Ciapier fanaty «Kałychanki» bolš nia buduć mieć mahčymaści pačuć ulubionaj melodyi i zvykłych słovaŭ pra zorki-spluški i pasnułyja ŭ haražy mašyny.
Zamiest uzvyčajenaj zmałku pieśni Jadźvihi Papłaŭskaj ciapier u efiry telekanału «Ład» budzie hučać absalutna novy tvor u vykanańni Iryny Darafiejevaj.
Słovy da novaj pieśni napisaŭ Aleh Žukaŭ, a muzyku — Izmaił Kapłanaŭ. Pieršapačatkova pieśnia była zapisanaja pa-rasiejsku, ale pastanavili, što ŭ dadzienym vypadku bilinhvizm (sama pieradača idzie pa-biełarusku) niedarečny i tamu Iryna pierapiajała «Kałychanku» na rodnaj movie. Dla novaj kałychanki byŭ zrobleny mulciplikacyjny rolik. Siužet — chłopčyk i dziaŭčynka traplajuć u dzivosnuju krainu snoŭ.
Muzyka i radyjoviadoŭca Alaksandar Pamidoraŭ pryznajecca, što ŭ dziacinstvie jamu «Kałychanka» była niedaspadoby. «Nadta jana niejkaja saładzieńkaja była, jak pataka. Ale z mastackaha hledzišča — niama čaho i kazać: ciocia Jadzia (Papłaŭskaja — ŁK) praśpiavała svaju «Kałychanka» pieśniu značna lepiej za Irynu Darafiejevu».
Hulec barysaŭskaha BATE i moładzievaj zbornaj Siarhiej Kryviec miarkuje, što zaŭsiody treba niešta mianiać u žyćci i spadziajecca, što novaja budzie lepšaja za staruju. «Ale, biezumoŭna, staraja «Kałychanka» zastaniecca ŭ pamiaci — jana mnie padabałasia ŭ dziacinstvie».
Muzyčny krytyk Źmicier Padbiareski ličyć, što staraja «Kałychanka» była hodnym tvoram. «Jana jak najlepš adpaviadała atmasfery pieradačy, była admietnaja. Pieśnia na słovy Buraŭkina i muzykaj Rainčyka — naš kulturny nabytak. Jana pajšła ŭ narod, a biełaruskija muzyki nia raz abyhryvali jaje słovy, vykarystoŭvali hetuju zapaminalnuju melodyju. Razumieju, čas ad času źmieny patrebnyja. Ale ŭ dadzienym vypadku varta było pieraadoleć pamknieńnie mianiać. Usio ž varta było b trymacca tradycyjaŭ, bo hetaja pieśnia — sapraŭdnaja kaštoŭnaść».
Pahladzieć novuju kałychanku ad Iryny Darafiejevaj možna, kliknuŭšy pa hetaj spasyłcy.
A voś staraja kałychanka ŭ vykanańni Jadźvihi Papłaŭskaj:
Dla paraŭnańnia – saviecka-rasiejskaja klasyka («Śpiać stomlenyja cacki»):
Kałychanka pa-niamiecku: Marlen Dytrych śpiavaje pra dziaŭčynku, jakoj mama paabiacała padaryć čyrvonuju sukienku, kali taja zaśnie — i što z hetaha vyjšła:
Pryhožaja ŭkrainskaja kałychanka pra zimu, jakaja, adnak, u klipie duža nahadvaje Vierku Siardziučku:
A voś kałychanka z Kanady pa-francusku:
Habrejskaja kałychanka (na idyš) pra chłopčyka, jaki choča pieratvarycca ŭ ptušaniatka:
Jašče kałychanki roznych narodaŭ možna pabačyć pa hetaj spasyłcy a taksama spampavać videaklipy na http://www.lull.ru.
