 |
Heta ŭžo šosty vizyt kiraŭnika Rasiejskaj pravasłaŭnaj carkvy ŭ Biełaruś. U Nacyjanalnym aeraporcie «Miensk» jaho sustrakali pradstaŭniki biełaruskich uładaŭ na čale ź vice-premjeram Alaksandram Kosincam, a taksama archijerei japarchij Biełaruskaj pravasłaŭnaj carkvy na čale ź mitrapalitam Minskim i Słuckim Fiłaretam, Patryjaršym ekzarcham usioj Biełarusi, paviedamlaje BIEŁTA.
* * *
U prahramu znachodžańnia ŭ biełaruskaj stalicy ŭklučany ŭdzieł va ŭračystym schodzie ŭ Pałacy Respubliki, pryśviečanym 1020‑hodździu Chryščeńnia Rusi, a taksama ŭ mižnarodnym kruhłym stale na temu: «1020‑hodździe Chryščeńnia Rusi ŭ losach narodaŭ Rasii, Ukrainy i Biełarusi».
Patryjarch Maskoŭski naviedaje vystavu «Pravasłaŭny abraz Rasii, Ukrainy i Biełarusi» ŭ Nacyjanalnym mastackim muziei Biełarusi; minski Śviata‑Duchaŭ kafiedralny sabor, dzie z 22 pa 25 kastryčnika znachodziacca moščy śviatoha dabraviernaha kniazia Uładzimira — chryściciela Rusi; Dom miłasernaści; chram u honar abraza Božaj Maci «Dziaržaŭnaja» i Śviata‑Jelisaviecinski žanočy manastyr u Minskim rajonie Navinki; chram‑pomnik u honar Usich Śviatych i ŭ pamiać ab biaźvinna zabitych u Ajčynie našaj, što budujecca pad patranatam patryjarcha, a taksama raźmieščanuju pobač draŭlanuju Śviata‑Trajeckuju carkvu pa vulicy Kalinoŭskaha.
24 kastryčnika patryjarch sustreniecca z prezidentam Biełarusi Alaksandram Łukašenkam.
Papiaredni vizit kiraŭnika RPC u Biełaruś adbyŭsia 18—20 maja 2002 hoda.
