«Ja dumaju, što našy deputaty, jakich my praź niekalki dzion vybirajem, źviernucca da hetaha pytańnia [ab niezaležnaści Asiecii i Abchazii]...». «Na Kaŭkazie amerykancy ŭpieršyniu atrymali pa zubach...» «Smalenskaja vobłaść – heta Biełaruś. ... Smalenskija, branskija, čarnihaŭskija, pskoŭskija — jany ž niekali ŭvachodzili ŭ skład Biełarusi...». Adbyłasia pres-kanferencyja Alaksandra Łukašenki z pradstaŭnikami rasiejskich rehijanalnych ŚMI, što skančajuć svaju prapahandysckuju pajezdku pa Biełarusi.
Z vykazvańniaŭ Alaksandra Łukašenki:
Ab pryvatyzacyi
Za hod ad apošniaj sustrečy nakapiłasia šmat pytańniaŭ. Ja chaču, kab u Rasiei viedali praŭdu pra Biełaruś. Naš sajuz cementuje najpierš mižrehijanalnyja suviazi. Mianie krytykujuć, što ja nie chaču pradavać biełaruskuju majomaść rasiejskamu boku. U nas vitajecca pryvatny vybar. Ale pradać za biascenak dobry zavod — heta nie dla nas. A ci šmat novych ułaśnikaŭ chvaluje dola ludziej, što pracujuć na pradpryjemstvach?
Pra sajuznuju dziaržavu
Kali kazać ščyra, to my na zamarožanym etapie. My mahli b mieć našmat bolšaje, kali b nie adbyłosia ŭ svoj čas tarmažeńnia. Čamu Biełaruś nielha ŭklučać u skład Rasiei? Padziei na Kaŭkazie heta paćviardžajuć. Nam heta prosta nia treba. U advarotnym vypadku Rasieja zhubić viernaha sajuźnika. Kali patrebnaja karekciroŭka damovy, to my suprać. Ale ja praciŭnik, kab hetuju damovu źmianiać u bok asłableńnia, kab z nas nie śmiajalisia ludzi. Chto pieraškadžaje? Ciažka skazać. Narody ŭsprymajuć absalutna stanoŭča. Jość asobnyja palityki ŭ Rasiei i ŭ nas, jakim heta nie padabajecca, ale jany amal ni na što nie ŭpłyvajuć. Napeŭna, vina nas, palitykaŭ, niešta my nie damovilisia, nie dahavaryli. My jašče vierniemsia da hetaj prablemy. Abmiarkujem i skažam, što budziem rabić.
Pra raźmiaščeńnie SPA ŭ Polščy i Čechii
My z rasijanami akazalisia amal atočanymi ŭ hetym śviecie. Prablem bolej, čym navat vy, žurnalisty, viedajecie.
Prezydent Rasiei absalutna adekvatny čałaviek, vam ź im pašancavała.Jon choča, kab my pryjšli da zhody pa ŭsich pytańniach. My musim adkazvać na ŭsie vykliki, kab nie było sytuacyi, jak na Kaŭkazie. Zbroja raźmiaščajecca ŭ miežach Biełarusi, a nie Rasiei, jak u vas časta kažuć. Miaža napičkana srodkami vyviedki.
NATOŭskija samaloty nachabna kantralujuć pamiežnuju terytoryju, časam zalatajučy ŭ sajuznuju dziaržavu.
Jak reahavać? Nam treba niaśpiešna razam padumać.
Nas usio adno nie zrazumiejuć, kolki b my ni całavali Zachad u adpaviednyja miescy.Ja maju na heta svaje dumki, ale nie chaču pakul vykazvacca. My budziem rabić z rasijanami ŭsio, kab zabiaśpiečyć biaśpieku dla narodaŭ. My pavinny być hatovyja da ŭsiaho. U nas dobraja supraćrakietnaja abarona, tamu rasiejcy i prosiać nas padpisać damovu. Aficyjnuju, chacia faktyčna jana isnuje. Budziem rabić usio praparcyjna i adekvatna.
Pra Abchaziju i Asieciju
Na pasiadžeńni ADKB u kiraŭnikoŭ dziaržaŭ byli roznyja pazycyi. Pryznańnie Abchazii i Asiecii – heta nia tolki padtrymka Rasiei. Našy cudoŭnyja adnosiny z Abchazijaj pačalisia vielmi daŭno. Jašče kali Hruzija sprabavała zablakavać Abchaziju. Ale zrabić padobnaje – źniščyć narod. My nie dali chod takoj inicyjatyvie na SND.
Z prezydentam Abchazii sustrakajemsia amal štohod. Pryznańnie – heta nie hałoŭnaje.
