Jašče nia ścichła recha papsovych kancertaŭ pad markaj dziaržaŭnaj idealahična-prapahandysckaj kampanii «My biełarusy», jak ceły šerah niezaležnych ad dziaržavy arhanizacyjaŭ raspačali ŭłasnuju inicyjatyvu pad lozunham «Budźma!» Sami arhanizatary rasšyfroŭvajuć hety słohan jak zaklik da hramadzianaŭ krainy: «Budźma biełarusami!»
Prezentacyja kampanii adbyłasia 1 kastryčnika ŭ mienskaj kaviarni «Dobryja myśli». Arhanizatary - aljans samych raznastajnych niedziaržaŭnych arhanizacyjaŭ, jakija dziejničajuć u sfery kultury: ad Zhurtavańnia biełarusaŭ śvietu da Tavarystva biełaruskaj movy, ad Sajuza biełaruskich piśmieńnikaŭ da časopisu «pARTisan», ad Biełaruskaj muzyčnaj alternatyvy da moładzievych internet-supolnaściaŭ.
Kali koratka, to zaduma kampanii takaja: abjadnać biełarusaŭ na padstavie nie palityčnych ci ekanamičnych intaresaŭ, jakija ŭ kožnaha čałavieka svaje, a na hruńcie kulturnych kaštoŭnaściaŭ, jakija ahulnyja dy niaźmiennyja dla ŭsioj nacyi. U ramkach kampanii buduć ładzić raznastajnyja imprezy pa ŭsioj krainie, raspaŭsiudžvać biełaruskamoŭnuju kulturnickuju pradukcyju nakštałt kampakt-dyskaŭ, dy rabić pramocyju biełaruščynie z dapamohaj postaraŭ, paštovak, cišotak dy inšych rečaŭ, jakija ludzi z achvotaj buduć prymać u padarunak. Kažučy inšymi słovami,
«Budźma!» musić pasiejać u krainie modu na biełaruskaść.
Admysłovaje serca kampanii – sajt www.budzma.org, jaki, pa zadumie stvaralnikaŭ, maje zrabicca vialikaj internet-supołkaj dla tych, chto aktyŭna cikavicca biełaruskaj kulturaj. Faktyčna, heta błoh, na jakim kožny karystalnik moža pakidać svaje dopisy dy znachodzić patrebnuju infarmacyju pra kampaniju.
Ci zdoleje «Budźma!» skłaści hodnuju kankurencyju dziaržaŭnym prapahandysckim prajektam?
Sama zadača kampanii – pierakanać biełarusaŭ u tym, što stabilnaść dy paradak niasmačnyja biaz rodnaj movy dy kultury – padajecca nievierahodna ciažkaj.Kab zacikavić našych ludziej, bolšaść jakich razryvajecca pamiž niekalkimi pracami, hadavańniem dziaciej dy televizaram ź jahonymi prapahandysckimi pieradačami dy spažyvieckimi telešoŭ, vielmi važna prapanavać im sapraŭdy jakasny, cikavy dy novy kulturnicki pradukt. Padaryć im niešta takoje, što daść im adpačynak ad šeraj budzionnaści, adčynić pryhožy biełaruski śviet, u jaki zachočacca viartacca znoŭ i znoŭ. Ažno voś na pres-kanferencyi «Budźma!», aprača ŭsiaho inšaha, prahučała prapanova zavablivać ludziej… adkrytymi lekcyjami pa historyi dy kultury. Ci pojduć tudy nieabaznanyja ŭ biełaruščynie ludzi?
Badaj,
najhoršym varyjantam budzie, kali «Budźma!» zastaniecca akcyjaj dla prasunutaj biełaruskamoŭnaj internet-aŭdytoryi, nia zdoleŭšy dahrukacca da tych, chto žyvie ŭ śviecie BT dy kancertaŭ Saładuchi.Zrešty, vyhladaje na toje, što sami arhanizatary kampanii ŭśviedamlajuć takuju niebiaśpieku, i robiać kroki dla taho, kab vybicca za miežy virtualnaj prastory. Hetak, nieŭzabavie praz adnu ź firmaŭ, jakaja zajmajecca naŭprostavaj reklamnaj rassyłkaj, na bolš čym 100 tysiačaŭ paštovych adrasoŭ pa ŭsioj krainie buduć razasłanyja paštoŭki z zaklikam «Budźma biełarusami!» dy kantaktnaj infarmacyjaj kampanii. Arhanizatary pracujuć nad stvareńniem aŭdyjo- i videarolikaŭ, jakija buduć reklamavać biełaruskaść, i pasprabujuć prasoŭvać ich nia tolki na Biełsacie ci ŭ internecie, ale i na dziaržaŭnych telekanałach dy radyjostancyjach. Abviestki pra imprezy ŭ ramkach kampanii (naturalna, siarod ich buduć nia tolki lekcyi) buduć aktyŭna padavacca ŭ rehijanalnuju presu, jakaja maje šmat čytačoŭ u pravincyi. Akramia hetaha, užo ciapier školniki mohuć «abmianiać» svaje «dziasiatki» pa biełmovie na padarunki ad kampanii “Budźma!” (atrymać infarmacyju pra akcyju možna tut).
Padobnaja kampanija nia budzie mieć pośpiechu biez padtrymki ŭsich tych, chto zacikaŭleny ŭ pramocyi biełaruskaści.Voś, skažam, sajt www.budzma.org. Niama ničoha praściej, čym napisać tudy krytyčny dopis kštałtu “kamu patrebnaja hetaja vašaja kampanija”. Ale kudy bolš plonu budzie, kali
karystalniki buduć vykarystoŭvać sajt nia tolki dla taho, kab padyskutavać, ale i kab daviedacca pra čarhovuju imprezu (skažam, u nastupnuju niadzielu možna vypravicca ŭ ekskursiju pa Miensku). A, daviedaŭšysia, nia tolki paŭdzielničajuć u joj, ale i jašče siabroŭ svaich, dalokich ad biełaruščyny, pryviaduć. Ci ŭvohule prapanaujuć pravieści padobnuju imprezu ci niejki inšy prajekt ŭ svaim rodnym miastečku ci vioscy. Arhanizatary kampanii abiacajuć padtrymku.
Cudoŭna toje, što takaja kampanija raspačałasia. Ale jaje arhanizataram varta pamiatać i pra toje, što, abvieściŭšy kampaniju z takimi ambitnymi metami, jany ŭziali na siabie jašče i vialikuju adkaznaść. Nakolki pośpiech kampanii moža prynieści karyści imidžu biełaruskaj kultury, nastolki niaŭdača moža hetamu imidžu naškodzić.
Repartaž z prezentacyi kampanii možna pabačyć tut:
