 Alaksiej Čarapanaŭ |
Incydent, što adbyŭsia ŭ paniadziełak za try chviliny da skančeńnia matču rehularnaha pieršynstva KCHŁ pamiž omskim «Avanhardam» i padolskim «Viciaziem», šakavaŭ śviet. Na łaŭcy zapasnych omskaj kamandy niečakana zhubiŭ prytomnaść 19‑hadovy chakieist Alaksiej Čarapanaŭ. Spyniłasia serca.U raździavalniu jaho nieśli na rukach čatyry čałavieki. A jašče praź dźvie hadziny ŭračy kanstatavali śmierć adnaho z samych talenavitych rasiejskich hulcoŭ.
«Darosłyja mužyki płakali la haściavoha ŭvachodu čechaŭskaj areny.Ź ścisnutych vusnaŭ vyryvałasia malba: «Loška, trymajsia. My z taboj. My vierym u ciabie, Loška!» Jaramir Jahr u chakiejnym švedry i na kańkach za paru chvilin da hetaha kryčaŭ na ŭsiu vulicu, kałociačy kułakami: «Loška, ačuniaj!» A potym — pryciskaŭsia da ściany. Čyrvonyja vočy čech chavaŭ za čornym čubam», — pisaŭ karespandent «Sport‑ekspresu» z Čechava.
Vydańnie adznačaje, što ŭ medykaŭ, jakija prybyli na arenu, nie akazałasia z saboj elektrašoku, a ŭkoły adrenalinu i masaž hrudnoj kletki nie dapamahli. Darečy, na nastupny dzień nieviadomyja źbili tych medrabotnikaŭ.
Śledčyja adrazu pačali pravierku śmierci chakieista. Pavodle ich,
chłopiec pakutavaŭ na išemičnuju chvarobu serca, ale praciahvaŭ hulać u chakiej.
U samym «Avanhardzie» padobnyja źviestki abviarhajuć, kažučy, što Čarapanaŭ byŭ absalutna zdarovym čałaviekam. Pryčym, chakieisty kamandy pastajanna prachodziać medyčnyja abśledavańni, a skarhaŭ na zdaroŭje taksama nie pastupała.
Alaksiej Čarapanaŭ naradziŭsia 15 studzienia 1989 hodu ŭ Ałtajskim krai.
Užo ŭ trochhadovym uzroście baćka pryvioŭ chłopca ŭ chakiejnuju sekcyju.Zrešty, Barnauł nikoli nia byŭ chakiejnaj Mekaj, tamu ŭ chutkim časie Alaksiej byŭ vymušany pierajechać u Omsk. Užo tady Čarapanaŭ rychtavaŭsia da taho, kab stać hulcom «Avanharda».
I heta chłopcu ŭdałosia. Pryčym, absalutna bliskuča. Užo ŭ siemnacaćcihadovym (!) uzroście Čarapanaŭ prabiŭsia ŭ asnoŭny skład «jastrabaŭ». Darečy, tam tady jon źjaŭlaŭsia adnaklubnikam našaha Alaksieja Kalužnaha. U tym sezonie «Avanhard» zavajavaŭ bronzavyja medali, a Čarapanaŭ byŭ pryznany najlepšym maładym chakieistam sezonu.
Hazety nie spyniali paraŭnoŭvać napadnika «Avanharda» z užo zornymi, ale takimi samymi maładymi Alaksandram Aviečkinym i Jaŭhienam Małkinym. Niekatoryja ličyli, što Čarapanavu navat pa siłach pieraŭzyści ichnyja pośpiechi.
Bajalisia tolki, kab chłopiec nie padchapiŭ «zornuju chvarobu». Na što Alaksiej adkazvaŭ: «Ja jašče ničoha tołkam nia vyjhraŭ, zanadta małady, kab uznosicca da niabiosaŭ. Starajusia abjektyŭna aceńvać svaje ścipłyja pośpiechi. Kamplimenty specyjalistaŭ, naturalna, pryjemnyja, ale hałavakružeńnia niama».
Alaksiej nasamreč atrymlivaŭ kajf ad hulni, pra što padkreślivaŭ u kožnym interviju. U volny čas jon hulaŭ u kamputarnyja hulni ci siadzieŭ u internecie. Na načnyja kluby, pa ŭłasnamu pryznańniu, času nie chapała.
Baćka Alaksieja staraŭsia ciahnikom pryjaždžać na kožnuju hulniu syna ŭ Omsku. «Dla jaho pieraadoleć 15—16 hadzin u adzin bok — nie prablema. Sapraŭdny hieroj», — kazaŭ chłopiec.
Letaś Čarapanaŭ staŭ pieramožcam junijorskaha čempijanatu śvietu. Jaho ŭ pieršym raŭndzie draftu vybraŭ słavuty klub NCHŁ «Ńju‑Jork Rejndžers». Ale za akijan Alaksiej pierajaždžać nie śpiašaŭsia, bo jašče nia vyjhraŭ «zołata» razam z «Avanhardam».
Za dzień da śmierci hałoŭny trener zbornaj Rasiei Viačasłaŭ Bykaŭ nazvaŭ Alaksieja Čarapanava siarod 47 pretendentaŭ na traplańnie ŭ skład hałoŭnaj kamandy krainy.
Śmierć na spartovaj placoŭcy ŭžo nikoha nie ździŭlaje. Niešta padobnaje čatyry hady nazad zdaryłasia i ŭ biełaruskaj stalicy.Padčas hulni adkrytaha pieršynstva krainy miž «Dynama» i «Ryhaj‑2000» kiepska stała forvardu haściej Siarhieju Žaŭtku. Chakieist nakiravaŭsia ŭ raździavalniu, ale straciŭ prytomnaść. Vyratavać jaho medyki nie zmahli.
Hod nazad biełaruskaja chakiejnaja supolnaść raźvitvałasia z adnym z najbolš talenavitych ajčynnych chakieistaŭ. U Čalabinsku padčas adpačynku zahinuŭ 21‑hadovy Alaksiej Savin, jakoha źbiŭ aŭtamabil.
Paśla zdareńnia z Alaksiejem Čarapanavym usio aktyŭniej pačali havaryć pra kamercyjanalizacyju sportu. Ciažka zrazumieć, jak čałaviek z chvorym sercam moh vychodzić na chakiejnyja placoŭki?
Pachavajuć Alaksieja Čarapanava 15 kastryčnika ŭ Omsku.
***
U Alaksieja Čarapanava było ŭ try razy pavialičanaje serca i ŭ piać razoŭ pavialičanaja sielazionka ŭ paraŭnańni z normaj, zajaviŭ ministar achovy zdaroŭja Padmaskoŭja Ŭładzimier Siasionaŭ.