Pryjdzie čas, i my razhledzim hetaje pytańnie i ŭ Biełarusi. Razhledziem, taksam jak heta zrabiła Rasijskaja Federacyja — u parlamencie. Ja dumaju, što našy deputaty, jakich my praź niekalki dzion vybirajem, źviernucca da hetaha pytańnia. Zmaŭčać i pramaŭčać my nia majem prava. Heta niesumlenna ŭ dačynieńni da Abchazii. Analahična — z Paŭdniovaj Asiecijaj», — skazaŭ A. Łukašenka.My budziem dapamahać Asiecii ŭznaŭlać krainy. U nas pramyja adnosiny z Abchazijaj i Asiecija, biez pasiarednictva Rasiei. Biehčy natoŭpam z pryznańniami z Rasiejaj vielmi kiepska, to ŭsie padumajuć, što nacisnuła Rasieja. Prychilnikaŭ niamała, ale jość niuansy.
Pra adnosiny z Zachadam
My traplali ŭ kleščy miž Zachadam i Rasiejaj. Mnohim zdavałasia, što my voś-voś ruchniem, navat kali Rasieja amal u dva razy pavysiła ceny na haz. VUP raście štohod, pry samych ciažkich umovach. My vykručvalisia jak mahli, davili z usich bakoŭ. Vieźli vašym dzietkam naturalnyja (!) cukierki, nas spyniali na miažy i aryštoŭvali tyja prysmaki. Z Zachadam my trapili taksama ŭ nialohkija adnosiny, bo padtrymlivali Rasieju. My ni z kim svarycca nie źbirajemsia, bo my most miž Zachadam i Rasiejaj. My prapanavali Zachadu: davajcie budziem razmaŭlać. Heta było daŭno, nia zaraz. Zachad viedaje našu pazycyju. My nia možam siabravać z Amerykaj za košt Rasiei, ja nie handluju siabroŭstvam z Rasiejaj. Nas nidzie lepš nie ŭsprymajuć, čym u Rasiei. Dla mianie tam ludzi hatovyja addać apošniaje. Da nas tam padychodziać z dušoj. Padčas napružanych adnosin miž kiraŭnictvam krain, rasijanie byli na baku Biełarusi. My ŭ amerykancaŭ pavinny vučycca, jany ž nia kinuli Saakašvili, padtrymali jaho. Voś tak treba rabić sajuźnikam. Nia treba bajacca abaraniać svaje intaresy, nam amerykancy pakazvajuć jak heta treba rabić. My budziem naładžvać adnosiny z Zachadam, bo inšaha vybaru niama. Apazycyja časta abvinavačvaje, što zaklučym sajuz z Rasiejaj, pajedziem vajavać u Čačniu. Nichto nie pajedzie. A tanki ŭ Maskvu praź Biełaruś my nia puścim, budziem vajavać. Chacia my samyja miralubivyja ŭ śviecie ludzi.
Pra paradak
Jon prosta pavinien być.
Kali SSSR nie traciŭ tak šmat na abaronu, to jon by jašče isnavaŭ, bo byŭ paradak u krainie.Kab byŭ paradak treba, kab usie pracavali z čystymi rukami. Karupcyja — samaje strašnaje, što moža być. Mnie kryŭžna, što pa darozie da Maskvy niama łosku, jana niedahledžanaja staraja.
U rasijan stolki hrošaj, stolki hrošaj, kali b mnie dali takija, to vy b Biełaruś nie paznali.I hrošy ŭ vas jość, i žadańnie, a blasku niama, jak chacia b u Emiratach. Treba abjadnać ahulnyja siły. Ja zadaju adnamu biznesoŭcu, kolki jon zarablaje hrošaj. Jon nie aliharch. Kaža, što za hod 350 miljonaŭ dalaraŭ, a sioleta budzie miljard. Ja nie ŭjaŭlaju, što rabić z takimi hrašyma. Hetyja ludzi žyvuć absalutna ŭ inšym śviecie. Jany kuplajuć tvory mastactva, jachty, ziamlu. Hetyja ž hrošy ad paliva, ad Hospada Boha, jany pavinny zastavacca ŭ Rasiei, a nie pracavać na čužuju ekanomiku.
Pra sielskuju haspadarku
My atrymali ŭradžaj sioleta bolšy, čym na Kubani. My navučylisia vyroščvać paŭdniovyja kultury — słaniečniki, raps, cukrovyja buraki, kukuruzu. My adychodzim ad impartu mnohich praduktaŭ. Heta najpierš dziakujučy technicy, jakuju my majem. Tak, jašče treba hod‑dva hetuju techniku daviali da ładu. My admovilisia ad zakupki cybuli, sparžy, fasoli. Zavozim tolki ekzatyčnyja frukty. Da apošniaha času ŭ nas łosku nie było, ciapier, akazvajecca, i zavaročvać umiejem. Popyt na našu techniku jość vialiki, ale treba jašče dapracoŭvać.
