Łukašenka pieratvaryŭsia ŭ superrynačnika. Biełarusi treba značnyja kroki pa liberalizacyi ekanomiki, zajaviŭ jon. I nia treba pytacca, adkul u ludziej hrošy: «Niapraŭda, što svabodnaja ekanomika i rynačnyja adnosiny ŭ planie vyzvaleńnia mahčymaściaŭ čałavieka - heta kiepska».
Pytańni ŭnutranaj i zamiežnaj palityki, u tym liku viečny bol hałavy — adnosiny z Rasijaj, i aktualny kłopat – finansavy kryzis, što ŭžo vymieŭ z abmieńnikaŭ dalary, razhladalisia 30 kastryčnika na naradzie ŭ Alaksandra Łukašenki. Jak zaŭždy, publicy abvieščana vielmi mała.
Abaznačajučy temy narady, Alaksandr Łukašenka nazvaŭ ich u takim paradku: uzajemadziejańnie z Rasijaj, budučaja sustreča ŭ viarchach u ramkach tak zvanaj «sajuznaj dziaržavy», biahučaja ekanamičnaja sytuacyja ŭ suviazi ź finansavym kryzisam i, što symptamatyčna, liberalizacyja ekanomiki i debiurakratyzacyja dziaržsystemy.
Što datyčyć apošniaha, Łukašenka vystupiŭ z takoj pałymianaj pachvałoj rynkavaj svabody, što taho nie dakazaŭ by navat Jarasłaŭ Ramančuk.
Adnak najpierš dziaržahienctvy paviedamlajuć pra rasiejski blok «ce‑u»
«Našy adnosiny z Rasijskaj Fiederacyjaj pavinny być bolš pradumanymi, arhanizavanymi»,— skazaŭ jon. Niešta sukrytaje, raz havorycca abiniakami.
«Paśla pasiadžeńnia Rady Biaśpieki prajšła sustreča z Prezydentam Rasii. Tamu pieršaja tema našaj narady — vyniki sustrečy na vyšejšym uzroŭni z punktu hledžańnia taho, ab čym my damovilisia, kab ministry i ŭrad, inšyja viedamstvy i struktury mahli b dziejničać u hetym klučy ŭ bližejšy čas u supracoŭnictvie z Rasijaj. Ja jak Staršynia Vyšejšaha Dziaržrady (BIEŁTA lubić vialikija litary) zrablu ŭsio dla taho, kab unieści ŭ paradak dnia istotnyja, źmiastoŭnyja pytańni, jakija datyčać samaha hałoŭnaha ŭ našych adnosinach. U advarotnym vypadku VDR i pravodzić nia varta». Dola niezadavolenaści čujecca ŭ takich farmuloŭkach.
«Na Radzie Biaśpieki my jašče raz kankretyzavali paradak dnia i abmierkavali mnohija pytańni našych uzajemaadnosin z RF. Na ŭzroŭni prezydentaŭ ich taksama razhladali. I ciapier my damovimsia ab kankretnych dziejańniach pa tym abo inšym napramku».
Dalej pajšoŭ kryzis.
Łukašenka pacikaviŭsia ŭ staršyni Nacbanku sytuacyjaj. Pry hetym spakušaŭ razvahami, jašče paru hadoŭ niečuvanymi: «Ja havaryŭ ab tym, što my admianiajem deklaravańnie pa ŭkładach: nichto pa kišeniach u nasielnictva nie pavinien «łazić».
Jon vykazaŭ pierakananaść u tym, što treba zrabić rašučyja kroki ŭ bok liberalizacyi ekanomiki, debiurakratyzavaŭšy ŭsiu isnujučuju systemu kiravańnia ŭ dziaržavie.
«Da 1 studzienia ŭ hetym planie my pavinny zrabić maksymum. Nia treba pryhoža «afarmlać» niejkija pytańni. Bačym, źjavilisia pytańni, dapuścim, z deklaravańniem (ludzi nia vielmi lubiać, kali ŭ ich pytajucca, adkul jany ŭziali hrošy), — davajcie zdymiem hetaje pytańnie, nia budziem u ich pytacca. Bačym, što jość prablema z rehistracyjaj pradpryjemstvaŭ — davajcie hetuju systemu debiurakratyzujem až da zajaŭnaha pryncypu rehistracyi pradpryjemstva. Choć by, dapuścim, pa tych kirunkach, dzie aścierahacca niama čaho, naprykład, źviazanych z vytvorčaściu i pasłuhami. Heta značyć nam pad hety momant treba zrabić toje, čaho my zaŭsiody bajalisia, i toje, čaho nie zrabili raniej. Niapraŭda, što svabodnaja ekanomika i rynačnyja adnosiny ŭ planie kankurencyi, vyzvaleńnia mahčymaściej čałavieka — heta drenna. Heta jany niachaj tak dumajuć, jany na Zachadzie dapracavalisia da taho, što «zahubili» rynačnuju ekanomiku i devalvavali hetyja paniaćci. My da svabodnaj ekanomiki išli spakojna, pavinny ŭ hetym napramku i dalej spakojna iści. Niama ničoha drennaha ŭ tym, što ŭ nas budzie ekanomika bieź lišnich abuzy i putaŭ, u hetym nijakaj niebiaśpieki (kamu? – Red.) niama. Tamu što asnoŭnyja ryčahi ŭ kiravańni ekanomikaj i inšymi halinami my (h.zn. ja i maja kamanda – Red.) nia stracili. U hetym napramku nam treba imhnienna dziejničać — heta daść vielmi dobry vynik».
Z suśvietnaha finansavaha kryzisu Biełaruś moža i pavinna atrymać peŭnuju vyhadu, skazaŭ dalej Łukašenka. U pryvatnaści, buduć skarekciravany ekspartnyja patoki tavaraŭ i pašyrana hieahrafija rynkaŭ zbytu. Havorka, badaj, vykarystańnie nahody dla pošuku alternatyvaŭ rasiejskamu vektaru.
Ni słova pra kankretnyja prablemy i pahrozy, niby ich niama. A biznes ža, kali stavić zadačy liberalizacyi, nia lubić nieprazrystaści. Rynkavaja ekanomika nia moža być zakrytaj...
Što b tam ni było, rytoryka źmianiłasia. Tolki biez palityčnych svabodaŭ i padziełu ŭładaŭ NEP možna zharnuć taksama chutka, jak i abvieścić. Učora deklaracyj nie patrabavali, zaŭtra złupiać razam z skuraju. Zdajecca, toje samaje pačynaje razumieć i abyvaciel. U dzień narady ŭ staličnych abmieńnikach kančatkova źnikli dalary, deficytnym robicca i eŭra. Jość infarmacyja, što na pačatku listapada z Rasiei maje nadyści pieršy miljard kredytu. Kali abiacańniam NEPu pavieryć i Daminik Stros-Kan z MVF, pryjduć jašče dva. Tady haspadarka zmoža ŭzdychnuć.
