treciuju suśvietnuju vajnu z-za napadu na Łatviju ci Estoniju? Tym bolš, što ŭ historyi APAD nie było nivodnaha precedentu zadziejničańnia piataha artykułu Statutu Aljansu (dzie idzie havorka pra kalektyŭnuju abaronu), akramia 11 vieraśnia 2001 hoda. APAD navat nie maje płanu abarony krain Bałtyi. Košt takoha kanfliktu budzie zanadta vialikim dla ŭsiaho Zachadu. I chutčej za ŭsio, intaresy małych sajuźnikaŭ buduć praihnaravanyja.
Tym časam, u Ryzie była sklikana Rada nacyjanalnaj abarony, jakaja pryniała rašeńnie pierahledzieć adnosiny z Rasijaj i stupień padrychtavanaści dziaržavy dla abarony.
Litva pakul što pavodzić siabie bolš strymana, adnak niekatoryja palityčnyja siły, u pryvatnaści, litoŭskija kansiervatary («Sajuz Ajčyny») zaklikajuć prypynić praces prafiesijanalizacyi armii i viarnucca da kancepcyi terytaryjalnaj abarony. Adnak, navat viarnuŭšysia da ŭsieahulnaha pryzyvu, ci zdoleje Litva abaranić siabie ad mahčymaj rasijskaj ahresii? Adkaz tut vidavočny.
Izalacyja Rasii pryviadzie da abvastreńnia hieapalityčnaha zmahańnia za postsavieckuju prastoru. Nasupierak mierkavańniam pra vyrašanuju spravu ź siabroŭstvam Ukrainy ŭ APAD, bitva za hetuju byłuju savieckuju respubliku jašče nie skončana. Ukraina zanadta važnaja dla rasijskich impierskich płanaŭ, kab addać jaje biez boju.
I ŭ ZŠA, i ŭ Rasii dobra pamiatajuć staruju maksimu Bžazinskaha, zhodna ź jakoj Rasija nikoli nie zmoža stać impieryjaj biez Ukrainy. I vajna za Ŭkrainu, u adroźnieńnie ad Hruzii, ci Estonii, całkam moža stać pačatkam novaha hłabalnaha kanfliktu.
Biełaruś u šerahu susiedziaŭ Rasii padajecca ŭ najbolš biaśpiečnaj pazicyi. Adnak kanflikt u Hruzii prymusiŭ i biełaruskaje kiraŭnictva zadumacca nad svaim losam. Bo dla Biełarusi «prapanova» ŭvajści ŭ skład uschodniaha sajuźnika šaściu abłaściami ŭsio jašče aktualnaja.
I ciapier, kali supraćstajańnie pamiž Rasijaj i Zachadam dasiahnuli svajho apahieju, Miensku daviadziecca rabić vielmi žorstki vybar – z kim jon. Zvyčajnaja palityka łaviravańnia pamiž dvuma hieapalityčnymi monstrami ŭžo nie adekvatnaja najaŭnaj situacyi.I vybar tut nievidavočny.
Vyhladaje na toje, što jakraz siońnia dla Biełarusi nastaje toj momant iściny, kali vyrašajecca los krainy na doŭhija hady.I ci nie tamu byli vypuščany palityčnyja viaźni? Ci nie tamu prylataŭ u Minsk pradstaŭnik Dziarždepartamienta? I ci nie tamu Łukašenka nie śpiašajecca z pryznańniem Paŭdniovaj Asiecii i Abchazii?
Ale j razam z tym słovy biełaruskaha prezidenta pra «mudryja i pryhožyja» dziejańni rasijskaj armii ŭ Hruzii i padrychtoŭka da padpisańnia pahadnieńnia ab adzinaj sistemie supraćpavietranaj abarony Biełarusi i Rasii. Pakul što być sajuźnikam Rasii dla Łukašenki našmat vyhadniej, čym razvaročvacca na Zachad i pravodzić kompleks reformaŭ. Ale heta ciapier. Jak pakazvajuć padziei apošniaha miesiaca, situacyja moža raźvivacca vielmi chutka. I da hetaha treba być padrychtavanym.
Kali kazać pra biaśpieku niepasrednych susiedziaŭ Rasii, to tut bačyca niekalki mahčymaściaŭ:
Pa-pieršaje, dla krainaŭ, jakija nie źjaŭlajucca siabrami APAD, nieabchodna skarystać spryjalny momant dla taho kab atrymać paŭnavartasnaje siabroŭstva ŭ hetaj arhanizacyi, jakaja daje peŭnyja harantyi biaśpieki. Pierad tym, jak napaści na krainu-ŭdzielnicu Aljansa, Rasii treba budzie mocna padumać.