Pra ADKB
Chočacca, kab ADKB było realnaj arhanizacyjaj, jak NATO.
Pra vajnu na Kaŭkazie
Na Kaŭkazie amerykancy ŭpieršyniu atrymali pa zubach. Voś u čym sprava.
Rasieja spyniła ahresiju, jakaja padobna na fašyzm.Navat paśla hetaha Rasieju abvinavacili niemaviedama ŭ čym. Treba najpierš navieści paradak u siabie i z svaimi sajuźnikami, a nie šukać vyhadu, na dalar vyšej haz budzie kaštavać ci mienš. My pavinny čotka viedać, čaho choča Rasieja.
Pra pryvatyzacyju jašče
Ad pryvatnika nia budzie manny niabiesnaj. Pradpryjemstvy raźvivajucca pa abjektyŭnych zakonach. Pa vialikim rachunku nia maje značeńnie, ci pradpryjemstva pryvatnaje ci dziaržaŭnaje. Ale pryvatnik uvieś prybytak vyviezie, a ŭ nas pojdzie ŭ vytvorčaść. Pryvatniku nia vielmi cikavy budzie narod i dziaržava. Usie chočuć kupić «Biełaruśkalij», ale my sami ź im spraŭlajemsia. My budziem pradavać tolki toje, dzie nia zmožam sami.
BiełAZ, MAZ ci MTZ pradavać nia budziem.My nia suprać pryvatyzacyi, ale chočam rabić jaje pa-haspadarsku.
Pra spakoj
Majo małoje, jakomu piaty hod, bieź mianie z adpaviednym čałaviekam, idzie ŭ park Čaluskincaŭ viečaram pahuškacca na karusielach i ničoha nie baicca.Niekali ciaham hodu my vyrašyli prablemy z bandytami na darohach, bo jany pabačyli, što ź imi cyrymonicca nia budziem. Niejki čas kaŭkazcy kiepska siabie viali na rynkach. Da mianie pryviali ich čałavieka, ja skazaŭ, što tvaje ludzi kiepska siabie pavodziać. Jon usio zrazumieŭ. Praz tydzień byŭ poŭny paradak. U nas niama paniatku «čałaviek kaŭkaskaj nacyjanalnaści».
Pra ekalohiju
Kali ŭ Miensku niechta biazdumna pačnie rubić drevy, to jon budzie mieć spravu asabista z prezydentam. Ja ž vyras u vioscy. Bałoty dajuć najbolš kisłarodu ŭ atmasfery. Dziakuj, što niekali ich nia vysušyli. Adzin z maich pryncypaŭ: ni ŭ jakim vypadku nie razburać pryrody. My ŭžo try hady sprabujem zaraŭniać karjery, źnieści śmietnicy.
U nas i Charvatyi samaja čystaja vada ŭ Eŭropie, tamu ž u nas najlepšaja vodka.
Pra madel kiravańnia
Źjavilisia ludzi, jakija nie padviarhajuć sumnievu kurs dziaržavy. My adzinaja kamanda. Ja nikoli nie prymaju rašeńniaŭ prosta tak, heta tolki vyhladaje tak. My praličvajem, kab nie było pamyłak. Nie tamu, što ja taki razumny, a tamu, što tak dyktujuć abstaviny. Čort jaho viedaje, što takoje aŭtarytaryzm. Užo niama nieabchodnaść dziejničać pažarnym sposabam. U ekanomicy toje, što robicca, dla nas katastrofa, ale my nibyta znajšli vychad. Pakul prybytak nie vialiki, ale heta nia viečna. My ŭsio adno budziem narmalna žyć. Mahčyma, nia tak bahata jak vy.
Pra Smalenščynu
Smalenskaja vobłaść – heta Biełaruś. Chleb prybirać my jedziem da vas. Smalenskija, branskija, čarnihaŭskija, pskoŭskija – heta našy ludzi, jany nikoli nia skažuć kiepskaha pra Biełaruś. Hetym usio skazana. Jany ž niekali ŭvachodzili ŭ skład Biełarusi, my na ich nie pretendujem, nie padumajcie.
Pra pryvatyzacyju na vioscy
My čverć byłych kałhasaŭ pryvatyzavali. Ja zaprašaŭ biznesoŭcaŭ i kazaŭ: Ty biareš heta, heta i heta. Nia mnohija heta dobra ŭsprymali. Ciapier jany prykiepieli da hetaha. Z toj čverci tolki 11 pracavali nierentabelna. Jany ŭžo nikomu ich nie addaduć. My nia suprać pryvatnaj ułasnaści, ale na vioscy rabić heta treba vielmi akuratna.
