Suśvietny bank apublikavaŭ štohadovy rejtynh ŭzroŭniu pryvabnaści krainaŭ dla viadzieńnia biznesu. U śpisie sa 181-j pazycyj Biełaruś zaniała 85-je miesca ale apynułasia siarod lidaraŭ ŭ halinie reformaŭ.
Krainy aceńvalisia pavodle 10-ci pakazčykaŭ. Hałoŭnyja kryteryi rejtynhu: spryjalnyja ŭmovy dla rehistracyi novych pradpryjemstvaŭ, rehulavańnia ichniaj dziejnaści, najmu rabotnikaŭ, abarony pravoŭ investaraŭ i ŭłasnaści, a taksama dastupnaść kredytavańnia i prazrystaść padatkaabkładańnia.
Sa spravazdačy Suśvietnaha banku vynikaje, što pavodle najbolš spryjalnych umovaŭ dla biznesu pieršyja piać miescaŭ zajmajuć Synhapur, Novaja Zelandyja, Złučanyja Štaty, Hankonh i Danija. Adnak u spravazdačy adznačajecca i inšaje: čatyry ź dziesiaci krain śvietu, jakija realizujuć najbolšuju kolkaść reformaŭ ŭ halinie narmatyŭna-pravavoha rehulavańnia , znachodziacca va Ŭschodniaj Eŭropie i Centralnaj Azii. Heta - Azerbajdžan, Albanija, Kyrhystan i Biełaruś.
U spravazdačy adznačajecca, što ŭ Biełarusi sproščany paradak zasnavańnia novaha pradpryjemstva, stvoranaja adzinaja rehistracyjnaja baza dadzienych, ustanoŭlenyja terminy rehistracyi, udvaja źmienšany pamier statutnaha kapitału novaha pradpryjemstva. U krainie ŭviedzienaja systema rehistracyi majomasnych pravoŭ, realizujecca šyrokaja prahrama aptymizacyi administratyŭnych praceduraŭ. U vyniku, dla prykładu ŭ Miensku, termin rehistracyi majomasnych pravoŭ skaraciŭsia z bolš jak dvuchsot dzion da 21-ho dnia. Terminy atrymańnia dazvołu na budoŭlu skaracilisia na 140 dzion. U vyniku ŭviadzieńnia novaha mytnaha kodeksu i novych praviłaŭ rehulavańnia bankaŭskaj dziejnaści ŭ Biełarusi skaracilisia terminy pastavak tavaraŭ na ekspart.
Dla paraŭnańnia: hałoŭny ekanamičny partner Biełarusi – Rasieja apuściłasia sa 111-ha na 120-je miesca pamiž Bośnijaj i Nepałam.