Pa-druhoje, jak było ŭžo skazana vyšej, samo siabroŭstva ŭ APAD nie daje poŭnaj harantyi biaśpieki dla małych dziaržavaŭ, tamu vyjście moža być znojdziena praz realizacyju sumiesnych abarončych prajektaŭ naŭprost sa Złučanymi Štatami, jak heta ŭžo zrabili Polšča i Čechija. Ale tut majecca i svoj advarotny bok – u takim razie kraina stanovicca niepasrednaj mišeńniu dla rasijskich rakiet.
Pa-treciaje, krainy Uschodniaj Jeŭropy ŭ metach padvyšeńnia ŭłasnaj biaśpieki mohuć abjadnacca ŭ vajskova-palityčny błok, jaki b achoplivaŭ terytoryju byłoha Vialikaha Kniastva Litoŭskaha abo Rečy Paspalitaj.Heta mahło b być vyjściem jak dla krain-udzielnic ES i APAD (padvyšeńnie palityčnaj vahi ŭ miežach jeŭraatłantyčnych struktur), hetak i dla takich krain, jak Ukraina i Biełaruś (apasiaredavanaja pryviazka da ES i APAD, rezkaje padvyšeńnie hieapalityčnaj važnaści dziaržaŭnych terytoryjaŭ, pavieličeńnie abarončaha patencyjału).
Na sioniašni dzień pahroza Rasii nie nastolki aktualnaja dla krain usiaho rehijonu, dla taho kab realizavaŭsia apošni scenar, ale peŭnyja tendencyi ŭ hetym nakirunku ŭžo prahladajucca. Jany pierš za ŭsio vyražajucca ŭ naładžvańni bolš ciesnych adnosinaŭ pamiž Litvoj, Ukrainaj i Biełaruśsiu.
Što da Biełarusi, to kali jaje kiraŭniki žadajuć zachavać realnuju niezaležnaść krainy, to im nieabchodna pryniać prapanovy Jeŭropy i ZŠA i ruchacca ŭ bok siabroŭstva ŭ jeŭraatłantyčnych strukturach. Tam bolej, što farmalnych pieraškod tut nie tak šmat, jak padajecca. Biełaruś nie maje terytaryjalnych i etničnych kanfliktaŭ i pretenzijaŭ da susiednich dziaržaŭ, ekanamičnyja pakazčyki nie našmat horšyja za Sierbiju i Ałbaniju, nasielnictva adukavanaje i dyscyplinavanaje. Prablema tolki ŭ cyvilizacyjnym vybary i palityčnych reformach. A hetyja pytańni vyrašajucca na praciahu adnaho dziesiacihodździa.
Naturalna, biełaruskaja apazicyja budzie vystupać suprać naroščvańnia kantaktaŭ Biełarusi z Zachadam pry zachavańni isnujučaha kiraŭnika dziaržavy, navat kali apošni projdzie na praviadzieńnie ŭnutrypalityčnych reform i ekanamičnuju libieralizacyju. I heta budzie abhruntoŭvacca ŭ maralnych katehoryjach, nieabyjakavych dla Zachadu. Adnak, takuju pazicyju treba pryznać niedalnabačnaj i navat škodnaj dla nacyjanalnych intaresaŭ Biełarusi, bo jana pieraškadžaje vykarystańniu histaryčnaha šancu dla krainy vyjści z-pad upłyvu Maskvy i dałučycca da zachodniaj cyvilizacyi.
Pakolki palityka – heta mastactva mahčymaha, to
našmat bolš mudrym dla demakratyčnych sił było b usialak spryjać pieraaryjentacyi Biełarusi, navat kali dla hetaha treba budzie pajści na časovy chaŭrus z Łukašenkam. Lehitymizacyja režymu nie na karyść apazicyi, ale na karyść Biełarusi ŭ dadzienych umovach.Tamu hety vybar budzie taksama i testam dla biełarusich palitykaŭ na najaŭnaść stratehičnaha i dziaržaŭnaha myśleńnia. At taho, jak jany jaho projduć, budzie zaležyć i budučynia biełaruskaj apazicyi ŭ cełym.
