Na Jandeksie źjaviłasia mapa śvietu. I mapa Biełarusi ŭ tym liku. Heta pieršy padrabiazny resurs takoha planu, na jakim paznačany biełaruskija nasielenyja punkty. U kankurentnaha resursu — GoogleMaps — hieahrafičnaja infarmacyja pra Biełaruś uryŭkavaja i małalikaja.
Siarod mahčymaściaŭ servisu — ručnoje vymiareńnie adlehłaściaŭ i prahlad spadarožnikavych zdymkaŭ. Heta niesuvymierna mała ŭ paraŭnańni z paŭnacennym servisam Google'a, ale šyrokija mahčymaści GoogleMaps skančajucca na ŭschodniaj miažy Eŭraźviazu. Tamu tut i ciapier abnoŭleny servis mapaŭ Jandeksu nia maje kankurencyi.
Na Jandeks‑mapach pracuje pošuk pa ajkonimach i hidronimach — nazvach nasielenych punktaŭ, a taksama rečak i azior.
«Možna znajści luby nasieleny punkt, dzie žyvie bolš za 50 tysiač čałaviek — ad pasiołku Kasas-de-Fernanda-Ałonsa-a-los-Teatynas da Babrujsku»,— apisvaje mahčymaści resursu menedžer słužby «Jandeks‑mapy» Andrej Karmacki.
Malaŭniča, ale niedakładna. Jość na mapach Jandeksu i viosački ŭ paŭsotni dvaroŭ, što značna mienš za zhadanaje italijskaje miastečka z tysiačaj žycharoŭ. I Babrujsk, zrazumieła, nia samy bujny abjekt na mapie.
Servis nie vychodzić daloka za ramki pašukovika. Kali znajści patrebnaje miesca lohka, to pa astatniaje treba źviartacca na inšyja resursy. Ni prakładki maršrutaŭ, ni hieahrafičnych kaardynat jandeksaŭski servis pakul nie prapanuje.
Spadarožnikavyja zdymki śviažejšyja za huhłaŭskija, ale detalizavanyja tolki pamiežnyja z Rasiejaj rajony — zatoje sucelna. Praŭda, detalizacyja mienšaja, čym u GoogleMaps. Z bujnych haradoŭ «pakryty» adno Viciebsk — pa ironii, adziny abłasny centar, jakasnaha zdmyku jakoha niama na GoogleMaps.
I samaja vialikaja kropla smurodu ŭ harniec miodu: mapy, skarystanyja Jandeksam dla Biełarusi, starejšyja za spadarožnikavyja zdymki dzieś na paŭstahodździa.
Hetak, pavodle Jandeksu, Miensk zakančvajecca dzieś u rajonie druhoha kalca. Niama ŭ im ni Paŭdniovaha Zachadu, ni Ŭručča, ni Kurasoŭščyny.
Čas spyniŭsia ŭ rańnich 70‑ch pa ŭsioj Biełarusi.
Servis pakul znachodzicca ŭ beta-stanie, što dazvalaje spadziavacca na vypraŭleńnie niedakładnaściaŭ i źjaŭleńnie novych mahčymaściaŭ.
